II. Ai Kedrai Vola Na Tui 22 - AI VOLA TABU（FIJ1864）

Sa tui Juta ko Josia, ka sa caka dodonu; a sa kunei nai Vola e na vale ni Kalou.

1SA walu na yabaki i Josia ni sa mai tui, a sa tui tiko ko koya mai Jerusalemi ka yabaki tolusagavulu ka dua. Ia na yaca i tinana ko Yitita, na luve i Ataya na kai Posikaci.

2A sa caka dodonu ko koya e na mata i Jiova, ka muria nai valavala kecega i Tavita na nona qase, ka sega ni lako tani ki nai matau se nai mawi.

3Ia e na kenai katinikawalu ni yabaki i Josia na tui, sa talai Safoni ko na tui, o koya na luve i Esaliya, na luve i Misulami, o koya na dauvolavola, ki na vale i Jiova, ka kaya,

4Mo lako cake vei Ilikiya na bete levu, me na wilika ko koya na siliva sa daukauti ki na vale i Jiova, o qori sa kumuna vata maivei ira na tamata ko ira nai vakatawa ni katuba:

5ia me ra Solia ki na ligadra era kitaka na cakacaka, o ira sa lesi me lewa na vale i Jiova: ia me ra solia ko ira o qo ki na ligadra era cakacaka tiko e na vale i Jiova, me vakavouya na kabasu ni vale,

6vei ira na matai ni kau, kei ira era dautara vale, kei ira na matai ni vatu; me ra volia kina na kau kei na vatu sa ta, me vakaukauwataka kina na vale.

7Ia ka sa sega ni wili vei ira nai lavo sa soli ki na ligadra, ni ra sa caka vakayalododonu.

8A sa kaya ko Ilikiya na bete levu vei Safani na dauvolavola. Au sa kunea nai vola ni vunau e na vale i Jiova. A sa solia nai vola vei Safani ko Ilikiya, a sa wilika ko koya.

9A sa lako vua na tui ko Safani na dauvolavola, a sa tukutuku vua na tui, a sa kaya, Sa kumuna vata ko ira na nomu tamata nai lavo ka kune e na vale, a ra sa solia ki na ligadra era kitaka na cakacaka, o ira sa lesi me lewa na vale i Jiova.

10A sa tukuna vua na tui ko Safani na dauvolavola, a sa kaya, Sa solia vei au e dua nai vola ko Ilikiya na bete. A sa wilika ko Safani e na mata ni tui.

11Ia ni sa rogoca ko na tui na vosa ni vola ni vunau, sa dresulaka na nonai sulu.

12A sa vakaroti Ilikiya na bete ko na tui, kei Eiikami na luve i Safani, kei Akipori na luve i Mikaya, kei Safani na dauvolavola, kei Asaya, e dua na tamata sa dauqarava na tui, a sa kaya,

13Dou lako, dou taroga vei Jiova e na vukuqu, ka e na vukudra na tamata, ka e na vukudra kecega na Juta, na vosa ni vola o qo sa qai kune, ni sa ka levu na cudru i Jiova sa waqawaqa mai vei keda, e na vuku ni ra sa sega ni vakarorogo ki na vosa ni vola o qo ko ira na noda qase, me cakacaka me vaka na ka kecega sa volai kivei keda.

14A sa lako ko iratou ko Ilikiya na bete, kei Eiikami, kei Akipori, kei Safani, kei Asaya, kivei Ulita na parofita alewa, na wati i Salumi na luve i Tikiva, na luve i Ariasi, o koya sa daumaroroya nai sulu; (ia sa tiko ko koya mai Jerusalemi, e na kenai karua ni yasana,) a ratou sa veivosaki kaya.

15A sa kaya vei iratou ko koya, Sa vosa vakaoqo ko Jiova na nodra Kalou na Isireli, Dou kaya vua na tamata sa talai kemudou mai vei au,

16Sa vosa vakaoqo ko Jiova, Raica, kaʼu sa vakayacora na ca ki na tikina o qo, ka vei ira na lewena, io na vosa kecega ni vola sa wilika oti ko tui Juta:

17e navuku ni ra sa biuti au, ka sa vakacaudreva na ka boi vinaka ki na kalou tani e so me vakacudrui au kina e na cakacaka kecega ni ligadra; o koya ena waqawaqa kina na noqu cudru ki na tikina o qo, ka na sega ni boko.

18Ia dou kaya vua na tui Juta, o koya ka talai kemudou me tarogi Jiova, Sa vosa vakaoqo ko Jiova na nodra Kalou na Isireli, Na vosa ko sa rogoca;

19E na vuku ni sa malumalumu na yalomu, ka ko sa vakamalumalumutaki iko e na mata i Jiova, ni ko a rogoca na ka kaʼu a vosataka e na vuku ni, tikina o qo, ka e na vukudra era tiko kina, ka me ra vakarusai, ka rukaki, ni ko sa dresulaka talega na nomui sulu, ka tagi e mataqu; sa vakarorogo koi au talega, sa kaya ko Jiova:

20raica, e na vuku ni ka o qo, au na vakasoqoni iko kina vei ira na nomu qase, ia ko na soqoni vakacegu ki na nomui bulubulu; ia ena sega ni raica ko na matamu na ka ca kecega kaʼu sa vakayacora ki na tikina o qo. A ratou sa laʼki vakalesuya na vosa vei koya na tui.