I. A Veika Sa Caka E Na Veigauna 12 - AI VOLA TABU（FIJ1864）

O ira ka lako vei Tavita ki Sikilaki, 1-22. O ira ka lako vei koya ki Epironi, me buli koya me tui, 23-40.

1IA ko ira o qo era sa lako mai kivei Tavita ki Sikilaki, ni sa vuni koya tiko e na vuku i Saula na luve i Kisi: ia era sa vata kei ira na tamata qaqa era sa veivuke e nai valu;

2a nodrai yaragi na dakai dina, a ra sa liga veivuke ni ra viri vatu ka vanataka na gasau e na dakai dina; io, e so na weka i Saula na Penijamini:

3O Eieseri sa liu, kei Yoasi, erau luve i Simaa na kai Kipia; kei Yisieli, kei Peleti, erau luve i Asimaveci; kei Piraka, kei Yeu na kai Anacoci,

4kei Isimaya na kai Kipioni, a tamata qaqa vei ira na lewe tolusagavulu, a sa nodra turaga na tolusagavulu; kei Yirimia, kei Yeesieli, kei Yoanani, kei Yosapati na kai Kitera,

5ko Elusei, kei Yirimoci, kei Pialiya, kei Simariya, kei Sifatiya na luve i Arufi,

6ko Elikana, kei Isiya, kei Esareli, kei Yoeseri, kei Yasopiami, o iratou na luve i Kora,

7kei Yoela, kei Sipatiya, oi rau na luve i Yiroami mai Kitori.

8A sa tawasei ira e so e na mataqali i Kata me totaki Tavita, ka me tiko e na tikina kaukauwa mai na lekutu, a ra sa tamata kaukauwa ka tamata dauvala e nai valu, a ra sa dautara nai sasabai kei na moto, a sa vaka na mata ni laioni na matadra, a sa totolo me vaka na teira e na veiulu-ni-vanua;

9ai matai ko Eseri, ai karua ko Opatiya, ai katolu ko Iliapi,

10ai kava ko Misimana, ai kalima ko Yirimia,

11ai kaono ko Atai, ai kavitu ko Ilieli,

12ai kawalu ko Yoanani, ai kaciwa ko Elisapati,

13ai katini ko Yirimia, ai katinikadua ko Makipanai.

14O iratou o qo na luve i Kata, eratou sa turaga e na mataivalu; o koya sa lailai sobu sa lewa e dua na drau, ia ko koya sa levu cake sa lewa e dua na udolu.

15Sai ira o qo era sa lako ki tai kadua ni Joritani e nai matai ni vula, ni sa vuabale na batina kecega; a ra sa vakasevi ira kecega era sa tiko e na veibuca, o ira mai cake kei ira mai ra talega.

16A sa lako mai kivei Tavita ki na koro kaukauwa e so vei ira na luve i Penijamini kei ira na Juta.

17A sa lako yani ko Tavita me tavaki ira, a sa vosa ka kaya vei ira, Kevaka dou sa lako vakasautu mai vei au me vukei au, ena kabiti kemudou na lomaqu; ia, kevaka me temaki au vei ira na noqu meca, ni sa sega na ca e na ligaqu, me raica mada na nodra Kalou na noda qase, ka kudruvaka.

18Sa qai lutu mai na Yalo kivei Amasai, o koya sa liu vei ira na turaga o qo a sa kaya, Keitou sa nomu ga, Tavita, ka sa totaki iko, na luve i Isei; me vakacegu sara ko iko, me vakacegu ko ira talega era sa vukei iko; ni sa vukei iko na nomu Kalou. Sa qai vakacegui ira ko Tavita, a sa lesi ira me turaga ni mataivalu.

19A sa lutu mai kivei Tavita e so vei ira na Manase, ni sa lako vata ko koya kei ira na kai Filisitia me veivala kei Saula; a ra sa sega ni vukei ira; ni sa bose ko ira na nodra turaga na kai Filisitia, a ra sa talai koya tani, ni ra sa kaya, Ena lutu tale ko koya kivei Saula na nona turaga, ena qai yali kina na uluda.

20Ni sa lako ko koya ki Sikilaki, sa lutu vua maivei ira na Manase, ko Atina, kei Yosapati, kei Yitieeli, kei Mikaeli, kei Yosapati, kei Iliu, kei Silicei, eratou sa turaga ni nodra veiudolu na Manase.

21A ra sa vukei Tavita me vala kei ira na mataivalu daubutako; ni ra sa tamata qaqa ka doudou kecega, a ra sa turaga e na mataivalu.

22Ia e na gauna o qori era sa lako tiko e na veisiga kecega kivei Tavita e so me vukei koya, a sa yaco kina mei valu levu, me vaka nai valu ni Kalou.

23IA o qo na kedrai wiliwili na veimataivalu sa vakarau tu ki nai valu, era sa lako mai kivei Tavita ki Epironi, me vukica vua na matanitu i Saula, me vaka na vosa i Jiova:

24Sa ono na udolu ka walu na drau vei ira na luve i Juta sa dau nodrai yaragi nai sasabai kei na moto, ka ra sa vakarau tu ki nai valu.

25Sa vitu na udolu ka dua na drau vei ira na luve i Simioni, ora tamata kaukauwa ka qaqa sara e nai valu.

26Sa va na udolu ka ono na drau vei ira na luve i Levi.

27A sa liu vei ira na Eroni ko Yioyata, a sa tiko kaya e tolu na udolu ka vitu na drau:

28kei Satoki, na cauravou kaukauwa ka qaqa sara, ka ruasagavulu ka mani rua na turaga mai na mataqali i tamana.

29A sa tolu na udolu vei ira na luve i Penijamini, era sa weka i Saula; a ra sa lewe vuqa vei ira era a vakatawa na vale i Saula ka yacova na gauna o qori.

30A sa oba vakarua ka walu na drau vei ira na luve i Ifireimi, a ra tamata kaukauwa ka qaqa, ka tamata rogo e na nodra mataqali na nodra qase.

31Ia vei ira e dua na wase ni yavusa i Manase, sa dua na oba ka walu na udolu, sa cavuti na yacadra, me ra lako mai ka buli Tavita me tui.

32Ia vei ira na luve i Isakari, era sa vuku e na ka ni gauna o qori, me kila na ka sa dodonu kivei ira na Isireli me kitaka; o ira era sa liu vei ira era sa drau vakarua; ia ka sa vakarorogo tiko kivei ira ko ira vakaadua na wekadra.

33Sa oba vakalima vei ira na luve i Sepuloni, era sa lako rawa e nai valu, ka vakarau tu ki nai valu, e nai yaragi kecega ni valu, era daulako vaka-yatuni; era sa sega ni lomalomarua.

34A sa dua na udolu na turaga ni valu vei ira na luve i Nafitali, a sa vata kei ira e oba vakatolu ka vitu na udolu sa vakasasabai ka vakamoto.

35Ia vei ira na luve i Tani na tamata sa vakarau tu ki nai valu sa oba vakarua ka walu na udolu ka ono na drau.

36Ia vei ira na luve i Aseri sa oba vakava era sa yaga me lako ki nai valu, ka vakarau tu ki nai valu.

37Ia mai tai kadua ni Joritani, maivei ira na Rupeni, kei ira na Kata, ka mai na dua na wase ni yavusa i Manase, sa oba vakatinikarua, a ra sa tara nai yaragi kece e yaga e nai valu.

38O ira kece na tamatai valu o qo, era lako rawa ni ra sa yatuni, era sa lako mai e na loma dina ki Epironi, me buli Tavita me nodra tui kece na Isireli; ia ko ira kece tale na Isireli, era sa yalovata me buli Tavita me tui.

39A ra sa tiko vata kei Tavita maikea ka bogi tolu, a ra sa kana ka gunu: ni sa cokonaka na kedra ko ira na wekadra.

40Ia ko ira talega era sa tiko voleka mai, ko ira na Isakari, kei ira na Sepuloni, kei ira na Nafitali, era sa kauta mai na kakana e na asa e so, kei na kameli e so, kei na mule e so, kei na karavau e so; nai oco, e madrai droka, nai buli madrai lolo, kei na yawa vaini, kei na waini, kei na waiwai, kei na karavau e so, kei na sipi na ka levu sara: ni sa marau ko ira na Isireli.