I. A Veika Sa Caka E Na Veigauna 10 - AI VOLA TABU（FIJ1864）

Sa vakamatei ko Saula, kei iratou na luvena.

1A SA kabai ira na Isireli ko ira na kai Filisitia; a sa dro tani ko ira na tamata Isireli e na matadra na kai Filisitia, ka ra sa bale ni ra sa moku mai na ulu-ni-vanua ko Kilipoa.

2A sa cicivi Saula kei iratou na luvena ko ira na kai Filisitia; ka ra sa mokuti Jonacani, kei Epinatapi, kei Malikisua, o iratou na luve i Saula, ko ira na kai Filisitia.

3A sa gumatua nai valu kivei Saula, a sa lauti koya ko ira na dauvavana, a sa vuetaki vei ira na dauvanavana.

4A sa kaya ko Saula vua sa daucolata na nonai yaragi, Ucuna na nomui seleiwau, ka cokaba-sikataki au kina, de sa lako mai ko ira na tawa cilivi o qo ka vakalialiai au. A sa bese ko koya sa daucolata na nonai yaragi; ni sa levu na nona rere. A sa taura nai seleiwau ko Saula, ka baleta.

5Ia ni sa raica ko koya sa daucolata na nonai yaragi ni sa mate ko Saula, sa baleta ko koya talega nai seleiwau, ka sa ciba.

6A sa mate ko Saula, kei na luvena toluto-lu, ia sa mate vata kecega na nona mataqali.

7Ia ni sa raica ko ira kecega na tamata Isireli era tiko e na buca, ni ra sa dro, a sa mate talega ko Saula kei iratou na luvena, era sa laiva na nodra veikoro, ka dro talega: a ra sa lako mai na kai Filisitia, ka tiko kina.

8Ia e na mataka, ni sa lako mai ko ira na kai Filisitia me luvata na nodra veisulu sa moku, era sa kunei Saula kei iratou na luvena, ni ratou sa bale e na ulu-ni-vanua ko Kilipoa.

9Ia ni ra a luvata na nona veisulu, era sa kauta tani na uluna, kei na nonai yaragi, a ra sa talaki ki na nodra veivanua na kai Filisitia me vakarogorogotaka ki na nodra veimatakau, vei ira talega na tamata.

10Ia na nonai yaragi era sa tokara e na nodra bure kalou, ka rubeca na uluna e na bure i Takoni.

11Ia ni sa rogoca ko ira kece na kai Yapesi-kiliati na ka kecega era sa kitaka vei Saula ko ira na kai Filisitia,

12era sa ia kecega na tamata qaqa, ka laʼki kauta tani ira yago i Saula, kei na yagodratou na luvena, ka kauta mai ki Yapesi, ka buluta na suidratou e na ruku ni oki mai Yapesi; a ra sa lolo ka bogi vitu.

13A sa mate ko Saula e na vuku ni nona caka cala sa kitaka ko koya vei Jiova, io, ki na vosa i Jiova, a ya sa sega ni vakabauta ko koya, e na vuku talega ni sa laʼki kere vakavuvuli vua na tamata sa tiko kaya na tevoro, ka me taroga;

14ka sa sega ni tarogi Jiova: a sa vakamatei koya kina ko koya, a sa vukica na matanitu kivei Tavita na luve i Isei.