II. Ai Kedrai Vola Na Tui 17 - AI VOLA TABU（FIJ1864）

Sa tui Isireli ko Osea; a sa levu na nodrai valavala ca ko ira na Isireli; a ra sa mai vakabobulataki ki Asiria, 1-23. Sa lesia na kai tani ko tui Asiria me ra tiko mai Samaria, 24-41.

1E NA kenai katinikarua ni yabaki i Aasi na tui Juta, sa mai tui mai Samaria vei ira na Isireli ko Osea na luve i Ela, ka yabaki ciwa.

2A sa caka ca ko koya e na mata i Jiova, ka sega ni vakataki ira na tui Isireli era a bula eliu vei koya.

3Sa mai vala kaya ko Salimaneseri na tui Asiria; a sa mai qali vua ko Osea, ka solia nai vakacavacava vei koya.

4A sa kunea na vere vei Osea ko tui Asiria: ni sa vakatadu mata ko koya vei So na tui Ijipita, ka sega ni kauta nai vakacavacava vei tui Asiria, me vaka e na veiyabaki: a sa sogoti koya kina ko tui Asiria, ka vesuka e na vale ni veivesu.

5Sa qai lako voli cake e na vanua taucoko ko tui Asiria, ka lako cake ki Samaria, ka sa buku druadrua kina ka yabaki tolu.

6E na kenai kaciwa ni yabaki i Osea sa rawai Samaria kina ko tui Asiria, ka kauti ira tani na Isireli ki Asiria, ka vakatikori ira ki Ela kei Apori, mai na uciwai mai Kosani, kei na nodra Veikoro na kai Mitia.

7Ni ra sa valavala ca ko ira na luve i Isireli vei Jiova na nodra Kalou, o koya ka kauti ira cake mai na vanua ko Ijipita, mai na ruku ni liga i Fero na tui Ijipita, a ra sa rerevaka na kalou tani e so,

8ka muria na nodrai valavala na veimatanitu, o ira ka vakaseva yani ko Jiova e matadra na luve i Isireli, kei na nodra na tui Isireli era a bulia.

9A sa kitaka lo vei Jiova na nodra Kalou ko ira na luve i Isireli na veika sa tawa dodonu, a ra sa tara me nodra na veitikina cecere mai na nodra veikoro kecega, mai na nodra vale cecere nai vakatawa, ka yacova na koro kaukauwa.

10A ra sa vakaduria na nodra veimatakau kei na veikaloualewa ni veikau e na dela ni vanua-cecere kecega, ka e na ruku ni kau karakarawa kecega.

11A ra sa vakacaudreva maikea na ka boi vinaka e na tikina cecere kecega, me vakataki ira na veimatanitu ka kauta tani e matadra ko Jiova; a ra sa kitaka tiko na ka ca me vakacudrui Jiova:

12ni ra sa qarava na matakau e so, na ka sa kaya cina vei ira ko Jiova, Dou kakua ni cakava na ka o qo.

13A sa vakarota matua ko Jiova vei ira na Isireli, kei ira na Juta, e na gusudra na nona parofita kecega, kei ira kecega na tamata daurai, ka kaya, Dou lesu mai mai na nomudoui valavala ca, ka vakabauta na noqu veivunau, kei na noqu veilesilesi, me vaka na vunau kece kaʼu a vunautaka vei ira na nomudou qase, a ya kaʼu a tukuna vei kemudou e na gusudra na noqui talatala na parofita.

14Ia ka ra sa sega ni vakarorogo, a ra sa vakadomodomoqataki ira me vaka na domodra na nodra qase, era a sega ni vakabauti Jiova na nodra Kalou.

15A ra sa biuta na nona veilesilesi kei na nona veiyalayalati ka ia kei ira na nodra qase, kei na nona vunau ka vunautaki ira kina ko koya; a ra sa muria na ka vakalialia, ka yaco kina me lialia, ka muri ira na veimatanitu sa vakavolivoliti ira, o ira ka vunau e na vukudra vei ira ko Jiova, me ra kakua ni cakacaka me vakataki ira.

16A ra sa biuta kecega na vunau i Jiova na nodra Kalou, ka vakawaicalataka ka bulia me nodra e rua na luve ni karavau, ka cakava na kaloualewa ni veikau, ka soro ki na kalokalo kecega mai lomalagi, ka qaravi Peali.

17A ra sa dui kitaki iratou na luvedra tagane kei na luvedra alewa me lako e loma ni buka waqa, a ra sa caka ka vakatevoro, ka cakai sausau, ka volitaki ira me caka ca e na mata i Jiova, me vakacudrui koya.

18A sa cudru vakalevu kina ko Jiova vei ira na Isireli, ka biuti ira tani e matana: sa sega ni vo e dua, na yavusa i Juta duaduaga.

19Sa sega ni vakabauta na vunau i Jiova na nodra Kalou ko ira talega na Juta, a sa lako ga e nai valavala era sa kitaka ko ira na Isireli.

20A sa biuta kecega na nodra kawa na Isireli ko Jiova, ka vakararawataki ira, ka soli ira ki na ligadra na dauvakacaca, ka yacova na gauna sa biuti ira tani kina e matana:

21ni sa tawasei ira na Isireli ko koya mai na mataqali i Tavita; a ra sa buli Yaropiami na luve i Nipati me tui: a sa vakasesei ira na Isireli ko Yaropiami me ra kakua ni muri Jiova, ka vakaivalavalacataki ira vakalevu.

22A sa lako ko ira na luve i Isireli e nai valavala ca kecega sa cakava ko Yaropiami; era sa sega ni lesu tani maikina;

23ka yacova na gauna sa biuti ira tani kina na Isireli ko Jiova mai na matana, me vaka ka kaya ko koya e na gusudra kecega na nonai talatala na parofita. A sa kauti tani kina ko ira na Isireli, mai na nodra vanua ki Asiria, ka yacova na gauna o qo.

24A SA kauta mai ko tui Asiria na tamata e so mai Papiloni, kei Kuca, kei Ava, kei Emaci, kei Sifariveimi, ka vakatikora e na Veikoro mai Samaria, me kedrai sosomi na luve i Isireli: a ra sa taukeni Samaria, ka tiko e na kena veikoro.

25Ia ni ra sa qai laʼki tiko kina, era sa sega ni rerevaki Jiova: a sa vakatala kina vei ira ko Jiova na laioni e so, a ya sa vakamatea e so vei ira.

26A ra sa vosa kina vua na tui Asiria, ka kaya, O ira na veimatanitu ko a kauta, ka vakatikora e na veikoro mai Samaria, era sa sega ni kila nai valavala ni Kalou ni vanua: a sa tala kina ko koya na laioni e so e na kedra maliwa, ka, raica, era sa vakamatei ira, e na vuku ni ra sa sega ni kila nai valavala ni Kalou ni vanua.

27A sa vakarota ko tui Asiria, ka kaya, Dou kauta yani kina e dua vei ira na bete dou a kauta maikina; ia me laʼki tiko maikea, ka vakavulici ira e nai valavala ni Kalou ni vanua.

28A sa lako e dua vei ira na bete ka ra kauta tani eliu mai Samaria, a sa tiko ki Peceli, ka vakavulici ira se ra na rerevaki Jiova vakaevei.

29A sa dui tulia na nodra veikalou ko ira na lewe ni veivanua, ka vakaduria e na veivale mai na veitikina cecere era a cakava na kai Samaria, na lewe ni veivanua e na veikoro era sa tiko kina.

30Ia ko ira na kai Papiloni, era sa tuli Sukoci-pinoci; ia ko ira na kai Kuca, era sa tuli Nerikali; ia ko ira na kai Emaci, era sa tuli Esima;

31ia ko ira na Avi, era sa tuli Nipasi kei Taritaki; ia ko ira na kai Sifariveimi, era sa vakamai ira na luvedra e na buka kivei Etirameleki kei Anameleki, oi rau na kalou ni Sifariveimi.

32Ia era sa rerevaki Jiova tiko, ka lesia maivei ira na tamata walega me nodra bete ni veitikina cecere, a ra sa kitaka na nodrai soro e na veivale ni veitikina cecere.

33Era sa rerevaki Jiova tiko, ka qarava tiko na nodra veikalou, me vaka na nodrai valavala na lewe ni veivanua era a kauti tani maikina.

34Era sa cakacaka tiko ka yacova na gauna o qo me vaka nai valavala eliu: era sa sega ni rerevaki Jiova, ka sega ni kitaka me vaka na ka sa lesi vei ira, se na ka sa dodonu vei ira, se na vunau kei nai vakaro ka rotaka ko Jiova vei ira na luve i Jekope, o koya ka vakatoka ko koya ko Isireli:

35o ira ka veiyalayalati kaya ko Jiova, ka vakaroti ira, ka kaya, Dou kakua ni rerevaka na veikalou tani, se cuva vei ira, se qaravi ira, se cabocabo vei ira:

36ia ko Jiova ga, o koya ka kauti kemudou cake mai na vanua ko Ijipita, e na kaukauwa levu kei na liga sa dodo yani, dou rerevaki koya, ka cuva vua, ka cabocabo vei koya:

37ia na veilesilesi, kei na ka dodonu, kei na vunau, kei nai vakaro, o qori ka vola vei kemudou ko koya, mo dou vakabauta me cakava ka tawa mudu; ia dou kakua ni rerevaka na veikalou tani:

38ia na veiyalayalati kaʼu a cakava kei kemudou, dou kakua ni guilecava; dou kakua talega ni rerevaka na veikalou tani;

39ia ko Jiova ga na nomudou Kalou dou rerevaka; ia ena vakabulai kemudou ko koya mai na ligadra na nomudou meca kecega.

40Ia ka ra sa sega ni vakarorogo, a ra sa cakacaka tikoga me vaka na nodrai valavala eliu.

41Ia ko ira na lewe ni veivanua o qori, era sa rerevaki Jiova, ka qarava na nodra veimatakau ceuceu, ko ira na luvedra, kei na mokubudra: me vaka ka kitaka ko ira na nodra qase, era sa kitaka vaka tikoga kina, ka yacova na siga o qo.