II. Ai Kedrai Vola Na Tui 23 - AI VOLA TABU（FIJ1864）

Sa wilika ko Josia vei ira na lewe vuqa nai vola ka kune ka tarova na ca e vuqa e na nona vanua, 1-30. Sa taravi koya ko Yioaasi, 31-35. Sa qai tui ko Yioyakimi, 36, 37.

1A SA talaki ko na tui, a sa soqoni vata vua ko ira kecega na qase ni Juta kei Jerusalemi.

2A sa lako cake ki na vale i Jiova ko na tui, kei ira vata kaya na Juta kecega kei ira kecega na kai Jerusalemi; kei ira na bete, kei ira na parofita, kei ira kecega na tamata, ko ira na kaisi kei ira na turaga: a sa wilika e daligadra na vosa kecega ni vola ni veiyalayalati, a ya sa kune e na vale i Jiova.

3A sa tu na tui e na dela ni tutu, ka kitaka na veiyalayalati e na mata i Jiova, ni ra na muri Jiova, ka vakabauta na nona veivakaro, kei na nona vunau, kei na nona veilesilesi, e na lomadra taucoko, kei na yalodra taucoko, ni ra na vakataudeitaka talega na vosa ni veiyalayalati o qo, a ya sa volai e nai vola o qo. A sa vakadinadinataka na veiyalayalati ko ira kecega na tamata.

4A sa vakaroti Ilikiya na bete levu, kei ira na bete lalai, kei ira era vakatawa na katuba, ko na tui, me ra kauta tani mai na vale i Jiova nai yaya kecega sa caka me nei Peali, kei na kaloualewa ni veikau, kei na kalokalo kecega ni lomalagi: a sa vakama mai nai bili mai Jerusalemi e na veiwere mai Kitironi, a sa kauta na kena dravusa ki Peceli.

5A sa vakaoti ira na bete; vakatevoro ko koya, o ira ka ra lesia na tui Juta me vakacaudreva na ka boi vinaka e na veitikina cecere e na Veikoro ni Juta, kei na veivanua sa voliti Jerusalemi; o ira talega era vakacaudreva na ka boi vinaka vei Peali, ki na mata-ni-siga, kei na vula, kei na kalokalo daulako, kei na kalokalo kecega ni lomalagi.

6A sa kauta tani na kaloualewa ni veikau mai na vale i Jiova, ki taudaku i Jerusalemi, ki na uciwai ko Kitironi, ka vakama mai na uciwai ko Kitironi, ka vurumemea me tauvata kei na kuvu-ni-qele, ka biuta na kena kuvu ki na dela ni nodrai bulubulu na luvedra na lewe ni vanua.

7A sa basuraka sobu na nodra veivale era valavala vaka-Sotoma, o qori sa tu mai na vale i Jiova, ka sa talia maikina ko ira na alewa na gatu e so ki na kaloualewa ni veikau.

8A sa kauta tani ko koya na bete kecega mai na veikoro e Juta, ka vaqeleqeleataka na veitikina cecere era a vakacaudreva kina na ka boi vinaka ko ira na bete, mai Kepa ka yaco ki Pieri-sepa, ka basuraka sobu na veitikina cecere mai na matamata-ni-koro sa tu mai nai curucuru ki na matamata-ni-koro nei Josua, na turaga sa lewa na koro, o qori sa tu ki nai mawi mai na matamata-ni-koro.

9Ia sa sega ni lako cake ko ira na bete ni veitikina cecere ki nai cabocabo-ni-soro i Jiova mai Jerusalemi, a ra sa kania ga na madrai sa tawa vakaleveni e na kedra maliwa na wekadra.

10Asa vaqeleqeleataki Tofeci ko koya, a ya mai na nodra buca na luve i Inomi, me kakua kina na tamata me cakava na luvena tagane se na luvena alewa me lako e loma ni buka waqa e na vuku i Moloki.

11A sa kauta tani na veiose ka ra vakacabora ki na mata-ni-siga ko ira na tui Juta, a ya mai nai curucuru ki na vale i Jiova, ka voleka ki na vale i Nacani-meleki na matanivanua, a ya mai nai bili, a sa vakama e na buka na veivale-vodoki sa cabo ki na mata-ni-siga.

12Kei na veicabocabo-ni-soro sa tu mai na dela ni tiki-ni-vale ecake i Aasi, a ya era a cakava na tui Juta, kei na veicabocabo-ni-soro ka cakava ko Manase e na rara vakabai ruarua ni vale i Jiova, sa basuraka sobu ko na tui, ka talaraka sobu maikea, ka biuta na kedra kuvu ki na uciwai ko Kitironi.

13Ia sa vaqeleqeleataka ko na tui na veitikina cecere sa tu e na mata i Jerusalemi, mai nai matau ni ulu-ni-vanua ni vuca, a ya ka cakava ko Solomoni na tui Isireli vei Asetoreci, na nodra ka vakasisila na kai Saitoni, vei Kimosi talega, na nodra ka vakasisila na Moapi, kei Milikomi, na nodra ka vakasisila na luve i Amoni.

14A sa musumusuka ko koya na veimatakau, ka taya sobu na veikaloualewa ni veikau, ka vakasinaita na nodra tikina e na sui ni tamata.

15Ia nai cabocabo-ni-soro talega mai Peceli, kei na tikina cecere ka cakava ko Yaropiami na luve i Nipati, o koya ka vakaivalavalacataki ira na Isireli, io nai cabocabo-ni-soro ko ya, kei na tikina cecere, sa basuraka sobu ko koya, ka vakama na tikina cecere, ka vurumemea me kuvu-ni-qele, ka vakama na kaloualewa ni veikau.

16A sa vuki ko Josia, ka kunea na veibulubulu sa tiko maikea mai na ulu-ni-vanua, a sa talaki ko koya, ka kauta mai na sui mai na veibulubulu, ka vakama e na dela ni cabocabo-ni-soro, ka vaqeleqeleataka, me vaka na vosa i Jiova ka tukuna ko na tamata ni Kalou, o koya ka tukuna eliu na veika o qo.

17A sa kaya ko koya, Ai bulubulu cava o qori kaʼu sa raica? A sa kaya vua ko ira na lewe ni koro, Nai bulubulu ni tamata ni Kalou, o koya ka lako mai Juta, ka tukuna na veika o qo ko sa qai cakava ki nai cabocabo-ni-soro mai Peceli.

18A sa kaya ko koya, Dou laiva ga; me kakua na tamata me yavalata na suina. A ra sa laiva na suina, kei na suina na parofita ka lako mai Samaria.

19A sa biuta tani ko Josia na veivale kece talega ni veitikina cecere e na veikoro mai Samaria, a ya ka cakava ko ira na tui Isireli me ra cudruvi kina, a sa cakacaka vei ira me vaka na cakacaka kecega ka kitaka mai Peceli.

20A sa vakamatei ira kecega na bete ni veitikina cecere, ka tiko maikea, e na dela ni veicabocabo-ni-soro, ka vakama e deladra na sui ni tamata, a sa lesu tale ki Jerusalemi.

21A sa vakaroti ira na tamata kecega ko na tui, ka kaya, Dou ia na solevu ni lakovi via vei Jiova na nomudou Kalou, me vaka ni sa volai e nai vola ni veiyalayalati o qo.

22Sa sega vakaidina ni caka e dua na solevu ni lako-sivia me vakaoqo mai na nodra gauna na dauveilewai ka ra lewai ira na Isireli, se e nodra gauna kecega na tui Isireli, se na tui Juta;

23ia ka sa caka e Jerusalemi na solevu o qo ni lako-sivia e na kenai katinikawalu ni yabaki i Josia na tui.

24Ia ko ira sa daucurumi, kei ira era sa dauveinita, kei na veimatakau, kei na veika vakasisila era sa soro kina, kei na ka vakasisila kecega sa kune e na vanua nei Juta kei Jerusalemi, sa kauta tani ko Josia, me vakataudeitaka kina na vosa ni vunau sa volai e nai vola sa kunea ko Ilikiya na bete e na vale i Jiova.

25A sa sega e dua na tui ka bula eliu vei koya sa tauvata kaya, me saumaki vei Jiova e lomana taucoko, kei na yalona taucoko, kei na nona kaukauwa kece, me vaka na vunau taucoko i Mosese; a sa sega ni tubu e dua emuri me tautauvata kaya.

26Ia ka sa sega ni saumaki ko Jiova mai na katakata ni nona cudru levu sa waqawaqa kina na nona cudru vei ira na Juta, e na vuku ni veivakacudrui kecega ka vakacudrui koya kina ko Manase.

27A sa kaya ko Jiova, Au na kauti ira na Juta tani talega mai na mataqu, me vaka ni kaʼu a kauti ira na Isireli tani, ka biuta na koro o qo ko Jerusalemi, a ya kaʼu a digitaka, kei na vale kaʼu a kaya kina, Ena tiko maikina na yacaqu.

28Ia na vo ni cakacaka i Josia, kei na ka kecega sa kitaka ko koya, sa sega li ni volai e nai vola ni veika sa caka e na nodra gauna na tui Juta?

29E na nona gauna sa lako cake ko Fero-niko na tui Ijipita, me veivala kei tui Asiria mai na uciwai ko Uferetisi: asa laʼki tavaki koya ko Josia na tui; ia ni sa raici koya, sa vakamatei koya mai Mikito.

30A sa vakavodoki koya mai Mikito ko iratou na nona tamata ni sa mate, ka kauta ki Jerusalemi, ka buluta e na nonai bulubulu. Ia era sa kauti Yioaasi na luve i Josia, ka lumuti koya, ko ira na lewe ni vanua, ka buli koya me tui, mei sosomi i tamana.

31SA ruasagavulu ka tolu na yabaki i Yioaasi ni sa mai tui, a sa tui tiko mai Jerusalemi ka vula tolu. Ia na yaca i tinana ko Emutali, na luve i Yirimia mai Lipina.

32A sa caka ca ko koya e na mata i Jiova, me vaka na ka kecega ka cakava ko ira na nona qase.

33A sa vesuki koya ko Fero-niko mai Ripila, e na vanua ko Emaci, ka me kakua ni tui tiko mai Jerusalemi; ka lesia e na vanua nai vakacavacava ni drau na taledi siliva, ka dua na taledi koula.

34A sa buli Eliyakimi na luve i Josia ko Fero-niko me tui, mei sosomi kei Josia na tamana, ka vukica na yacana me Yioyakimi, ka kauti Yioaasi tani: a sa lako ko koya ki Ijipita, ka mate maikina.

35A sa solia na siliva kei na koula vei Fero ko Yioyakimi; ia ka sa lavaka ki na vanua nai vakacavacava, me solia nai lavo me vaka na vosa i Fero: sa lavaka ko koya na siliva kei na koula vei ira na lewe ni vanua, me vaka era dui rawata, me solia kina vei Fero-niko.

36Sa ruasagavulu ka lima na yabaki i Yioyakimi ni sa mai tui, a sa tui tiko mai Jerusalemi ka yabaki tinikadua. Ia na yaca ni tinana ko Siputa, na luve i Pitaya na kai Ruma.

37A sa caka ca ko koya e na mata i Jiova, me vaka na ka kecega ka cakava ko ira na nona qase.