II. Ai Kedrai Vola Na Tui 10 - AI VOLA TABU（FIJ1864）

Sa vakamatea ko Yeu na tamata sa vo e na nodrau mataqali ko Eapi kei Easiya, 1-17. Sa mokuti ira era sa qaravi Peali, 18-28. A sa valavala ca ga ko Yeu, 29-36.

1A SA vitusagavulu na luvena tagane ko Eapi mai Samaria. A sa vola e so nai vola ko Yeu, ka vakauta ki Samaria, vei ira sa turaga mai Isirieli, kei ira na qase, kei ira ka vakacadrai ira na luve i Eapi, a sa kaya,

2Ia o qo, ni sa yaco vei kemudou nai vola o qo, ni sa tiko vei kemudou ko ira na luvena na nomudou turaga, sa tiko talega vei kemudou na veivale-vodoki, kei na veiose, kei na koro kaukauwa, kei nai yaragi ni valu;

3dou qarai koya sa vinaka ka dodonu maivei ira na luvena na nomudou turaga, ka vakatikora e nai tikotiko vakaturaga i tamana, ka kitaka nai valu e na vuku ni nona mataqali na nomudou turaga.

4A ra sa rere vakalevu sara, ka kaya, Raica, sa sega ni tu dei e matana e rua na tui: ia eda na tu dei vakaevei?

5A ra sa talaki vei Yeu ko koya sa lewa e na vale, kei koya sa lewa e na koro, kei ira na qase, kei ira ka vakacadrai ira na gone, a sa kaya, Sa nomu tamata koi keimami, ia keimami na cakava na ka kecega ko na vakarota vei keimami; keimami na sega ni bulia e dua na tui: mo kitaka ga na ka e vinaka e matamu.

6Sa qai vola tale ko koya vei ira e dua nai vola, ka kaya, Kevaka dou sa totaki au, ia kevaka dou na vakarorogo ki domoqu, dou taura na uludra na tamata era luve ni nomudou turaga, ka lako mai vei au ki Isirieli e na sabogibogi e na gau-ni-siga vakaoqo. Ia sa tiko ko ira na luvena na tui, era sa lewe vitusagavulu na tamata, vata kei ira na turaga ni koro era a susugi ira.

7Ia ni sa yacovi ira nai vola, era sa tauri ira na luvena na tui, ka mokuti ira e lewe vitusagavulu na tamata, a sa viria na uludra ki na sova, ka vakauta vua ki Isirieli.

8A sa lako na tamata talai, ka tukuna vua, ka kaya, Era sa kauta mai na uludra na luvena na tui. A sa kaya ko koya, Dou binia mai na matamata-ni-koro, me rua nai binibini, ka me sabogibogi mada.

9Ia e na sabogibogi, sa curu yani ko koya, ka laʼki tu, ka kaya vei ira kecega na tamata, Dou sa yalododonu koi kemudou: raica, kaʼu a kitaka na vere vua na noqu turaga, ka mokuta: ia ko cei sa mokuti ira kecega o qo?

10dou kila kina, ni na sega ni lutu ki na qele e dua na mala ni vosa i Jiova, a ya ka vosataka ko Jiova e na vuku ni mataqali i Eapi: ni sa cakava oti ko Jiova na ka ka vosataka ko koya, e na gusu i Eija na nonai talatala.

11A sa mokuti ira kecega sa vo e na yavusa i Eapi mai Isirieli ko Yeu, kei ira kecega na nona turaga, kei ira na wekana, kei ira na nona bete, ka me sega ni vo vua e lewe dua.

12A sa tu cake ko koya, ka lako yani, ka lako ki Samaria. Ni sa yaco ko koya ki na vale ni dauveikoti sipi sa tu e na sala,

13sa sota ko Yeu kei ira na weka i Easiya na tui Juta; a sa kaya, O cei koi kemudou? A ra sa kaya, Sa weka i Easiya koi keitou; ia keitou sa lako sobu me vakacegui ira na luvena na tui kei ira na luvena na ranadi.

14A sa kaya ko koya, Dou tauri ira bula. A ra sa tauri ira bula, a sa vakamatei ira mai nai keli-wai mai na vale ni dauveikoti sipi, era lewe vasagavulu ka rua na tamata, ka sega ni vakabula e dua vei ira.

15Ia ni sa lako tani maikeri ko koya, sa laʼki sota kei Yionatapi na luve i Rekapi, ni sa mai tavaki koya: a sa veikidavaki kaya, a sa kaya vua, Sa dodonu na yalomu me vaka sa vei iko na yaloqu, se segai? A sa kaya ko Yionatapi, Sa vakakina. A sa kaya ko Yeu, Kevaka sa vakakina, me dara veilulu. A sa veilulu kaya; a sa kauti koya cake ki na vale-vodoki.

16A sa kaya ko koya, Daru lako, mo raica na noqu gumatua e na vuku i Jiova. A sa vakavodoki ko koya ki na vale-vodoki.

17A sa lako ki Samaria ko koya, ka mo-kuri ira kecega sa vo vei Eapi mai Samaria, ka me vakarusai koya oti, me vaka na vosa i Jiova, a ya ka vosataka ko koya vei Ilija.

18A sa vakasoqoni ira na tamata kecega ko Yeu, a sa kaya vei ira, Sa qaravi Peali vakalailai ko Eapi; ena qaravi koya vakalevu ko Yeu:

19ia o qo, dou kacivi ira kecega na parofita i Peali mai vei au, ko ira kecega na tamata sa qaravi koya, kei ira kecega na nona bete; me kakua ni yali e dua; ni sa dua nai soro levu meʼu kitaka vei Peali: o koya sa yali kina, ena sega ni bula. A sa kitaka vakai-lawaki ga ko Yeu, ka me vakawabokotaki ira era qaravi Peali.

20A sa kaya ko Yeu, Dou tukuna yani e dua nai soqosoqo e na vuku i Peali. A ra sa tukuna.

21A sa talaki ko Yeu e Isireli kece: a ra sa lako mai ko ira kecega era sa qaravi Peali, a sa sega ni vo na tamata e dua sa tawa lako kina. A ra sa curuma na vale i Peali; a sa oso na vale i Peali e na veitikina kecega.

22A sa kaya ko koya vua sa lewa na vale ni veisulu, Mo kauta mai na veisulu vei ira kecega era sa qaravi Peali. A sa kauta yani vei ira na veisulu.

23A sa laʼki curu ki na vale i Peali Iro Yeu, kei Yionatapi na luve i Rekapi, a sa kaya vei ira era sa qaravi Peali, Dou qara, ka vakararai de sa tiko kei kemudou eke e so era sa qaravi Jiova, me ra tiko duaduaga ko ira era sa qaravi Peali.

24Ia ni ra sa curu me cabora nai madrali kei nai soro kama, sa lesia kitautuba ko Yeu na tamata e lewe walusagavulu, ka kaya, Ke sa dro bula e dua vei ira na tamata kaʼu sa kauta mai ki na ligamudou, ena mate ko koya e na vukuna.

25Ia ni sa cabora oti nai soro kama, sa kaya ko Yeu vei ira nai vakatawa, kei ira na turaga ni valu, Dou curu; dou mokuti ira; me kakua ni curu kituba e dua. A ra sa mokuti ira e na bati ni seleiwau; a sa biuti ira ko ira nai vakatawa kei ira na turaga ni valu, ka lako ki na rara mai na vale i Peali.

26A ra sa kauta kitautuba na veimatakau mai na vale i Peali, ka vakama.

27A ra sa basuka na matakau i Peali, ka basuka na vale i Peali, ka lesia me vale ni veka, ka yacova na siga o qo.

28A sa vakarusai Peali ko Yeu maivei ira na Isireli.

29A sa sega ga ni cegu ni muria ko Yeu nai valavala ca i Yaropiami na luve i Nipati, o koya ka vakaivalavalacataki ira na Isireli, io koi rau na luve ni karavau koula o qori mai Peceli kei Tani.

30A sa kaya vei Yeu ko Jiova, E na vuku ni ko sa caka vinaka ni ko sa ia na ka dodonu e mataqu, ni ko sa kitaka ki na mataqali i Eapi, me vaka na ka kecega ka tu e lomaqu; ena tiko na luvemu e nai tikotiko vakaturaga ni Isireli, ka yacova na kenai kava ni tabatamata.

31Ia ka sa sega ni nanuma ko Yeu me muria na vunau i Jiova na nodra Kalou na Isireli e na yalona taucoko; sa sega ni biuta nai valavala ca i Yaropiami, o koya ka vakaivalavalacataki ira na Isireli.

32E na gauna ko ya, sa vakatekivu ko Jiova me vakalailaitaki ira na Isireli: a sa mokuti ira ko Esaeli e nai yalayala kecega kei Isireli;

33mai na Joritani ka vaka ki na tu i cake, na vanua taucoko ko Kiliati, ko ira na Kati, kei ira na Rupeni, kei ira na Manase, mai Aroeri, a ya sa voleka ki na uciwai ko Erinoni, io ko Kiliati kei Pasani.

34Ia na vo ni cakacaka i Yeu, kei na ka kecega sa cakava ko koya, kei na nona kaukauwa kecega, sa sega li ni volai e nai vola ni veika sa caka e na nodra gauna na tui Isireli?

35A sa moce vata kei ira na nona qase ko Yeu: a sa buluti mai Samaria. A sa tui ko Yioaasi na luvena, me kenai sosomi.

36Ia na gauna sa tui Isireli kina mai Samaria ko Yeu, sa yabaki ruasagavulu ka walu.