II. Ai Kedrai Vola Na Tui 12 - AI VOLA TABU（FIJ1864）

1SA vitu na yabaki i Yioasi ni sa mai tui. Sa kenai kavitu ni yabaki i Yeu sa mai tui kina ko Yioasi; a sa lewa ko koya mai Jerusalemi ka yabaki vasagavulu. Ia na yaca i tinana ko Sipia, mai Pieri-sepa.

2A sa caka dodonu ko Yioasi e na mata i Jiova e na nona veisiga kecega, sa vakavulici koya tiko kina ko Yioyata na bete.

3A sa sega ga ni biu na veitikina cecere: era sa cabocabo tiko ko ira na tamata ka vakacaudreva na ka boi vinaka e na veitikina cecere.

4A sa kaya vei ira na bete ko Yioasi, Nai lavo kecega ni veika sa cabori, a ya sa kauti mai ki na vale i Jiova, io nai lavo ni tamata yadua sa wiliki, nai lavo sa lewai e na vuku ni yalona na tamata yadua, nai lavo kecega sa nanuma na tamata yadua me kauta ki na vale i Jiova,

5me dui kauta ko ira na bete maivei ira na wekana: ia me ra vakaukauwataka na tiki ni vale sa kabasu, e na tikina kecega sa kunei ni sa kabasu.

6Ia sa kenai karuasagavulu ka tolu ni yabaki i Yioasi na tui, a sa sega ni vakaukauwataka ko ira na bete na tiki ni vale sa kabasu.

7Sa qai kacivi Yioyata na bete kei ira na bete tani ko Yioasi na tui, a sa kaya vei ira, A cava dou sa sega ni vakaukauwataka kina na tiki ni vale sa kabasu? ia dou kakua ni taura tiko nai lavo maivei ira na wekamudou, dou solia ga ki na tiki ni vale sa kabasu.

8A sa vinakata ga ko ira na bete, me kakua ni taura tiko nai lavo maivei ira na tamata, me kakua talega ni vakaukauwataka na tiki ni vale sa kabasu.

9A sa kauta o dua na rubu ko Yioyata na bete, ka cakava e dua na qara e na kenai sogo, ka viritura ka voleka ki nai cabocabo-ni-soro, e na kena yasa i matau sa lako kina na tamata ki na vale i Jiova: ia sa viria kina ko ira na bete era vakatawa na katuba nai lavo kecega sa kauti ki na vale i Jiova.

10Ia ni rau sa raica ni sa levu nai lavo e na rubu na nona tamata dauvolavola na tui, kei koya na bete levu, erau sa lako cake ka viria ki na taga, ka wilika nai lavo sa kune e na vale i Jiova.

11Ia ni sa wili nai lavo, erau sa solia ki na ligadra era sa kitaka na cakacaka, ko ira sa lesi me lewa na vale i Jiova: a ra sa kauta yani vei ira na matai ni kau kei ira na matai ni vatu, era sa kitaka tiko na vale i Jiova,

12vei ira talega na dauviri bai, kei ira na dauta vatu, ka me voli kina na kau kei na vatu sa ta oti, me vakaukauwataka na tiki ni vale i Jiova sa kabasu, ka e na vuku ni ka kecega sa volitaki e na vuku ni vale, ka me vakaukauwataka.

13Ia ka sa sega ni cakavi ki na vale i Jiova na veibilo siliva, na veikoti-ni-cina, na veisedre, na veidavui, na veiyaya koula, se na veiyaya siliva, e nai lavo sa kauti ki na vale i Jiova:

14a ra sa solia ga o qori vei ira na tamata cakacaka, a ra sa vakaukauwataka kina na vale i Jiova.

15A ra sa sega ni tarogi ira na tamata era sa solia kina nai lavo me ra solia vei ira na tamata cakacaka; ni ra sa cakacaka vakadodonu.

16Nai lavo e na vuku ni caka cala, kei nai lavo e na vuku ni valavala ca, sa sega ni kauti ki na vale i Jiova; sa nodra ga na bete.

17Sa qai lako cake ko Esaeli na tui Siria, ka vala ki Kaca, ka kabata: a sa gole ko Esaeli me lako cake ki Jerusalemi.

18A sa taura ko Yioasi na tui Juta na ka tabu kecega ka cabora ko Yiosafati, kei Yiorami, kei Easiya, eratou sa nona qase, eratou sa tui Juta, kei na veika ka cabora ko koya, kei na koula kecega sa kune e na yau ni vale i Jiova, kei na nona vale na tui, a sa vakauta vei Esaeli na tui Siria: a sa lako cake tani mai Jerusalemi ko koya.

19Ia na vo ni cakacaka i Yoasi, kei na ka kecega sa cakava ko koya, sa sega li ni volai e nai vola ni veika sa caka e na nodra gauna na tui Juta?

20A sa tu cake ko ira na nona tamata, ka buki kena vere, ka mokuti Yoasi e na vale i Milo, a ya sa lako sobu ki Sila.

21A sa mokuti koya koi rau na nona tamata, ko Yosakari na luve i Simiaci, kei Yiosapati na luve i Someri, a sa mate ko koya; a sa buluti kei ira na nona qase e na koro i Tavita: a sa tui ko Emasiya na luvena, mo kenai sosomi.