II. Ai Kedrai Vola Na Tui 16 - AI VOLA TABU（FIJ1864）

1E NA kenai katinikavitu ni yabaki i Peka na luve i Rimaliya, sa mai tui ko Aasi na luve i Yocami na tui Juta.

2Sa ruasagavulu na yabaki i Aasi ni sa mai tui, a sa lewa tiko mai Jerusalemi ka yabaki tinikaono: a sa sega ni caka dodonu e na mata i Jiova na nona Kalou, me vakataki Tavita na nona qase.

3A sa muria ga na nodrai valavala na tui Isireli; ia sa cakava na luvena me lako e loma ni buka waqa, me vaka na veika vakasisila ni veimatanitu ka vakaseva ko Jiova e na matadra na luve i Isireli.

4A sa cabocabo ko koya, ka vakacaudreva na ka boi vinaka, e na veitikina cecere, kei na veiulu-ni-koro, ka e na ruku ni kau karakarawa kecega.

5Sa qai lako cake ko Risini na tui Siria, kei na tui Isireli, ko Peka na luve i Rimaliya, me rau kitaka nai valu ki Jerusalemi: a ra sa buku na druadrua vei Aasi, ka ra sa sega ga ni vala rawa.

6E na gauna ko ya sa rawai Elaci tale me kau ki Siria ko Risini na tui Siria, a sa vakasevi ira yani na Juta mai Elaci: a ra sa lako ki Elaci na kai Siria, ka tiko kina, ka yacova na siga o qo.

7A sa vakatadu mata ko Aasi kivei Tikilaci-pileseri na tui Asiria, ka kaya, Sa nomu tamata, kei na luvemu, koi au: mo lako cake mai, ka vakabulai au mai na liga i tui Siria, kei na liga i tui Isireli, erau sa noqu meca.

8A sa taura ko Aasi na siliva kei na koula sa kune e na vale i Jiova, kei na yau mai na vale ni tui, a sa vakauta me ka-ni-loloma vua na tui Asiria.

9A sa vakarorogo vua ko tui Asiria: a sa lako cake ki Tamasiko ko tui Asiria, ka kabata, ka kauti ira tani na lewena ki Kiri, ka vakamatei Risini.

10A sa lako ki Tamasiko ko Aasi na tui me tavaki Tikilaci-pileseri na tui Asiria, a sa raica nai cabocabo-ni-soro mai Tamasiko: a sa vakauta ko Aasi na tui kivei Uriya na bete nai valavala ni cabocabo-ni-soro, kei na kenai vakatakarakara, me vaka na kena cakacaka kecega.

11A sa cakava ko Uriya na bete nai cabocabo-ni-soro me vaka na ka kecega ka talaki kina mai Tamasiko ko Aasi na tui: sa cakava vakakina ko Uriya na bete, ka waraka na nona tale mai Tamasiko ko Aasi na tui.

12Ia ni sa lako mai Tamasiko na tui, sa qai kunea nai cabocabo-ni-soro na tui: a sa toro na tui ki nai cabocabo-ni-soro, ka cabocabo kina.

13A sa vakama na nonai soro kama, kei na nonai madrali laukana; ka livia na nonai madrali liviraki, ka kureitaka na dra ni nonai soro e na veivinakati, e na dela ni cabocabo-ni-soro.

14Ia nai cabocabo-ni-soro parasa ka tu e na mata i Jiova, sa kauta tani ko koya mai na mata ni vale, mai na tadrua ni cabocabo-ni-soro kei na vale i Jiova, ka tauca ki na yasa ni cabocabo-ni-soro, vaka ki na tokalau.

15A sa vakaroti Uriya na bete ko Aasi na tui, ka kaya, Mo vakama e na dela ni cabocabo-ni-soro levu nai soro kama ni sabogibogi, kei nai madrali laukana ni yakavi, kei na nonai soro kama na tui, kei na nonai madrali laukana, kei na nodrai soro kama kecega na lewe ni vanua, kei na nodrai madrali laukana, kei na nodrai madrali liviraki; ka kureitaka ki delana na dra kecega ni soro kama, kei na dra ni soro kecega: ia nai cabocabo-ni-soro parasa, au na lewa kina.

16A sa kitaka ko Uriya na bete, me vaka na ka kecega ka rotaka ko Aasi na tui.

17A sa taya biuta na batina mai na veitutu ko Aasi na tui, ka laveta tani nai deredere mai na deladratou: ka laveta sobu na sedre-wasawasa mai na deladratou na karavau parasa sa tu e rukuna, ka tauca ki na dua nai coconi vatu:

18ia nai vakaruru ni siga ni vakacecegu ka ra tara mai na vale, kei nai curucuru ni tui kitautuba, sa saumaka tani ko koya mai na vale i Jiova e na vuku i tui Asiria.

19Ia na vo ni cakacaka i Aasi sa cakava ko koya, sa sega li ni volai e nai vola ni veika sa caka e na nodra gauna na tui Juta?

20A sa moce vata kei ira na nona qase ko Aasi, a sa buluti kei ira na nona qase e na koro i Tavita: a sa tui ko Isikiya, me kenai sosomi.