I. A Veika Sa Caka E Na Veigauna 11 - AI VOLA TABU（FIJ1864）

Sa buli ko Tavita mai Epironi me tui Isireli, 4-9. O ira na tamata qaqa i Tavita, 10-47.

1ERA sa qai vakasoqoni vata ko ira kecega na Isireli kivei Tavita ki Epironi, a ra sa kaya, Raica, na suimu kei na lewemu koi keitou:

2ia na gauna sa oti yani, ni sa tui tiko ko Saula, sai iko ga sa dauliutaki ira na Isireli, e na nodra curu yani kei na nodra curu tale mai: a sa kaya vei iko ko Jiova na nomu Kalou, O iko, ko na vakani ira na noqu tamata na Isireli, ia ko na lewai ira na noqu tamata na Isireli.

3A sa lako mai ko ira kecega na qase ni Isireli kivei koya na tui ki Epironi; ka sa ia na veiyalayalati kei ira ko Tavita mai Epironi, e na mata i Jiova; a ra sa lumuti Tavita me nodra tui na Isireli, me vaka na vosa i Jiova e na gusu i Samueli.

4A sa lako ko Tavita kei ira kecekece na Isireli ki Jerusalemi, ko ya ko Jepusa: a ra sa tiko kina na kai Jepusa, o ira nai taukei ni vanua.

5A sa kaya kivei Tavita ko ira nai taukei mai Jepusa, E dredre sara mo lako mai kike. A sa kabata ga ko Tavita na koro kaukauwa ko Saioni, a ya na koro i Tavita.

6A sa kaya ko Tavita, O koya sa na mokuti ira taumada na kai Jepusa, ena uludra ka turaga ni valu. A sa cabe taumada ko Yoapi na luve i Siruya, a sa yaco kina me turaga ni valu.

7A sa tikoga ko Tavita e na koro kaukauwa; a ra a vakatoka kina me koro i Tavita.

8A sa tara tale ko koya na koro e na veiyasana, sa vakatekivu mai Milo ka yacova nai bili; ia na yasa sa vo e na koro sa vakavouya ko Yoapi.

9A sa tubu me levu cake tikoga ko Tavita: a sa tiko vata kaya ko Jiova ni lewe vuqa.

10IA ko ira o qo era sa liu vei ira na tamata qaqa i Tavita, era a totaki koya e na nona matanitu, kei ira kece na Isireli, me buli koya me tui, me vaka na vosa i Jiova e na vukudra na Isireli.

11Ia o qo na nodrai wiliwili na tamata qaqa i Tavita: o Yaropiami na Akimoni sa liu vei ira na turaga ni valu: sa laveta na nona moto ki na tamata e drau vakatolu, a sa mokuti ira kece e na dua ga na siga.

12A sa taravi koya ko Eliasari na luve i Toto na luve i Eoa, o koya sa dua vei iratou na lewe tolu eratou qaqa sara.

13Sa tiko vata kei Tavita ko koya o qo mai Pasi-tamimi, a ra sa soqoni vata maikea na kai Filisitia me ia nai valu, a sa dua maikina na loga ni parile; a sa dro ko ira na tamata e na matadra na kai Filisitia.

14A ra sa laʼki tu e na loma ni were ko ya, a ra sa vakabula, a ra sa mokuti ira na kai Filisitia; a sa kitaka ko Jiova na veivakabulai levu.

15A sa lako sobu na lewe tolu vei ira na lewe tolusagavulu na turaga ni valu kivei Tavita ki na Uluvatu, ki na qara vatu mai Etulami, a sa tiko na nodra mataivalu na kai Filisitia mai na buca ko Refeimi.

16A sa tiko ko Tavita o na koro kaukauwa e na veisiga ko ya; a sa tiko mai Pecileema e na gauna ko ya na nodrai valu na kai Filisitia.

17A sa garogaro ko Tavita, ka kaya, O cei mada me vagunuvi au e na wai mai na mata-ni-wai mai Pecileema, a ya mai na matamata-ni-koro!

18A sa basuka na nodra mataivalu na kai Filisitia ko iratou na lewe tolu o qo, ka takiva na wai mai na mata mai Pecileema, a ya mai na matamata-ni-koro, a ratou sa taura, ka kauta vei Tavita: a sa bese ni gunuva ko Tavita, a sa sovaraka ga vei Jiova,

19a sa kaya, E tabu sara, i noqu Kalou, meʼu kitaka na ka o qo: au na gunuva li na kedratou dra na tamata eratou a douvaka na mate? ni ratou a bolea na mate ni ratou a kauta mai: a sa bese ni gunuva ko koya. A veika o qo eratou sa cakava na lewe tolu sa qaqa sara.

20A sa liu ko Episai na taci i Yoapi vei iratou na lewe tolu: a sa laveta na nona moto vei ira na tamata e drau vakatolu, ka sa vakamatei ira: a sa tamata rogo vei iratou na lewe tolu.

21Eratou sa lewe tolu, a sa levu cake ko koya vei rau na lewe rua: ni sa nodrau turaga ko koya; ia ka sa sega ni tautauvata kei iratou na lewe tolu o qori.

22O Pinaya na luve i Yioyata, a luvena e dua na tamata qaqa mai Kapisieli ka cakava na ka levu eliu; sa mokuta ko koya e rua na tamata erau a vaka na laioni, erau kai Moapi: sa lako sobu talega ka mokuta e dua na laioni e na dua nai keli, e na gauna ni uca-vulavula:

23sa mokuta talega e dua na kai Ijipita, na tamata yagolevu, sa caga e tini na kena balavu; a sa tu e na liga ni kai Ijipita na moto sa vaka na kau ni tamata dautalitali; a sa lako sobu vua ko koya ni sa taura ga nai titoko, ka sa kaliraka na moto mai na liga ni kai Ijipita, ka vakamatei koya e na nona moto ga.

24A veika o qo sa cakava ko Pinaya na luve i Yioyata, a sa rogo ko koya vata kei iratou na lewe tolu na qaqa.

25Raica, sa vakarokorokotaki vakalevu vata kei ira na lewe tolusagavulu, a sa sega ni tautauvata kei iratou na lewe tolu o qori. A sa lesi koya ko Tavita me turaga ni mataivalu sa dauvakatawai koya tiko.

26O ira talega na tamata qaqa e na mataivalu, ko Asaeli na taci i Yoapi, ko Elanani na luve i Toto mai Pecileema,

27o Samoci na kai Eroti, ko Elesi na kai i Piloni,

28ko iratou na luve i Ikesi na kai Tikoa, ko Epieseri na kai Anacoci,

29ko Sipikei na luve i Usa, ko Ilai na luve i Eoi,

30ko Meerei na kai Nitofa, ko Elepi na luve i Peana na kai Nitofa,

31ko Itei na luve i Ripei mai Kipia sa nodra na luve i Penijamini, ko Pinaya na kai Piraconi,

32ko Urei mai na veiuciwai mai Keasi, ko Epieli na kai Arapa,

33ko Asimaveci na kai Peurimi, ko Eliyapa na kai Seelipimi,

34o iratou na luve i Yaseni na kai Kiso, ko Jonacani na luve i Sake, o koya mai na ulu-ni-vanua,

35ko Eiami na luve i Sakari, o koya mai na ulu-ni-vanua, ko Ilifali na luve i Uri,

36ko Eferi na kai Mikera, ko Eiiya na kai Piloni,

37ko Esirei na kai Karimeli, ko Neeri na luve i Esipei,

38ko Joeli na taci i Nacani, ko Mipari maivei ira na Akiri,

39ko Seleki na luve i Amoni, ko Neeri na kai Pieroci, o koya sa daucolata nai yaragi i Yoapi, na luve i Siruya,

40ko ira na luve i Yeceri, ko Karepi na luve i Yeceri,

41ko Uriya na luve i Eci, ko Sapati na luve i Alai,

42ko Etini na luve i Sisa, maivei ira na Rupeni, a nodra turaga ni valu na Rupeni, ka tolusagavulu vata kaya,

43ko Anani na luve i Meeka, kei Yiosafati na kai Micini,

44ko Usiya na kai Aseteroci, ko Sama, kei Yieli, o iratou na luve i Ocami na kai Eroeri,

45ko Yitioeli na luve i Simiri, kei Yoa na tacina, na kai Tisi,

46ko Ilieli na kai Meevimi, kei Yiripei, kei Yosaviya, eratou luve i Eiinoami, kei Icima na kai Moapi,

47ko Ilieli, kei Opeti, kei Yeesieli na kai Misopaya.