II. Ai Kedrai Vola Na Tui 11 - AI VOLA TABU（FIJ1864）

Sa lewa ko Acaliya, ka qai moku; a sa qai tui Juta ko Yoasi ni sa gone ga.

1IA ni sa raica ko Acaliya na tina i Easiya, ni sa mate na luvena, sa ia ko koya, ka vakawabokotaka kecega na kawa ni tui.

2Ia na gane i Easiya, ko Yiosepa na luve i Yorami na tui, sa tauri Yoasi na luve i Easiya, ka butakoca mai na kedra maliwa na luve ni tui era sa moku; a ra sa vuni koya vei Acaliya e na vale ni moce, kei koya sa susuga, a sa sega kina ni mate ko koya.

3A rau sa vuni kaya e na vale i Jiova, ka yabaki ono. A sa lewa na vanua ko Acaliya.

4Ia e na kenai kavitu ni yabaki, sa talaki ko Yioyata, ka kauti ira mai na turaga ni yadrau, kei ira na turaga ni valu, kei ira nai vakatawa, a sa kauti ira vua ki na vale i Jiova, ka ia na veiyalayalati kei ira, ka cakavi ira me ra vosavavakini e na vale i Jiova, ka vakatakila na luvena na tui vei ira.

5A sa vakaroti ira, ka kaya, Dou cakava na ka o qo: ai katolu ni wase vei kemudou sa curu e na siga ni vakacecegu, dou na vakatawa na vale ni tui;

6kei na kenai katolu ni wase, e na matamata-ni-koro ko Suri; kei na kenai katolu ni wase, e na matamata-ni-koro mai tauda-kudra na tamatai vakatawa: ia dou na vakatawa na vale me kakua ni curumi.

7Ia ka rua na wase vei kemudou kecega sa curu yani e na siga ni vakacecegu, me vakatawa na vale i Jiova, ka voleka ki na tui.

8Ia dou na tiko vakavolivoliti koya na tui ni sa dui taura na tamata yadua na nonai yaragi: ia ko koya sa curu ki loma ni yatuyatu, me vakamatei: ia dou tiko kaya na tui ni sa curu kitautuba ka curu kiloma.

9A sa kitaka ko ira na turaga ni yadrau me vaka na ka kecega sa rotaka vei ira ko Yioyata na bete: a ra sa kauti ira tauyadua na nona tamata sa dodonu me curu e na siga ni vakacecegu, kei ira e dodonu me curu yani e na siga ni vakacecegu, a ra sa lako vei Yioyata na bete.

10A sa solia ko na bete, vei ira na turaga ni yadrau, na vei-moto kei na veisasabai i Tavita na tui, o qori sa mai na vale i Jiova.

11A sa tu ko ira nai vakatawa, ni sa taura yadua na nonai yaragi, ka vakavolivolita na tui, mai na tutuna i matau na vale, ka yaco ki na tutuna i mawi na vale, ka tu voli ka voleka ki nai cabocabo-ni-soro kei na vale.

12A sa kauta ko koya kitautuba na luvena na tui, ka vakaisalataka e nai sala ni tui, ka solia vua nai vola ni vunau; a ra sa buli koya me tui, ka lumuti koya; a ra sa cobo-cobo e na ligadra, ka kaya, Me bula na tui.

13Ia ni sa rogoca ko Acaliya na nodra rorogo nai vakatawa, kei na nodra na tamata, sa lako ko koya vei ira na tamata ki na vale i Jiova.

14Ia ni sa rai voli ko koya, raica, sa tu na tui e na dela ni tutu, me vaka nai valavala, kei ira na turaga, kei ira era dau-uvu davui era vata kei na tui, a ra sa reki kecega na lewe ni vanua, ka kitaka na uvu davui: a sa dresulaka na nonai sulu ko Acaliya, ka kacivaka, Na vere! na vere!

15A sa vakarota ko Yioyata na bete, vei ira na turaga ni yadrau, ko ira na turaga ni valu, ka kaya vei ira, Dou kauti koya kitautuba mai na loma ni yatuyatu: ia me vakamatei e nai seleiwau na tamata sa muri koya. Ni sa kaya ko koya na bete, Me Kakua ni vakamatei e loma ni vale i Jiova.

16A ra sa taura; a sa lako ko koya e na sala sa daulako kina na veiose ki na vale ni tui: a sa vakamatei maikea.

17A sa qisia ko Yioyata me ia na veiyalayalati ko Jiova kei koya na tui, ko ira talega na tamata, me ra nona tamata ko Jiova: ko ira talega na tui kei ira na tamata.

18A sa curuma na vale i Peali ko ira kecega na lewe ni vanua, ka basuka; na kena veicabocabo-ni-soro, kei na kena veimatakau, era sa basulaka sara, a ra sa vakamatei Matani na bete i Peali e na mata ni veicabocabo-ni-soro. Ia sa lesia ko na bete na turaga e so me lewa na vale i Jiova.

19A sa kauti ira na turaga ni yadrau, kei ira na turaga ni valu, kei ira nai vakatawa, kei ira kecega na lewe ni vanua; a ra sa kauti koya sobu na tui mai na vale i Jiova, ka lako e na sala sa lako ki na matamata-ni-koro era sa dautiko kina nai vakatawa, ki na vale ni tui. A sa tiko ko koya e na nodrai tikotiko vakaturaga na tui.

20A ra sa reki kecega na lewe ni vanua, a sa tiko vinaka na koro; a ra sa vakamatei Acaliya e nai seleiwau mai na vale ni tui.