II. Ai Kedrai Vola Na Tui 19 - AI VOLA TABU（FIJ1864）

Sa vakararavi ko Isikiya vei Jiova, a sa vakabulai ko Jerusalemi; a sa yaviti ira na kai Asiria ko na agilose i Jiova.

1IA ni sa rogoca ko Isikiya na tui, sa dresulaka na nonai sulu, ka ubi koya e nai sulu ca, ka laʼki curu ki na vale i Jiova.

2A sa talai Eliyakimi, o koya ka lewa na vale, kei Sepina na dauvolavola, kei ira era qase vei ira na bete ni ra sa vakaisulu e nai sulu ca, kivei Isaia na parofita na luve i Amosi.

3A ratou sa kaya vua, Sa vosa vakaoqo ko Isikiya, Sa siga ni veivakararawataki, ni veivunauci talega, kei na veivosavakacacataki, na siga o qo; ni sa voleka ni sucu na gone, ka sega na kaukauwa me ra vakasucumi kina:

4ena rogoca beka ko Jiova na nomu Kalou na vosa kecega i Rapisake, o koya sa tala mai ko tui Asiria na nona turaga, me vosavakacacataka na Kalou bula; ia ena vunauca na vosa sa rogoca ko Jiova na nomu Kalou: o koya mo qai cavuta na masu e na vukudra na lewe lailai sa vo tiko.

5A sa lako vei Isaia ko iratou nai talatala i Isikiya na tui.

6A sa kaya vei iratou ko Isaia, Dou vosa vakaoqo vua na nomudou turaga, Sa vosa vakaoqo ko Jiova, Mo kakua ni rere e na vuku ni vosa ko sa rogoca, a ya eratou sa vosavakacacataki au kina ko iratou na nona tamata na tui Asiria.

7Raica, kaʼu na liwari koya e na cagi, ia ena rogoca ko koya e dua nai rogo, ka lesu yani ki na nona vanua; ia kaʼu na vakabalei koya e nai seleiwau e na nona vanua.

8A sa lesu yani ko Rapisake, a sa kunei tui Asiria ni sa vala kei Lipina, ni sa rogoca eliu ko koya ni sa lako tani mai Lakisi.

9A sa rogoca ko koya e na vuku i Tiraka, na tui Kusi, ka vaka, Raica, sa mai veivala kei iko ko koya; sa qai tala tale e so nai talatala vei Isikiya, ka kaya,

10Dou vosa vakaoqo vei Isikiya na tui Juta, ka kaya, Me kakua ni vakaisini iko na nomu Kalou, o koya ko sa vakararavi kina, ni sa kaya, Ena sega ni soli ko Jerusalemi ki na liga i tui Asiria.

11Raica, ko sa rogoca oti na ka era sa cakava na tui Asiria ki na veivanua kecega, ni sa vakarusai ira sara: ia ko na vakabulai beka ko iko?

12Era sa Vakabula li na veivanua ka vakarusa ko iratou na noqu qase ko ira na nodra kalou? io, ko Kosani, kei Arani, kei Resefi, kei ira na luve i Iteni era tiko mai Tilasari?

13sa evei ko tui Emaci, kei tui Aripati, kei na tui ni koro ko Sifariveimi, kei Ena, kei Iva?

14A sa taura nai vola ko Isikiya mai na ligadratou nai talatala, ka wilika: a sa lako cake ko Isikiya ki na vale i Jiova, a sa tevuka e na mata i Jiova.

15A sa masu ko Isikiya e na mata i Jiova, a sa kaya, I Jiova na nodra Kalou na Isireli, o koya sa tiko e na tadrua ni jerupi, o iko vakai iko ga sa Kalou ni veimatanitu kecega e vuravura; o iko sa cakava na lomalagi kei na vuravura:

16i Jiova, mo vakalakalataka na daligamu, ka vakarorogo: i Jiova, mo vakayadrata na matamu, ka raica; ka rogoca na vosa i Sanikeripi, o koya sa talai koya me vosavakacacataka na Kalou bula.

17E dina, i Jiova, ko iratou na tui Asiria, eratou sa vakarusa na lewe ni veivanua kei na nodra vanua,

18a ratou sa biuta ki na buka waqa na nodra veikalou: ni ra sa sega ni Kalou, a ra sa cakacaka walega ni liga ni tamata, na kau kei na vatu: ia eratou sa vakarusai ira kina:

19ia o qo, Jiova na neimami Kalou, mo vakabulai keimami mada mai na ligana, me kila kina na veimatanitu kecega e vuravura ni sa ko Jiova na Kalou ko iko duaduaga.

20A sa talaki vei Isikiya ko Isaia na luve i Amosi, ka kaya, Sa vosa vakaoqo ko Jiova na nodra Kalou na Isireli, Na ka ko sa masu kina vei au e na vuku i Sanikeripi i na tui Asiria, kaʼu a rogoca.

21O qo na vosa sa vosataka e na vukuna ko Jiova, Sa beci iko ko Saioni, a ya sa tawa vakamalumalumutaki: sa dredrevaki iko; sa kurea na uluna vei iko na koro ko Jerusalemi!

22Ko sa vosavakacacataki cei, ka vakacacataka? ia vei cei beka ko sa tabalaka na domomu, ka ta cake na matamu? vei koya ga na Yalosavasava e Isireli.

23O sa vakacacana na Turaga vei ira na nomui talatala, a sa kaya, Au sa cabecabe e na noqu vale-vodoki e vuqa ki na kena cecere ni veiulu-ni-vanua, ki na veiyasa i Lipanoni, ia kaʼu na taya sobu na kena veisitari cecere; na kena veipaini talei: ia kaʼu na curuma na koro kaukauwa mai na nonai yalayala, kei na veikau ni nona Karimeli.

24Au sa kelia ka gunuva na wai tani, ka vakamamacataka e na qeteqete ni yavaqu na uciwai kecega ni Ijipita.

25O sa sega beka ni rogoca niʼu a cakava makawa, au a tulia talega eliu sara? o qo, au sa vakayacora, mo yaco kina mo cakava me bukebuke walega na veikoro kaukauwa.

26O koya sa ra malumalumu kina na lewena, era sa waicala ka rerere; era sa vaka na co ni vanua, kei na co karakarawa sa qai rovu, na co mai na dela ni vale, kei na sila sa malai ni sa sega ni tubu.

27Ia kaʼu sa kila na nomu tiko, kei na nomu curu kituba, kei na nomu curu kiloma, kei na nomu cudru levu vei au.

28E na vuku ni sa lako cake ki daligaqu na nomu cudru vei au kei na nomu: viavialevu, kaʼu na qai nauta na ucumu e na noqui qila, ka ciqira na noqui tubetube e na gusumu, ia kaʼu na saumaki iko yani e na sala ko a lako mai kina.

29Ia vei iko, o qo na kenai vakadinadina, Dou na kania e na yabaki o qo na ka sa tubu walega, kei na kenai karua ni yabaki na ka sa tubu walega maikina; ia e na kenai katolu ni yabaki dou kaburaka, ka tamusuka, ka tea na veivaini, ka kania na vuana.

30Ia ena ti sobu tale na kena vo ni mataqali i Juta, ka vua kicake.

31Ni na lako tani mai Jerusalemi na kena vo, kei ira era dro bula mai na ulu-ni-vanua ko Saioni: ena kitaka na ka o qo na yalogumatua i Jiova ni lewe vuqa.

32O koya sa kaya vakaoqo ko Jiova e na vuku i tui Asiria, Ena sega ni curu mai ki na koro o qo, se vanataka kina e dua na gasau, se mai tu kina vakasasabai, se viri suva kina:

33e na sala sa lako mai kina, o qori ena lesu tale kina, ka sega ni curu ki na koro o qo, sa kaya ko Jiova:

34ia kaʼu na vakatawa na koro o qo, ka Vakabula, e na vukuqu, ka e na vuku i Tavita na noqui talatala.

35Ia e na bogi ko ya, sa lako yani na agilose i Jiova, ka mokuta e na nodrai tikotiko ni valu na kai Asiria e oba vakatinikawalu ka lima na udolu: ia ni ra sa sou e na sabogibogi, raica, era sa mate koto kecega.

36A sa lesu tani ko Sanikeripi na tui Asiria, ka laʼki lesu, ka tiko mai Ninive.

37Ia ni sa soro tiko ko koya e na sava i Nisiroki na nona Kalou, erau sa mokuti koya e nai seleiwau, koi rau na luvena ko Etirameleki, kei Sareseri: a rau sa dro bula ki na vanua ko Arimenia. A sa tui ko Esari-atoni na luvena, me kenai sosomi.