I. A Veika Sa Caka E Na Veigauna 15 - AI VOLA TABU（FIJ1864）

Sa kauta na kato ko Tavita ki Jerusalemi.

1A SA tara ko Tavita e so na vale me nona e na nona koro, a sa cokonaka e dua na yasana me kena na kato ni Kalou, a sa birika na kena vale gatu.

2Sa qai kaya ko Tavita, Sa sega ni dodonu me dua e colata na kato ni Kalou, ko ira ga na Levi; ni sa digitaki ira ko Jiova me ra colata na kato ni Kalou, me ra qaravi koya tiko talega ka tawa mudu.

3A sa vakasoqoni ira kecega na Isireli ki Jerusalemi ko Tavita, me kauta mai na kato i Jiova ki na kena yasana, a ya sa cokonaka kina ko koya.

4A sa vakasoqoni ira vata na luve i Eroni kei ira na Levi ko Tavita:

5Vei ira na luve i Koaca: o Urieli sa liu, kei ira na wekana era sa drau vakadua ka ruasagavulu;

6vei ira na luve i Mirari: o Asaya sa liu, kei ira na wekana era sa drau vakarua ka ruasagavulu;

7vei ira na luve i Kerisomi: o Joeli sa liu, kei ira na wekana era sa dua na drau ka tolusagavulu;

8vei ira na luve i Elisafani: o Simaya sa liu, kei ira na wekana era sa rua na drau;

9vei ira na luve i Epironi: o Ilieli sa liu, kei ira na wekana era sa walusagavulu;

10vei ira na luve i Usieli: o Aminatapi sa liu, kei ira na wekana era sa dua na drau ka tinikarua.

11A sa kacivi rau na bete ko Satoki kei Epiyacari ko Tavita, kei ira na Levi, ko Urieli, ko Asaya, kei Joeli, ko Simaya, kei Ilieli, kei Aminatapi,

12a sa kaya vei iratou, Oi kemudou dou sa nodra qase turaga na Levi; dou vakasavasavataki kemudou, koi kemudou kei ira talega na wekamudou, mo dou kauta mai kina na kato i Jiova na nodra Kalou na Isireli ki na yasana kaʼu sa cokonaka kina:

13ia e na vuku ni dou a sega ni kitaka eliu, sa vakacacani keda kina ko Jiova na noda Kalou, ni da a sega ni vakasaqarai koya me vaka na kenai valavala e dodonu.

14A sa vakasavasavataki ira ko ira na bete kei ira na Levi me ra kauta mai na kato i Jiova na nodra Kalou na Isireli.

15A sa colata na kato ni Kalou ko ira na luve i Levi e nai vua e rua, me vaka sa kaya ko Mosese, ka vaka na vosa i Jiova.

16A sa kaya ko Tavita kivei ira sa liu vei ira na Levi, me ra lesi ira na wekadra me ra dau-ni-meke, e na ka domo vinaka, na veiapi, kei na qiriqiri tani e so, ka tabalaka na domodra e na marau.

17Ia ko ira na Levi, era sa lesi Emani na luve i Joeli; kei ira e so na wekana, ko Asafi na luve i Perekiya: ka so vei ira na wekadra na luve i Mirari, ko Ecani, na luve i Kusaya;

18a sa vata kei ira e so na wekadra sa uasivi sobu: o Sikariya, ko Peni, kei Yeesieli, kei Simiramoci, kei Yieli, kei Uni, ko Iliapi, kei Pinaya, kei Meeseya, kei Maticiya, kei Elifileu, kei Mikineya, kei Opeti-itomi, kei Yieli, erai vakatawa ni katuba.

19Ia ko iratou na dau-ni-meke, o Emani, ko Asafi, kei Ecani, me qiria na veiqiriqiri parasa;

20kei Sikariya, kei Asieli, kei Simiramoci, kei Yieli, kei Uni, kei Iliapi, kei Meeseya, kei Pinaya, e na qiriqiri vaka na domo ni alewa;

21ia ko Maticiya, kei Elifileu, kei Mikineya; kei Opeti-itomi, kei Yieli, kei Asasiya, e na veiapi vakadomoilevu me liu.

22A sa domo-ni-meke ko Kinaniya, ko ya sa liu vei ira na Levi; sa dauvakata-vulica na meke, ni sa vuku ko koya.

23A sai vakatawa ni katuba ni kato ko Perekiya, kei Elikana.

24Ia ko Sipaniya, kei Yosafati, kei Nicaneli, kei Amasai, kei Sikariya, kei Pinaya, kei Elieseri, o iratou na bete, eratou sa uvu davui e na mata ni kato ni Kalou: a sai vakatawa ni katuba ni kato ko Opeti-itomi kei Yiya.

25A sa lako ko Tavita, kei ira na nodra qase na Isireli, kei ira na turaga ni veiudolu, me ra kauta cake mai e na marau na kato ni veiyalayalati i Jiova, mai na vale i Opeti-itomi.

26Ia ni sa vukei ira na Levi ko na Kalou e na nodra colata na kato ni veiyalayalati i Jiova, era sa vakacabora kina na karavau e vitu, kei na sipi tagane e vitu.

27A sa vakaisulu ko Tavita e nai sulu matailalai, kei ira kece talega na Levi era sa colata na kato, kei ira na dau-ni-meke, kei Kinaniya na domo-ni-meke, kei ira na dau-ni-meke: a sa vaka-efoti malo ko Tavita.

28A sa kauta mai na kato ni veiyalayalati i Jiova ko ira kece na Isireli e na qoqolou, kei na domo ni veidavui, kei na qiriqiri tani e so, kei na veiapi.

29Ia ni sa yaco na kato ni veiyalayalati i Jiova ki na koro i Tavita, sa vakararai tiko mai na katuba ecake ko Mikali na luvena alewa ko Saula, a sa kunei Tavita ni sa meke ka qiriqiri lako; a sa beci koya e na yalona.