I. A Veika Sa Caka E Na Veigauna 14 - AI VOLA TABU（FIJ1864）

Sa tarai na vale i Tavita; a yacadratou na luvena, 1-7. Sa tala vakarua ko Tavita kei ira na kai Filisitia, 8-17.

1A SA vakatadu mata ko Irami na tui Teiri kivei Tavita, vata kei na kau sitari e so, ka so na matai ni vatu ka so na matai ni kau, me ra tara e dua na vale me nona.

2A sa kunea ko Tavita ni sa vakataudeitaki koya ko Jiova me nodra tui na Isireli, ni sa laveti kicake na nona matanitu, e na vukudra na nona tamata na Isireli.

3A sa kauta e so tale na watina ko Tavita mai Jerusalemi: a sa sucu vei Tavita e so tale na luvena tagane kei na luvena alewa.

4Ia o qo na yacadratou eratou sa sucu vua mai Jerusalemi: o Samua, kei Sopapi, ko Nacani, kei Solomoni,

5kei Ipiari, kei Ilisua, kei Ilifeleti,

6kei Noka, kei Nefeki, kei Yafia,

7kei Ilisama, kei Peliyata, kei Ilifeleti.

8IA ni sa rogoca ko ira na kai Filisitia ni sa lumuti ko Tavita me nodra tui kecega na Isireli, era sa lako cake na kai Filisitia kece me vakasaqarai Tavita. A sa rogoca ko Tavita, a sa curu yani me tavaki ira.

9A sa lako mai ko ira na kai Filisitia, a ra sa tiko raraba mai na buca ko Refeimi.

10A sa taroga na Kalou ko Tavita, ka kaya, Meʼu lako cake ka vala kei ira na kai Filisitia, se kakua? ia ko na soli ira mai ki na ligaqu, se segai? A sa kaya vua ko Jiova, Mo lako cake; ia kaʼu na soli ira ki na ligamu.

11A ra sa lako cake ki Peali-pirasimi, a sa mokuti ira maikea ko Tavita. Sa qai kaya ko Tavita, Sa gumatua vei ira na noqu meca e na ligaqu ko na Kalou, me vaka sa gumatua na veiwai; a ra sa vakatoka kina na yaca ni vanua ko ya ko Peali-pirasimi.

12A ra sa biuta tani e na yasana ko ya na nodra veikalou, a sa vosa ko Tavita, a ra sa vakamai e na buka.

13A sa mai tiko raraba tale ko ira na kai Filisitia e na buca.

14A sa taroga na Kalou tale kina ko Tavita; a sa kaya vua ko na Kalou, Mo kakua ni lako me muri ira; mo gole tani yani vei ira, ka lutuki ira ni dou sa donuya na kau o qori:

15ia ena vaka ga o qo, ni ko sa rogoca e dua na rorogo ni lakolako e na taba ni kau o qori, mo qai lako yani mo dou vala, ni sa liutaki iko yani ko na Kalou me mokuti ira na nodra mataivalu ua kai Filisitia.

16A sa kitaka ko Tavita me vaka na vosa ni Kalou kivei koya: a ra sa mokuta na nodra mataivalu na kai Filisitia mai Kipioni ka yaco ki Keseri.

17A sa lako yani nai rogorogo kei Tavita ki na veivanua kecega; a sa vakayacora na rerevaki koya ko Jiova ki na matanitu kecega.