II. Ai Kedrai Vola Na Tui 15 - AI VOLA TABU（FIJ1864）

Juta ko Asariya, 1-7. Sa tui Isireli ko Sikariya, ko Sulumi, ko Mineemi, ko Pikaya, kei Peka, 8-31. Sa tui Juta ko Yocami, 32-38.

1E NA kenai karuasagavulu kavitu ni yabaki i Yaropiami na tui Isireli, sa mai tui ko Asariya, na luve i Emasiya na tui Juta.

2E tinikaono na nona yabaki ni sa mai tui, a sa lewa tiko mai Jerusalemi ka yabaki limasagavulu ka rua. Ia na yaca i tinana ko Yikoliya na kai Jerusalemi.

3A sa caka dodonu e na mata i Jiova, me vaka na ka kecega ka cakava ko Emasiya na tamana;

4ia ka sa sega ni biu na veitikina cecere: era sa kitaka tiko nai soro na tamata, ka vakacaudreva tiko na ka boi vinaka e na veitikina cecere.

5A sa yavita na tui ko Jiova, a sa vukavuka ko koya ka yacova na siga ka mate kina, a sa tiko e na dua na vale vakai koya ga. A sa lewa na vale ko Yocami na luve ni tui, ka lewai ira na lewe ni vanua.

6Ia na vo ni cakacaka i Asariya, kei na ka kecega sa cakava ko koya, sa sega li ni volai e nai vola ni veika sa caka e na nodra gauna na tui Juta?

7A sa moce vata kei ira na nona qase ko Asariya, a sa buluti vata kei ira na nona qase e na koro i Tavita: a sa tui mai ko Yocami na luvena, me kenai sosomi.

8E NA kenai katolusagavulu ka walu ni yabaki i Asariya na tui Juta, sa mai tui vei ira na Isireli mai Samaria ko Sikariya na luve i Yaropiami ka vula ono.

9A sa caka ca ko koya e na mata i Jiova, me vaka na ka era a cakava na nona qase: sa sega ni biuta nai valavala ca i Yaropiami na luve i Nipati, o koya ka vakaivalavalacataki ira na Isireli.

10A sa buki kena vere ko Salumi na luve i Yapesi, ka mokuta e na matadra na tamata, ka vakamatea, ka sa tui me kenai sosomi.

11Ia na vo ni cakacaka i Sikariya, raica, sa volai e nai vola ni veika sa caka e na nodra gauna na tui Isireli.

12O qori na vosa i Jiova a ya ka vosataka ko koya vei Yeu, ni sa kaya, Eratou na tiko ko iratou na luvemu e nai tikotiko vakaturaga nei Isireli, ka yacova na kenai kava ni tabatamata. A sa yaco vakakina.

13Sa mai tui ko Salumi na luve i Yapesi e na kenai katolusagavulu ka ciwa ni yabaki i Usiya na tui Juta; a sa lewa mai Samaria e dua dina na vula.

14A sa lako cake mai Tirisa ko Mineemi na luve i Kati, ka lako ki Samaria, a sa mokuti Salumi na luve i Yapesi e Samaria, ka vakamatei koya, a sa tui me kenai sosomi.

15Ia na vo ni cakacaka i Salumi, kei na vere sa kitaka ko koya, raica, sa volai e nai vola ni veika sa caka e na nodra gauna na tui Isireli.

16Sa qai mokuti Tifisa ko Mineemi, kei ira kecega ka tiko kina, kei na kena veiyasana mai Tirisa, e na vuku ni sa sega ni dolavi mai; a sa mokuta kina ko koya; sa tava kecega na alewa sa bukete era tiko kina.

17E na kenai katolusagavulu ka ciwa ni yabaki i Asariya na tui Juta, sa mai tui mai Samaria vei ira na Isireli ko Mineemi na luve i Kati, ka yabaki tini.

18A sa caka ca ko koya e na mata i Jiova; sa sega ni biuta e nona siga kecega nai valavala ca i Yaropiami na luve i Nipati, o koya ka vakaivalavalacataki ira na Isireli.

19Sa mai kabata na vanua ko Puli na tui Asiria: a sa solia vei Puli ko Mineemi e dua na udolu na taledi siliva, ka me tiko kaya na ligana me vakataudeitaki vua na matanitu.

20A sa vakasautaka nai lavo ko Mineemi maivei ira na Isireli, io maivei ira na tamata vutuniyau, sa tauyalimasagavulu na sikeli siliva maivei ira, ka me solia vua na tui Asiria: a sa lesu yani kina na tui Asiria, ka sega ni tiko maikea e na vanua.

21Ia na vo ni cakacaka i Mineemi, kei na ka kecega sa cakava ko koya, sa sega li ni volai e nai vola ni veika sa caka e na nodra gauna na tui Isireli?

22A sa moce vata kei ira na nona qase ko Mineemi; a sa tui ko Pikaya na luvena, me kenai sosomi.

23E na kenai kalimasagavulu ni yabaki i Asariya na tui Juta, sa mai tui mai Samaria vei ira na Isireli ko Pikaya na luve i Mineemi, ka yabaki rua.

24A sa caka ca ko koya e na mata i Jiova: sa sega ni biuta nai valavala ca i Yaropiami na luve i Nipati, o koya ka vakaivalavalacataki ira na Isireli.

25Ia ka sa buki kena vere ko Peka na luve i Rimaliya, e dua na nona turaga ni valu, a sa mokuti koya mai Samaria, e na tikina cecere e na vale ni turaga, o koya kei Arikopi kei Eriye, kei ira vata kaya e lewe limasagavulu na tamata era kai Kiliati: a sa vakamatei koya ko koya, a sa tui me kenai sosomi.

26Ia na vo ni cakacaka i Pikaya, kei na ka kecega sa cakava ko koya, raica, sa volai e nai vola ni veika sa caka e na nodra gauna na tui Isireli.

27E na kenai kalimasagavulu ka rua ni yabaki i Asariya na tui Juta, sa mai tui mai Samaria vei ira na Isireli ko Peka na luve i Rimaliya, ka yabaki ruasagavulu.

28A sa caka ca ko koya e na mata i Jiova: sa sega ni biuta nai valavala ca i Yaropiami na luve i Nipati, o koya ka vakaivalavalacataki ira na Isireli.

29E na gauna i Peka na tui Isireli, sa lako mai ko Tekilaci-pileseri na tui Asiria, ka kabati lyoni, kei Apeli-peci-meeka, kei Yanoa, kei Ketesi, kei Asori, kei Kiliati, kei Kalili, na vanua taucoko i Nafitali, ka vakabobulataki ira ki Asiria.

30A sa bukia na vere kei Peka na luve i Rimaliya ko Osea na luve i Ela, ka mokuti koya, ka vakamatea, a sa tui me kenai sosomi, e na kenai karuasagavulu ni yabaki i Yocami na luve i Usiya.

31Ia na vo ni cakacaka i Peka, kei na ka kecega sa cakava ko koya, raica, sa volai e nai vola ni veika sa caka e na nodra gauna na tui Isireli.

32E NA kenai karua ni yabaki i Peka na tui Isireli, na luve i Rimaliya, sa mai tui ko Yocami na luve i Usiya na tui Juta.

33Sa ruasagavulu ka lima na nona yabaki ni sa mai tui, a sa lewa tiko mai Jerusalemi ka yabaki tinikaono. Ia na yaca i tinana ko Yirusa, na luve i Satoki.

34A sa caka dodonu ko koya e na mata i Jiova: sa cakacaka me vaka na ka kecega ka cakava ko Usiya na tamana.

35Ia ka sa sega ni biu na veitikina cecere; sa kitaka tiko nai soro ko ira na tamata, ka vakacaudreva tiko na ka boi vinaka e na veitikina cecere. Sa cakava ko koya na matamata-ni-koro ni vale i Jiova, a ya ecake.

36Ia na vo ni cakacaka i Yocami, kei na ka kecega sa cakava ko koya, sa sega li ni volai e nai vola ni veika sa caka e na nodra gauna na tui Juta?

37E na veisiga ko ya sa vakatekivu ko Jiova me talai Risini na tui Siria, kei Peka na luve i Rimaliya, me kabai Juta.

38A sa moce vata kei ira na nona qase ko Yocami, a sa buluti kei ira na nona qase e na koro i Tavita na nona qase: a sa tui ko Aasi na luvena, me kenai sosomi.