II. Ai Kedrai Vola Na Tui 20 - AI VOLA TABU（FIJ1864）

Sa tauvi mate ko Isikiya, a sa vakabulai ni sa masu, 1-11. Sa vakaraitaka ko koya na nona veika vei ira ka lako mai Papiloni, 12, 13: sa qai tukuna ko Isaia na veivakabobulataki ki Papiloni, 14-19. Sa mate ko Isikiya, 21.

1E NA veisiga ko ya sa tauvi mate ko Isikiya me laʼki ciba kina. A sa lako mai vua ko Isaia na parofita, na luve i Amosi, a sa kaya vua, Sa vosa vakaoqo ko Jiova, Mo vakaroti ira na nomu lewe-ni-vale; ni ko na mate, ka sega ni bula.

2Sa qai goleva na lalaga ko koya, ka masu vei Jiova, a sa kaya,

3Au masuti iko, i Jiova, mo nanuma mada na noqu lako voli e matamu e na yalodina kei na yalo e dua bau, kei na noqu caka vinaka e matamu. A sa tagi vakalevu ko Isikiya.

4Ia ni sa curu yani ko Isaia ka sega ni yaco ki na loma ni koro, sa yaco vua na vosa i Jiova, ka kaya,

5Mo lesu tale, ka kaya vei Isikiya na nodra turaga na noqu tamata, Sa vosa vakaoqo ko Jiova na Kalou i Tavita na nomu qase: Au sa rogoca na nomu masu, au sa raica na wai ni matamu: raica, kaʼu na vakabulai iko: e na kenai katolu ni siga ko na lako cake ki na vale i Jiova:

6ia kaʼu na vakaikuritaka na nomu siga e na yabaki e tinikalima; ia kaʼu na vakabulai iko kei na koro o qo mai na ligana na tui Asiria; ia kaʼu na vakatawa na koro o qo e na vukuqu, ka e na vuku i Tavita na noqui talatala.

7A sa kaya ko Isaia, Taura e dua nai buli lolo. A ra sa taura ka buluta kina na mata ni bo, a sa bula ko koya.

8A sa kaya vei Isaia ko Isikiya, A cava na kenai vakadinadina ni na vakabulai au ko Jiova, niʼu na lako cake talega ki na vale i Jiova e na kenai katolu ni siga?

9A sa kaya ko Isaia, O qo nai vakadinadina vei iko maivei Jiova, ni na cakava ko Jiova na ka sa vosataka ko koya: me bau lako kiliu na yaloyalo ka tini na tikina, se suka kimuri e tini na tikina?

10A sa kaya ko Isikiya, A ka walega me lako sobu na yaloyalo e na tikina e tini: me kakua, me lesu ga kimuri na yaloyalo e na tikina e tini.

11A sa kaci vei Jiova ko Isaia na parofita: a sa vakasuka kimuri ko koya na yaloyalo e na tikina e tini, o qori sa lako sobu kina e nai vakatakilakila ni mata-ni-siga nei Aasi.

12E na gauna ko ya sa vakauta nai vola kei na ka-ni-loloma vei Isikiya ko na tui Papiloni, ko Pirotaki-paletani, na luve i Paletani; ni sa rogoca ni ka tauvi mate ko Isikiya.

13A sa vakarorogo vei ira ko Isikiya, ka vakatakila kecega vei ira na vale ni nona ka talei, na siliva, kei na koula, kei na ka boi vinaka, kei na waiwai vinaka, kei na vale taucoko ni nonai yaragi, kei na ka kecega sa tu e na nona yau: sa sega e dua na ka e nona vale, kei na nona matanitu taucoko, sa sega ni vakatakila vei ira ko Isikiya.

14Sa qai lako ko Isaia na parofita vei Isikiya na tui, a sa kaya vua, A cava sa kaya ko ira na tamata o qo? a ra sa lako maivei kivei iko? A sa kaya ko Isikiya, Era sa lako mai na vanua vakayawa, io mai Papiloni.

15A sa kaya ko koya, A cava era sa kunea e na nomu vale? A sa kaya ko Isikiya, Na ka kecega e noqu vale era sa kunea: sa sega na ka e na noqu yau kaʼu sa sega ni vakatakila vei ira.

16A sa kaya vei Isikiya ko Isaia, Mo rogoca na vosa i Jiova:

17Kaica, sa lako mai na gauna ena kauti tani kina ki Papiloni na ka kecega sa tu e nomu vale, kei na ka era sa binia na nomu qase ka yacova na siga o qo: ena sega ni vo e dua na ka, sa kaya ko Jiova:

18ia era na kauti tani ko ira na luvemu era na lako maivei iko, ko ira ko na vakasikava; a ra nai talatala e na nona vale vakaturaga na tui Papiloni.

19A sa kaya vei Isaia ko Isikiya, Sa vinaka na vosa i Jiova ko sa vosataka. Sa kaya talega, Sa na sega li na sautu kei na ka dina e na noqu gauna?

20Ia na vo ni cakacaka i Isikiya, kei na nona kaukauwa kecega, kei na nona cakava na drano, kei nai salisali ni wai, sa vakasalia kina na wai ki na koro, sa sega li ni volai e nai vola ni veika sa caka e na nodra gauna na tui Juta?

21A sa moce vata kei ira na nona qase ko Isikiya: a sa tui ko Manase na luvena, me kenai sosomi.