II. Ai Kedrai Vola Na Tui 9 - AI VOLA TABU（FIJ1864）

Sa buli me tui Isireli ko Yeu, a sa yaviti rau na tui Isireli kei na tui Juta ko koya, 1-29. Sa biu sobu ko Isepeli mai na katuba ecake, a sa buturaki, 30-37.

1A SA kaciva ko Ilisa e dua vei ira na luvedra na parofita, ka kaya vua, Mo vauca na tolomu, ka kauta na tavaya waiwai o qo e ligamu, ka lako ki Ramoci-kiliati:

2ia ni ko sa yaco kina, mo qarai Yeu maikea, o koya na luve i Yiosafati na luve i Nimisi, ia mo curu, ka me tu cake ko koya e na kedratou maliwa na wekana, ia mo kauti koya ki loqi;

3mo qai taura na tavaya waiwai, ka livia ki na uluna, ka kaya, Sa vosa vakaoqo ko Jiova, Au sa lumuti iko mo tui Isireli. Mo qai dolava na katuba, ka dro, ka kua ni wawa.

4A sa lako yani ki Ramoci-kiliati na cauravou, io na parofita cauravou.

5Ia ni sa yaco kina ko koya, raica, eratou sa tiko ko iratou na turaga ni valu; a sa kaya ko koya, Sa dua na noqu vosa vei iko, i turaga ni valu. Asa kaya ko Yeu, Vei cei vei keitou kecega? A sa kaya ko koya, Vei iko, i turaga ni valu.

6A sa tu cake ko koya, ka laʼki curu ki na vale: a sa livia ko koya na waiwai ki na ulu i koya, a sa kaya vua, Sa vosa vakaoqo ko Jiova na nodra Kalou na Isireli, Au sa lumuti iko mo nodra tui na tamata i Jiova, io, mo nodra na Isireli.

7Ia ko na mokuta na mataqali i Eapi na nomu turaga, ka meʼu cudruvaka vei Isepeli na kedra dra na noqui talatala na parofita, kei na kedra dra nai talatala kecega i Jiova:

8ia ena rusa kecega na mataqali i Eapi; ia kaʼu na muduka vei Eapi na tagane kecega, io, ko koya sa sogolati kei koya sa lako voli e Isireli:

9ia kaʼu na cakava na mataqali i Eapi me tautauvata koi na mataqali i Yaropiami na luve i Nipati, ka tautauvata kei na mataqali i Pasa na luve i Eiiya:

10ia ena kani Isepeli ko ira na koli e na tiki ni vanua mai Isirieli, ka na sega e dua me buluta. A sa dolava na katuba ko koya, ka dro.

11A sa curu yani ko Yeu vei ira na nona tamata na nona turaga: a sa tarogi, Sa vinaka beka? a cava e lako mai kina vei iko na sesewa o qo? A sa kaya vei ira ko koya, Dou sa kila na tamata, kei na ka sa tukuna.

12A ra sa kaya, E lasu; mo tukuna mada mai vei keitou. A sa kaya ko koya, Sa vosa vakaoqo vei au ko koya, ka kaya, Sa vosa vakaoqo ko Jiova, Au sa lumuti iko mo tui Isireli.

13Era sa qai kusarawa, ka dui taura yadua na tamata na nonai sulu, ka viria me tiko kina ko koya e na dela ni cabecabe, a ra sa uvu davui, ka kaya, Sa tui ko Yeu.

14A sa buki vere vei Yorami ko Yeu, na luve i Yiosafati na luve i Nimisi. (Ia sa vakatawai Ramoci-kiliati tiko ko Yorami, o koya kei ira kecega na Isireli, e na vuku i Esaeli na tui Siria.

15A sa lesu ko Yorami na tui me bula mai Isirieli mai na vue sa vuetaki koya kina ko ira na kai Siria, ni ka veivala ko koya kei Esaeli na tui Siria.)

A sa kaya ko Yeu, Kevaka sa lomamudou, me kakua ni lako yani o dua me dro mai na koro mo laʼki tukuna mai Isirieli.

16A sa vodo lako e na vale-vodoki ko Yeu, ka lako ki Isirieli, ni sa koto maikeri ko Yorami. A sa lako sobu mai me raici Yorami ko Easiya na tui Juta.

17A sa tu nai vakatawa o na dela ni vale-cecere mai Isirieli, a sa irova nai vavakoso i Yeu ni sa lako tiko mai, a sa kaya, Au sa raica e dua nai vavakoso. A sa kaya ko Yorami, Me kau o dua na tamata sa dauvodo e na ose, ka tala mo tavaki ira, ka me kaya, Sa vinaka beka?

18A sa lako ko koya sa vodo e na ose me tavaki koya, a sa kaya, Sa vosa vakaoqo na tui, Sa vinaka beka? A sa kaya ko Yeu, A cava me nomu kina na vinaka? mo sudra ki dakuqu. A sa tukuna nai vakatawa, ka vaka, Sa yaco vei ira ko koya ka talai, a sa sega ni lako tale mai.

19A sa tala e dua tale sa vodo e na ose, a sa yaco vei ira, ka kaya, Sa vosa vakaoqo na tui, Sa vinaka beka? A sa kaya ko Yeu, A cava me nomu kina na vinaka? mo sudra ki dakuqu.

20A sa tukuna nai vakatawa, ka kaya, Sa yaco vei ira ko koya, ka sega ni lesu tale mai: ia nai lakolako sa vaka nai lakolako i Yeu na mokubuna ko Nimisi; ni sa lako vakusakusa.

21A sa kaya ko Yorami, Dou vakarau; a sa vakarautaki na nona vale-vodoki. A rau sa dui lako yani e nona vale-vodoki ko Yorami na tui Isireli, kei Easiya na tui Juta, me rau laʼki tavaki Yeu; a rau sa tavaki koya e nona yasana ko Napoci na kai Isirieli.

22Ia ni sa raici Yeu ko Yorami, sa kaya, Sa vinaka beka, i Yeu? A sa kaya ko koya, A cava me vinaka kina, ni sa vuqa sara na dauyatagane i Isepeli na tinamu, kei na nonai valavala vakatevoro?

23A sa vakalesuya na ligana ko Yorami, ka dro, ka kaya vei Easiya, Sa dua na vere, i Easiya.

24A sa taura na dakai e ligana ko Yeu, ka vanai Yorami e na macawa ni tabana, a sa basika sara ki na utona na gasau, ka vuka waru, a sa bale ko koya e loma ni nona vale-vodoki.

25Sa qai kaya ko koya vei Pitikari na nona turaga ni valu, Mo laveta cake; mo biuti koya ki na tiki ni vanua nei Napoci na kai Isirieli; mo nanuma ni sa tauca vua ko Jiova nai colacola o qo, ni daru a vodo lako vata tiko ka muri Eapi na tamana;

26ni sa kaya ko Jiova, Au a kunea vakaidina e na noa na dra i Napoci, kei na kedratou dra na luvena; ia kaʼu na sauma vei iko e na tikina o qo, sa kaya ko Jiova. Ia o qo, mo laveta cake, mo biuti koya ki na tikina ko ya, me vaka na vosa i Jiova.

27Ia ni sa raica o qori ko Easiya na tui Juta, sa dro ko koya e na sala ni vale e na were. A sa cicimuri koya ko Yeu, ka kaya, Dou mokuti koya talega e na vale-vodoki. A ra sa kitaka e na sala sa lako cake ki Kuri, a ya sa voleka ki Ipiliami: a sa dro ko koya ki Mikito, ka mate maikina.

28A sa kauti koya ki Jerusalemi ko ira na nona tamata, e na vale-vodoki, ka buluta vata e nonai bulubulu kei ira na nona qase mai na koro i Tavita.

29Ia e na kenai katinikadua ni yabaki i Yorami na luve i Eapi, sa tui Juta mai ko Easiya.

30A sa lako ki Isirieli ko Yeu, a sa rogoca ko Isepeli, a sa suki loa ki matana e rua ko koya, ka vakaiukuukutaka na uluna, ka iro mai na katuba ecake:

31a sa kava ko koya, ni sa curu tiko e na matamata-ni-koro ko Yeu, Sa vinaka li ko Simiri, ni sa vakamatea oti na nona turaga?

32A sa ta cake na matana vaka ki na katuba ecake, a sa kaya, Ko cei sa totaki au? ko cei? A sa irovi koya e rua se tolu na matanivanua.

33A sa kaya ko koya, Dou biuti koya sobu. A ra sa biuti koya sobu: a sa bisa e so na nona dra ki na bai, kei na veiose: a sa butubutuki ko koya.

34A sa curu ko koya, ka kana ka gunu, a sa kaya, Dou laʼki raica na alewa o qo sa rusa, ka buluta; ni sa luve ni tui ko koya.

35A ra sa laʼki buluta: a ra sa kunea walega e so na tikina, na nona qavokavoka, kei na yavana, kei na qeteqete ni ligana.

36A ra sa lesu tale yani, ka tukuna vua. A sa kaya ko koya, O qori na vosa i Jiova, a ya ka vosataka ko koya e na gusu i Ilija na kai Tisipa na nonai talatala, ni sa kaya, Ena kania na lewe i Isepeli ko ira na koli e na tiki ni vanua mai Isirieli:

37ia na yago i Isepeli ena vaka na de ni manumanu e na dela ni vanua, e na tikina mai Isirieli; era na sega ni kaya kina, O qo ko Isepeli.