II. Ai Kedrai Vola Na Tui 18 - AI VOLA TABU（FIJ1864）

Sa tui Juta ko Isikiya, a sa valavala vinaka: sa kabai Jerusalemi ko ira na kai Asiria.

1IA e na kenai katolu ni yabaki i Osea na tui Isireli, na luve i Ela, sa mai tui ko Isikiya na luve i Aasi na tui Juta.

2E ruasagavulu ka lima na nona yabaki ni sa i mai tui; a sa tui tiko mai Jerusalemi ka yabaki ruasagavulu ka ciwa. Ia na yaca i tinana ko Epi, na luve i Sakaria.

3A sa caka dodonu e na mata i Jiova, me vaka na ka kecega ka cakava ko Tavita na tamana.

4Sa biuta tani ko koya na veitikina cecere, ka musumusuka na veimatakau, ka taya sobu na kaloualewa ni veikau, ka vorolaka na gata parasa ka cakava ko Mosese: e na vuku ni ra sa vakacaudreva kina na ka boi vinaka e na gauna ko ya: a sa vakayacana ko Niusitani ko koya.

5Sa vakararavi ko koya vei Jiova na nodra Kalou na Isireli, ka sega e dua e muri koya me tautauvata kaya vei ira kecega na tui Juta, se dua sa bula eliu vei koya.

6A sa kabiti Jiova ko koya; sa sega ni lako tani me kakua ni muri koya tiko, a sa vakabauta na nona veivakaro, a ya ka vakarota ko Jiova vei Mosese.

7A sa tiko kaya ko Jiova; sa tamata yaco ko koya e na yasana kecega sa lako kina: a sa talaidredre ko koya vua na tui Asiria, ka sega ni qaravi koya.

8Sa mokuti ira na kai Filisitia ko koya, ka yaco ki Kesa, kei na kena veiyasana, mai na nodra vale cecere nai vakatawa ka yacova na koro kaukauwa.

9Ia e na kenai kava ni yabaki i Isikiya na tui, a ya na kenai kavitu ni yabaki i Osea na tui Isireli, na luve i Ela, sa lako cake mai ki Samaria ko Salimaneseri na tui Asiria, ka buku na kena druadrua.

10A sa oti na yabaki e tolu sa qai rawa, io, e na kenai kaono ni yabaki i Isikiya, a ya na kenai kaciwa ni yabaki i Osea na tui Isireli, sa qai rawa ko Samaria.

11A sa kauti ira na Isireli tani ki Asiria ko tui Asiria, ka vakatikori ira mai Ela, ka mai Apori, na uciwai mai Kosani, kei na nodra veikoro na kai Mitia:

12e na vuku ni ra sa sega ni vakarorogo ki na domo i Jiova na nodra Kalou, ka vakacataka na nona veiyalayalati, io na ka kecega sa vakarota ko Mosese nai talatala i Jiova, ka sega ni via rogoca se cakava.

13Ia e na kenai katinikava ni yabaki i Isikiya na tui, sa qai lako cake ki na Veikoro kaukauwa kecega nei Juta ko Sanikeripi na tui Asiria, a sa rawai ira.

14A sa talaki vei tui Asiria ki Lakisi ko Isikiya na tui Juta, a sa kaya, Au sa valavala ca; mo lesu tani vei au: a ka ko sa lesia vei au kaʼu na cakava. A sa lesia vei Isikiya na tui Juta ko tui Asiria e tolu na drau na taledi siliva, ka tolusagavulu na taledi koula.

15A sa solia vua ko Isikiya na siliva kecega sa kune e na vale i Jiova, kei na yau ni vale ni tui.

16E na gauna ko ya sa drutia ko Isikiya na koula mai nai sogo ni katuba ni vale ni soro i Jiova, mai na duru talega, a ya ka botana ko Isikiya na tui Juta, a sa solia vei tui Asiria.

17A sa tala ko tui Asiria e dua nai valu levu vata kei Taritani, kei Rapisarisi, kei Rapisake, mai Lakisi ki Jerusalemi, kivei Isikiya na tui. A ra sa lako cake, ka yaco ki Jerusalemi. Ia ni ra sa lako cake, era sa laʼki tu voleka ki nai salisali ni drano ecake, a ya sa koto mai na salatu e na vanua ni dausavai sulu.

18A ratou sa kaciva na tui, a sa lako yani vei iratou ko Eliyakimi na luve i Ilikiya, o koya sa lewa na vale, kei Sepina na tamata dauvolavola, kei Yoa na luve i Asafi na tamata sa dauvola na ka ni matanitu.

19A sa kaya vei iratou ko Rapisake, Dou kaya mada vei Isikiya, Sa vosa vakaoqo na tui levu, na tui Asiria, A cava na ka ko sa vakararavi kina?

20O sa kaya, (a sa vosa walega,) Sa tu na vuku kei na kaukauwa me ia kina nai valu. Ia ko sa vakararavi vei cei, ko sa talaidredre kina vei au?

21O qo, raica, ko sa vakararavi ki nai titoko gasau sa bibivoro, io ki Ijipita, a ya kevaka sa ravita e dua, ena curuma na ligana ka vuetaka: sa vakakina ko Fero na tui Ijipita kivei ira kecega era vakararavi vua.

22Ia kevaka dou sa kaya vei au, Keimami sa vakararavi vei Jiova na neimami Kalou: sa sega beka ni koya sa biuta tani na nona veitikina cecere kei na nona veicabocabo-ni-soro ko Isikiya, ka kaya vei ira na Juta kei ira mai Jerusalemi, Dou soro ga e na mata ni cabocabo-ni-soro o qo e Jerusalemi?

23Ia o qo, mo solia mada vua na noqu turaga na tui Asiria nai vakadinadina, ia kaʼu na solia vei iko e rua na udolu na ose, kevaka ko sa vakavodoka rawa kina na tamata dauvodo e na ose.

24O na qai saumaka tani vakaevei na matana e dua vei ira na turaga ni valu e lailai vei ira na nona tamata na noqu turaga, ka laʼki vakararavi ki Ijipita me rawa kina na vale-vodoki e so kei ira na tamata dauvodo e na ose?

25Ia kaʼu sa qai lako cake beka mai me vakarusa na koro o qo, ka sa sega ni vata kei au ko Jiova? Sa kaya ga vei au ko Jiova, Mo lako cake ki na vanua o qo, ka vakarusa.

26Eratou sa qai kaya vei Rapisake ko Eliyakimi na luve i Ilikiya, kei Sepina, kei Yoa, Mo vosa mada vei keitou na nomu tamata e na vosa vaka-Siria; ni keitou sa kila: ia mo kakua ni veivosaki kei keitou e na vosa vaka-Jutia e na daligadra na tamata era sa mai na dela ni bai.

27A sa kaya vei iratou ko Rapisake, Sai kemudrau li na nomu turaga kei iko sa talai au kina na noqu turaga, meʼu vosataka na veika o qo? sa sega li vei ira na tamata era sa mai na dela ni bai, me ra kania na dedra ka gunuva na nodra mi, ko ira vata kei kemudou?

28A sa tu ko Rapisake ka kaci vakadomoilevu e na vosa vaka-Jutia, ka vosa, ka kaya, Dou rogoca na nona vosa na tui levu, na tui Asiria:

29Sa vosa vakaoqo na tui, Me kakua ni vakaisini kemudou ko Isikiya, ni na sega ni vakabulai kemudou rawa mai na liga i koya:

30ia me kakua ni cakavi kemudou ko Isikiya mo dou vakararavi vei Jiova, ni sa kaya, Ena vakabulai keda vakaidina ko Jiova, ka na sega ni soli na koro o qo ki na ligana na tui Asiria.

31Dou kakua ni vakarorogo vei Isikiya: ni sa kaya vakaoqo ko tui Asiria, Dou soro mada mai vei au, ka lako mai vei au, ka kania tiko na tamata yadua na vua ni nona vaini, kei na vua ni nona lolo, ka gunuva na tamata yadua na wai ni nona mata-ni-wai:

32ka meʼu qai lako malua mai, ka kauti kemudou yani ki na vanua sa vaka na nomudou vanua, a vanua ni sila kei na waini, a vanua ni madrai kei na veivainivaini, a vanua ni olive vakawaiwai, kei na oni, mo dou bula kina, ka sega ni mate: ia dou kakua ni vakarorogo vei Isikiya, ni sa vakaisini kemudou, ka kaya, Ena vakabulai keda ko Jiova.

33Sa dua li vei ira na veikalou ni veivanua sa Vakabula na nona vanua mai na ligana na tui Asiria?

34sa evei na veikalou ni Emaci, kei Aripati? sa evei na veikalou ni Sifariveimi, kei Ena, kei Iva? era sa vakabulai Samaria li mai na ligaqu?

35O cei vei ira kecega na veikalou ni veivanua sa Vakabula na nodra vanua mai na ligaqu, me vakabulai Jerusalemi ko Jiova mai na ligaqu?

36A sa tiko lo ga ko ira na tamata, ka sega ni cavuta vua e dua na vosa: ni sai vakaro ni tui, ka vaka, Dou kakua ni vosa vua.

37A sa lako ko Eliyakimi na luve i Ilikiya, o koya sa lewa na vale, kei Sepina na dauvolavola, kei Yoa na luve i Asafi, o koya sa dauvola na ka ni matanitu, vei Isikiya, ka sa dresulaki na nodratoui sulu, a sa tukuna vua na vosa i Rapisake.