I. A Veika Sa Caka E Na Veigauna 13 - AI VOLA TABU（FIJ1864）

Sa kauta na kato ko. Tavita mai Kiriaci-yiarimi; a sa kauta ki na vale i Opeti-itomi.

1A SA bose vata ko Tavita kei ira sa turaga ni veiudolu kei na veidrau, kei ira kece era sa liu.

2A sa kaya ko Tavita vei ira na nodrai vavakoso taucoko na Isireli, Kevaka sa vinaka kivei kemudou, ka sa vuna ko Jiova na noda Kalou, me da vakatadu mata vei ira na wekada e na veiyasana kecega, o ira sa vo e na vanua kece nei Isireli, kivei ira talega na bete kei ira na Levi era sa tiko e na veikoro sa nodra na kedrai bili, me ra soqoni ira vata mai kivei keda:

3ia me da kauta tale mai kivei keda na kato ni veiyalayalati ni noda Kalou: ni da sa sega ni taroga kina e na veisiga i Saula.

4A sa kaya ko ira nai vavakoso taucoko me ra kitaka vakakina: ni sa dodonu na ka o qo e na matadra kecega na tamata.

5A sa vakasoqoni ira kece vata na Isireli ko Tavita, mai Siori mai Ijipita, ka yaco ki nai curucuru ki Emaci, me ra kauta mai na kato ni Kalou mai Kiriaci-yiarimi.

6A sa lako cake ko Tavita, kei ira kecega na Isireli, ki Peala (io ki Kiriaci-yiarimi) sa nei Juta, me kauta cake maikina na kato ni Kalou ko Jiova, sa tiko e na kedrau maliwa na jerupi, o qori sa cavu kina na yacana.

7A ra sa vakavodoka na kato ni Kalou ki na dua na vale-vakayavana vou, mai na vale i Epinatapi, a rau sa vakasalataka na vale-vakayavana ko Usa kei Eiio.

8A sa qiriqiri ko Tavita kei ira kece na Isireli, e na kaukauwa kece, e na mata ni Kalou, e na veiapi, kei na qiriqiri tani e so, kei na davui kaukamea kei na sere.

9Ia ni ra sa yaco ki na rara ni buturaki sila sa nei Kitoni, sa dodoka yani na ligana ko Usa me taura na kato, ni sa tarabe na karavau.

10A sa waqa mai na cudru i Jiova vei Usa, a sa yaviti koya, e na vuku ni sa taura na kato e na ligana: a sa mate maikea e na mata ni Kalou.

11A sa rarawa na loma i Tavita ni sa yaviti Usa ko Jiova; a sa vakayacani na yasana o qori ko Peresi-usa, ka yacova na siga o qo.

12A sa rerevaka na Kalou ko Tavita e na siga ko ya, a sa kaya, Au na kauta vakaevei mai vei au na kato ni Kalou?

13A sa sega kina ni kauta kivei koya na kato ko Tavita, ki na koro i Tavita, a sa kauta vakatikitiki tani ga ki na vale i Opeti-itomi na kai Kaca.

14A sa tiko e na mataqali i Opeti-itomi na kato ni Kalou, ka sa vula tolu e na nona vale. A sa vakalougatataka na vale i Opeti-itomi ko Jiova, kei na nona ka kecega.