II. Ai Kedrai Vola Na Tui 21 - AI VOLA TABU（FIJ1864）

Sa tui Juta ko Manase, a sa uasivi e nai valavala ca, 1-18; a sa tarava ko Amoni, 19-26.

1SA tinikarua na yabaki i Manase ni sa mai tui, a sa tui tiko mai Jerusalemi ka yabaki limasagavulu ka lima. Ia na yaca i tinana ko Efisi-pa.

2A sa caka ca ko koya e na mata i Jiova, me vaka na nodra ka vakasisila na veimatanitu ka vakaseva tani ko Jiova e na matadra na luve i Isireli.

3A sa tara tale na veitikina cecere ka vakacacana ko Isikiya na tamana; a sa cakava e so nai cabocabo-ni-soro vei Peali, ka cakava e dua na kaloualewa ni veikau, me vaka ka kitaka ko Eapi na tui Isireli, ka soro ki na kalokalo kecega ni lomalagi, ka qarava.

4A sa cakava e so nai cabocabo-ni-soro e na vale i Jiova, o qori sa kaya kina ko Jiova, Au na vakatikora na yacaqu mai Jerusalemi.

5A sa cakava ko koya e so nai cabocabo-ni-soro e na vuku ni kalokalo kecega ni lomalagi e na loma ni rara vakabai ruarua mai na vale i Jiova.

6A sa cakava na luvena me lako e loma ni buka waqa, a sa parofisai e na o, ka parofisai e na gata, ka ia na nodrai valavala era sa curumi kei ira era sa dauveinita: sa kitaka ko koya nai valavala ca e vuqa e na mata i Jiova, me vakacudruya.

7A sa vakatikora na matakau ni kaloualewa ni veikau sa cakava ko koya, e na vale ka vosa kina ko Jiova vei Tavita kei Solomoni na luvena, E na vale o qo, kei Jerusalemi, a ya kaʼu a digitaka mai na nodra veiyavusa kecega na Isireli, kaʼu na vakatikora na yacaqu, ka tawa mudu:

8ia kaʼu na sega ni vakasesea tale na yavadra na Isireli mai na vanua kaʼu a solia vei ira na nodra qase; ia kevaka era sa vakabauta me cakava na ka kecega kaʼu a vakarota vei ira, kei nai vakaro kecega ka vakarota vei ira ko Mosese na noqui talatala.

9A ra sa sega ga ni vakarorogo: a sa vakasesei ira ko Manase me cakava na ka ca levu, ka lailai na ka ca era a cakava na veimatanitu ka vakarusa ko Jiova e matadra na luve i Isireli.

10A sa vosa ko Jiova e na gusudra na nonai talatala na parofita, ka kaya,

11E na vuku ni sa cakava ko Manase na tui Juta na veika vakasisila o qo, ka cakava na ka ca e levu, ka lailai na ka ca kecega sa cakava ko ira na Amori ka tiko eliu vei koya, a sa vakaivalavalacataki ira na Juta talega e na nodra veimatakau:

12e na vuku ni ka o qo, sa kaya ko Jiova na nodra Kalou na Isireli, Raica, kaʼu sa vakayacora na ca ki Jerusalemi kei ira na Juta, ena qasianiuniu kina na daligana ruarua na tamata yadua sa rogoca:

13ia kaʼu na vakarauti Jerusalemi e nai vakarau i Samaria, kei nai vakadodonu ni mataqali i Eapi: ia kaʼu na qusi Jerusalemi, me vaka sa qusia na bilo e dua, ni sa qusia ka viria vakatobocu.

14Ia kaʼu na biuta na kena vo ni noqui votavota, ka soli ira ki na ligadra na nodra meca; me ra vakacacani, ka vakabobulataki vei ira na nodra meca;

15e na vuku ni ra sa caka ca e mataqu, ka vakacudrutaki au, mai na siga ka lako maikina ko ira na nodra qase mai Ijipita, ka yacova na siga o qo.

16A sa vakadavea talega na dra ni tamata tawa cala e lewe vuqa sara ko Manase, ka me sinai mada kina ko Jerusalemi e na veiyasana kecega; mei kuri ni nonai valavala ca sa vakaivalavalacataki ira kina na Juta, me ra caka ca e na mata i Jiova.

17Ia na vo ni cakacaka i Manase, kei na ka kecega sa cakava ko koya, kei na nonai valavala ca sa kitaka ko koya, sa sega li ni volai e nai vola ni veika sa caka e na nodra gauna na tui Juta?

18A sa moce vata kei ira na nona qase ko Manase, a sa buluti e na were mai na nona vale, io e na were i Usa: a sa tui ko Amoni na luvena, me kenai sosomi.

19SA ruasagavulu ka rua na yabaki i Amoni ni sa mai tui, a sa tui tiko mai Jerusalemi ka yabaki rua. Ia na yaca i tinana ko Mesulemeci, na luve i Arusi na kai Yotipa.

20A sa caka ca ko koya e na mata i Jiova, me vaka ka cakava ko Manase na tamana.

21A sa lako e na sala kecega ka lako kina ko tamana, a sa qarava na veimatakau ka qarava ko tamana, a sa soro vei ira:

22a sa biuti Jiova na nodra Kalou na nona qase, ka sega ni lako e na sala i Jiova.

23A ra sa buki kena vere ko ira na tamata i Amoni, a ra sa vakamatea na tui e nona vale.

24A sa vakamatei ira kecega era a bukia na kena vere ko Amoni na tui ko ira na lewe ni vanua: sa buli Josia na luvena me tui ko ira na lewe ni vanua, me kenai sosomi.

25Ia na vo ni cakacaka i Amoni sa kitaka ko koya, sa sega li ni volai e nai vola ni veika sa caka e na nodra gauna na tui Juta?

26A sa buluti ko koya e nonai bulubulu e na were i Usa: a sa tui ko Josia na luvena, me kenai sosomi.