II. Ai Kedrai Vola Na Tui 14 - AI VOLA TABU（FIJ1864）

Sa tui Juta ko Emasiya, 1-22. Sa tui Isireli ai karua ni Yaropiami, 23-29.

1E NA kenai karua ni yabaki i Yoasi na tui Isireli, na luve i Yioaasi, sa mai tui ko Emasiya na luve i Yoasi na tui Juta.

2Sa ruasagavulu ka lima na nona yabaki ni sa mai tui, a sa lewa mai Jerusalemi ka yabaki ruasagavulu ka ciwa. Ia na yaca i tinana ko Yioatani, mai Jerusalemi.

3A sa caka dodonu ko koya e na mata i Jiova, ka sega ni vakataki Tavita na nona qase: sa cakacaka ko koya me vaka na ka kecega ka cakava ko Yoasi na tamana.

4Ia ka sa sega ni biu na veitikina cecere: era sa kitaka tiko nai soro ka vakacaudreva tiko na ka boi vinaka e na veitikina cecere.

5Ia ni sa kaukauwa e ligana na matanitu, sa mokuti ira na nonai talatala era a vakamatea na tui na tamana:

6ia na luvedra era a vakamatea, sa sega ni vakamatei ira ko koya: me vaka na ka sa volai e nai vola ni vunau i Mosese, sa vakarota kina ko Jiova, ka kaya, Me kakua ni vakamatei na tamadra e na vuku ni luvedra, se vakamatei na luvedra e na vuku ni tamadra; ia na tamata yadua ena vakamatei e na vuku ni nonai valavala ca.

7Sa mokuti ira na Itomi ko koya e na buca ni masima e lewe tini na udolu, ka rawai Sila e nai valu, ka vakatoka na yacana ko Yokicieli, ka yacova na siga o qo.

8Sa qai vakatadu mata ko Emasiya vua na tui Isireli ko Yioasi, na luve i Yioaasi na luve i Yeu, ka kaya, Me daru mai veiraici mata mada.

9A sa talaki ko Yioasi na tui Isireli kivei Emasiya na tui Juta, ka kaya, Sa talaki na co karokaroa mai Lipanoni ki na sitari mai Lipanoni, ka vaka, Mo solia na luvemu alewa vua na luvequ tagane me watina: a sa lako voli e dua na manumanu kila mai Lipanoni, a sa butuka sobu na co karokaroa:

10e dina ko sa mokuti ira na Itomi, a sa laveti iko cake na yalomu: mo marau, ka tikoga mai nomu vale: a cava ko sa tara kina na ka ca mo bale kina, io ko iko kei ira na Juta vata kei iko?

11A sa sega ni rogoca ko Emasiya. A sa lako cake kina ko Yioasi na tui Isireli: a rau sa veiraici mata kei Emasiya na tui Juta mai Peci-semesi na nei Juta.

12A sa mokuti ira na Juta ko ira na Isireli; a ra sa dui dro na tamata yadua ki na nona vale gatu.

13Ia ko Yioasi na tui Isireli, sa tauri Emasiya na tui Juta, na luve i Yioasi, na luve i Easiya, mai Peci-semesi, ka yaco ki Jerusalemi, ka basuka na bai mai Jerusalemi, mai na matamata-ni-koro ni Ifireimi, ka yacova na matamata-ni-koro mai na ucu ni koro, e walu na drau na caga.

14A sa kauta ko koya kecega na koula kei na siliva, kei nai yaya kecega sa kune e na vale i Jiova, ka e na yau ni nona vale na tui, kei na tamata e so me vakataudeitaki kina na sautu; ka lesu tale ki Samaria.

15Ia na vo ni cakacaka i Yioasi, a ya sa cakava ko koya, kei na nona kaukauwa, kei na nona veivala kei Emasiya na tui Juta, sa sega li ni volai e nai vola ni veika sa caka e na nodra gauna na tui Isireli?

16A sa moce vata kei ira na nona qase ko Yioasi, a sa buluti mai Samaria vata kei ira na tui Isireli; a sa tui ko Yaropiami na luvena, me kenai sosomi.

17A sa bula tiko ko Emasiya na luve i Yoasi na tui Juta ka yabaki tinikalima, ni sa mate ko Yioasi na luve i Yioaasi na tui Isireli.

18Ia na vo ni cakacaka i Emasiya, sa sega li ni volai e nai vola ni veika sa caka e na nodra gauna na tui Juta?

19A ra sa bukia na kena vere mai Jerusalemi, a sa dro ko koya ki Lakisi; a ra sa talaki vua ki Lakisi, ka vakamatea maikina.

20A ra sa kauti koya e na ose e so: a sa buluti mai Jerusalemi vata kei ira na nona qase e na koro i Tavita.

21A sa kauti Asariya ko ira kecega na tamata Juta, ni sa tinikaono na nona yabaki, a ra sa buli koya me tui mei sosomi kei Emasiya na tamana.

22Sa tarai Elaci ko koya, ka roqota talega vei ira na Juta, ni sa moce oti na tui vata kei ira na nona qase.

23E na kenai katinikalima ni yabaki i Emasiya na tui Juta, na luve i Yoasi, sa mai tui mai Samaria ko Yaropiami na luve i Yoasi na tui Isireli, ka yabaki vasagavulu ka dua.

24A sa caka ca ko koya e na mata i Jiova: sa sega sara ni lako tani mai nai valavala ca i Yaropiami na luve i Nipati, o koya ka vakaivalavalacataki ira na Isireli.

25Sa roqota tale ko koya nai yalayala kei Isireli mai nai curucuru ki Emaci, ka yacova na Wasawasa mai na buca, me vaka na vosa i Jiova na nodra Kalou na Isireli, a ya ka vosataka ko koya e na gusu i Jona na nonai talatala, o koya na luve i Emitai na parofita, na kai Kaca-eferi.

26Ni sa raica ko Jiova na nodra rarawa na Isireli, ni sa gaga vakalevu: ni sa sega ni dua sa sogolati se lako voli, ka sega nai vukevuke vei ira na Isireli.

27A sa sega ni kaya ko Jiova me bokoca na yacadra na Isireli mai na ruku i lomalagi: a sa vakabulai ira e na liga i Yaropiami na luve i Yoasi.

28Ia na vo ni cakacaka i Yaropiami, kei na ka kecega sa cakava ko koya, kei na nona kaukauwa sa ia kina nai valu ko koya, ka rawai Tamasiko tale kina, kei Emaci na nei Juta, me nodra na Isireli, sa sega li ni volai e nai vola ni veika sa caka e na nodra gauna na tui Isireli?

29A sa moce vata kei ira na nona qase ko Yaropiami, io ko ira na tui Isireli; a sa tui ko Sikariya na luvena, me kenai sosomi.