I. A Veika Sa Caka E Na Veigauna 16 - AI VOLA TABU（FIJ1864）

Ai soro sa cabori e na mata ni kato; a yacadratou eratou sa cakacaka e na mata ni kato; na meke ni vakavinavinaka.

1A RA sa kauta mai na kato ni Kalou, ka vakatikora e na loma ni vale gatu sa birika oti kina ko Tavita: a ra sa cabora nai soro kama e so, ka so nai soro e na veivinakati, e na mata ni Kalou.

2Ia ni sa tinia ko Tavita na nona cabora na veisoro kama kei na veisoro e na veivinakati, sa vosavakalougatataki ira na tamata e na yaca i Jiova.

3A sa vota vei ira yadua na tamata Isireli, vei ira na tagane kei ira na alewa, kivei ira yadua e dua nai buli madrai, kei na tiki ni lewe ni manumanu, kei na dua na tavaya waini.

4A SA lesia ko koya e so vei ira na Levi me ra cakacaka e na mata ni kato i Jiova, ka me ra tukutuku, ka vakamoli-moli ka vakavinavinaka vei Jiova na nodra Kalou na Isireli:

5o Asafi sa liu, ka sa taravi koya ko Sikariya, ko Yieli, kei Simiramoci, kei Yieli, kei Maticiya, kei Iliapi, kei Pinaya, kei Opeti-itomi: ia ko Yieli, e na veiqiriqiri kei na veiapi, ia ko Asafi, sa qiri e na qiriqiri tani e so;

6sa uvu davui tikoga e na mata ni kato ni veiyalayalati ni Kalou koi rau na bete ko Pinaya kei Yeesieli.

7Sa qai solia na vakavinavinaka vei Jiova ko Tavita e na siga ko ya ga ki na ligadra ko Asafi kei ira na wekana:

8Dou ia na vakavinavinaka vei Jiova, dou masuta na yacana, dou tukuna voli na nona cakacaka vei ira na tamata.

9Dou meke vua, dou meketaka vua na sere, dou tuku-tukuna na nona cakacaka mana kecega,

10Dou vosadoudou e na yacana tabu: me marau na lomadra era sa vakasaqarai Jiova.

11Dou vakasaqarai Jiova kei na nona kaukauwa, dou vakasaqara tikoga na matana.

12Dou nanuma na nona cakacaka mana sa kitaka oti ko koya, na nona cakacaka mana kei na lewa ni gusuna;

13oi kemudou na kawa i Isireli na nona tamata, oi kemudou na luve i Jekope sa digitaka ko koya.

14Sa ko Jiova ko koya na noda Kalou; sai koya ga sa lewai vuravura taucoko.

15Dou nanuma tiko na nona veiyalayalati; a vosa sa rotaka ko koya me veiyalaya-yacova nai tabatamata e udolu;

16o qori ka kitaka ko koya kei Eparaama, kei na nona vosa vavakini kivei Aisake,

17a sa vakadinadinataka ko koya vei Jekope me vunau, vei Isireli talega me veiyalayalati me tawa mudu,

18a sa kaya, Au na solia kivei iko na vanua ko Kenani, nai votavota mo dou taukena;

19ni dou a lewe vica walega, io e lewe vica, ka vulagi kina.

20Ia, ni ra sa lako mai na vanua e dua ki na vanua e dua, ia mai na matanitu e dua kivei ira na mataqali e dua;

21sa sega ni laiva me dua e vakasaurarataki ira; io, sa vunauci ira na tui e na vukudra,

22ka vaka, Kakua ni tarai ira kaʼu sa lumuta, dou kakua ni vakacacani ira na noqu parofita.

23Dou meke vei Jiova, ko vuravura taucoko; tukuna voli e na veisiga ni sa dauia na veivakabulai ko koya.

24Tukuna na nonai ukuuku e na veimatanitu kisau; na nona cakacaka e veivakidacalataki ki na veimatanitu kecega.

25Ni sa levu ko Jiova, a sa dodonu me vakacaucautaki vakalevu: me rerevaki vakalevu cake talega ko koya vei ira na kalou kecega.

26Ni sa matakau walega na nodra kalou kecega na tamata: ia ko Jiova ga sa cakava na lomalagi.

27Sa e matana na serau kei na vakarokorokotaki; sa e nona yasana na kaukauwa kei na marau.

28Dou solia vei Jiova, koi kemudou na wekadra na tamata, dou solia vei Jiova na vakarokoroko kei na kaukauwa.

29Dou solia vei Jiova na vakarokoroko e kilikili kei na yacana: dou kauta mai nai madrali, ka lako mai ki na matana: dou soro vei Jiova e na yasana tabu sa vakaiukuuku.

30Dou rere e matana, ko vuravura taucoko: ena tu dei talega ko vuravura, me kakua ni yavavalati.

31Me reki ko lomalagi, ka marau ko vuravura: me kainaki talega e na veimatanitu, Sa lewa ko Jiova.

32Me vadugu na Wasawasa, kei na kena sinai: me rereki na veiwere, kei na ka kecega sa tiko kina.

33Ena qai meke mai na kau ni veikau e na mata i Jiova, e na vuku ni nona lako mai me lewai vuravura.

34Dou ia na vakavinavinaka vei Jiova, ni sa yalovinaka: ni sa tawa mudu na nona loloma.

35Ia dou kaya, Vakabulai keimami, na Kalou ni neimami bula, ka vakasoqoni keimami vata, ka vakabulai keimami maivei ira na veimatanitu kisau, me keimami vakavinavinaka ki na yacamu tabu, me keimami daureki e na vakavinavinaka vei iko.

36Me vakavinavinakataki ko Jiova na nodra Kalou na Isireli ka tawa mudu.

A sa vakaemeni ko ira kecega na tamata, ka ra sa vakavinavinaka kivei Jiova.

37A sa laivi Asafi kei ira na wekana ko koya maikea, e na mata ni veiyalayalati i Jiova, me ra cakacaka tikoga e na mata ni kato, me vaka na kenai valavala e yaga e na veisiga:

38kei Opeti-itomi kei ira na wekadra, sa lewe onosagavulu ka walu; ia sai vakatawa ni katuba na luve i Yitucuni ko Opeti-itomi, kei Osa:

39kei Satoki na bete, kei na wekana era sa bete, e na mata ni vale-tikotiko i Jiova, e na tikina cecere mai Kipioni,

40me vakacabora tiko nai soro kama vei Jiova e na dela ni cabocabo ni soro kama, e na mataka kei na yakavi, ka me vaka na ka kecega sa volai e na vunau i Jiova, a ya sa vakarota ko koya vei ira na Isireli;

41a sa vata kei ira ko Emani kei Yitucuni, kei ira tale na vo era sa digitaki, a sa cavuti na yacadra, me ia na vakavinavinaka vei Jiova, ni sa tawa mudu na nona loloma;

42a sa vata kei rau, ko Emani kei Yitucuni, na davui kei na qiriqiri, ka so tale na ka sa domo vinaka ni Kalou, me nodra era sa qiriqiri. A sai vakatawa ni katuba ko iratou na luve i Yitucuni.

43A sa suka ko ira kecega na tamata yadua ki na nona vale: ka sa lako tale ko Tavita me vosavakalougatataka na nona lewe-ni-vale.