II. Ai Kedrai Vola Na Tui 13 - AI VOLA TABU（FIJ1864）

Sa tui Isireli ko Yioaasi, ka qai taravi koya ko Yoasi. Sa mate ko Ilisa.

1E NA kenai karuasagavulu ka tolu ni yabaki i Yoasi na tui Juta, na luve i Easiya, sa mai tui vei ira na Isireli mai Samaria ko Yioaasi na luve i Yeu, ka yabaki tinikavitu.

2A sa caka ca ko koya e na mata i Jiova, ka muria nai valavala ca i Yaropiami na luve i Nipati, o koya ka vakaivalavalacataki ira na Isireli; sa sega ni lako tani maikina.

3A sa waqawaqa na cudru i Jiova vei ira na Isireli, a sa soli ira ki na liga i Esaeli na tui Siria, kei na liga i Peni-etati na luve i Esaeli, e na gauna kecega.

4A sa vakamamasu vei Jiova ko Yioaasi, a sa rogoci koya ko Jiova: ni sa raica ni sa vakasaurarataki ko ira na Isireli, ni sa vakasau yarataki ira ko na tui Siria. (

5A sa solia ko Jiova vei ira na Isireli e dua nai Vakabula, a ra sa lako tani kina mai na ruku ni ligadra na kai Siria: a ra sa tiko mai na nodra veivale gatu ko ira na luve i Isireli, me vaka eliu.

6Ia ka ra sa sega ni biuta nai valavala ca ni mataqali i Yaropiami, o koya ka vakaivalavalacataki ira na Isireli; sa lako kina ko koya: a sa tu ga mai Samaria na kaloualewa ni veikau.)

7A sa sega ni laiva na tamata vei Yioaasi, e limasagavulu ga na tamata sa dauvodo e na ose, ka tini na vale-vodoki, ka tini na udolu na tamata sa lako e yavadra; ni sa vakarusai ira ko na tui Siria, ka cakavi ira me ra vaka na kuvu-ni-qele ni ra sa dausamulaki.

8Ia na vo ni cakacaka i Yioaasi, kei na ka kecega sa cakava ko koya, kei na nona kaukauwa, sa sega li ni volai e nai vola ni veika sa caka e na nodra gauna na tui Isireli?

9A sa moce vata kei ira na nona qase ko Yioaasi, a sa buluti mai Samaria: a sa tui ko Yoasi na luvena, me kenai sosomi.

10E na kenai katolusagavulu ka vitu ni yabaki i Yoasi na tui Juta, sa mai tui vei ira na Isireli mai Samaria ko Yioasi na luve i Yioaasi, ka yabaki tinikaono.

11A sa caka ca ko koya e na mata i Jiova; sa sega sara ni lako tani mai nai valavala ca i Yaropiami na luve i Nipati, o koya ka vakaivalavalacataki ira na Isireli: sa lako kina ko koya.

12Ia na vo ni cakacaka i Yoasi, kei na ka kecega sa cakava ko koya, kei na nona kaukauwa sa veivala kina kei Emasiya na tui Juta, sa sega li ni volai e nai vola ni veika sa caka e na nodra gauna na tui Isireli?

13A sa moce vata kei ira na nona qase ko Yoasi; a sa tiko e nonai tikotiko vakaturaga ko Yaropiami; a sa buluti mai Samaria ko Yoasi vata kei ira na tui Isireli.

14A sa tauvi mate ko Ilisa e na mate ka ciba kina. A sa lako sobu vua ko Yoasi na tui Isireli, a sa tagi ni sa irova na matana, a sa kaya, Na tamaqu, na tamaqu! na vale-vodoki nei Isireli, kei ira na nodra tamata sa dauvodo e na ose!

15A sa kaya vua ko Ilisa, Mo taura na dakai kei na veigasau. A sa taura ko koya na dakai kei na veigasau.

16A sa kaya ko koya vua na tui Isireli, Kotora na ligamu ki na dakai. A sa kotora kina na ligana. A sa virikotora na ligana ko Ilisa ki na ligana na tui.

17A sa kaya ko koya, Mo dolava na katuba kivaka ki na tu i cake. A sa dolava ko koya. A sa kaya ko Ilisa, Vana. A sa vana ko koya. A sa kaya ko koya, Na gasau ni veivakabulai i Jiova; ia na gasau ni veivakabulai maivei ira na kai Siria: ni ko na mokuti ira na kai Siria mai Efeki, ka vakaotia.

18A sa kaya ko koya, Mo taura na veigasau. A sa taura ko koya. A sa kaya ko koya vua na tui Isireli, Mo yavita na qele. A sa yavita vakatolu, ka cegu.

19A sa cudru vei koya ko na tamata ni Kalou, ka kaya, E dodonu mo yavita vakalima, se vakaono; ko a qai mokuti ira na kai Siria, ka vakaotia: ia o qo, ko na mokuti ira na kai Siria vakatolu ga.

20A sa ciba ko Ilisa, a sa buluti. A sa curu ki na vanua na nodra veimataivalu na Moapi, ni sa tekivu na yabaki.

21Ia ni ra sa buluta tiko e dua na tamata, raica, era sa kunea na mataivalu; a ra sa biuta na tamata ki nai bulubulu i Ilisa: ia ni sa lako sobu na tamata, ka tara na sui i Ilisa, sa bula ko koya, ka tu cake e na yavana.

22A sa vakasaurarataki ira na Isireli ko Esaeli na tui Siria, e na gauna kecega i Yioaasi.

23A sa lomani ira ko Jiova, a sa yalololoma vei ira, ka golevi ira, e na vuku ni nona veiyalayalati kei Eparaama, kei Aisake, kei Jekope, ka sega ni via vakarusai ira, ka sa bera ni biuti ira tani e matana.

24A sa mate ko Esaeli na tui Siria; a sa tui ko Peni-etati na luvena, me kenai sosomi.

25Ia ko Yioasi na luve i Yioaasi, sa rawata tale mai na liga i Peni-etati na luve i Esaeli na Veikoro ka kauta tani ko koya mai na liga i Yioaasi na tamana e nai valu. Sa yaviti koya vakatolu ko Yoasi, ka rawa tale na Veikoro nei Isireli.