II. Ai Kedrai Vola Na Tui 8 - AI VOLA TABU（FIJ1864）

Sa vakasuka ko na tui vua na alewa ni Sunemi na nona vanua, 1-6. Sa vakamatea na tui Siria ko Esaeli, ka qai tui ko koya, 7-15. Sa tui Juta ko Yiorami, 16-39. Sa vuki ko Lipina kei Itomi, 20-24. Sa tui Juta ko Easiya, 25-29.

1A SA vosa ko Ilisa vua na alewa ka vakabula na luvena ko koya, ka kaya, Mo ia, ka mo dou lako kei ira na nomu lewe-ni-vale, ka laʼki tiko vulagi e na dua na vanua ko sa tiko vulagi rawa kina: ni sa kaciva na dausiga ko Jiova; ia ena yaco tiko ki na vanua ka yabaki vitu.

2A sa ia na alewa, ka kitaka me vaka na nona vosa na tamata ni Kalou: a sa lako yani ko koya kei iratou na nona lewe-ni-vale, ka tiko vulagi e na nodra vanua na kai Filisitia ka yabaki vitu.

3Ia ni sa oti e vitu na yabaki, sa qai lesu mai na alewa mai na nodra vanua na kai Filisitia, ka laʼki tagi vua na tui e na vuku ni nona vale kei na nona vanua.

4A sa veivosaki tiko na tui kei Keesi na nona cauravou na tamata ni Kalou, a sa kaya. Mo tukuna mada mai vei au na ka levu kecega ka cakava ko Ilisa.

5A sa yaco, ni sa tukuna tiko vua na tui ni ka vakabula ko koya e dua sa mate, raica, na alewa, o koya ka vakabula na luvena ko koya, sa tagi vua na tui e na vuku ni nona vale kei na nona vanua. A sa kaya ko Keesi, I noqu turaga na tui, o qo na alewa, o qo talega na luvena ka Vakabula ko Ilisa.

6A sa taroga na alewa ko na tui, a sa tukuna vua ko koya. A sa lesia vua ko na tui e dua na turaga, ka kaya, Mo vakasuka na nona ka kecega, kei na vua kecega ni tiki ni vanua mai na siga ka lako tani kina e na vanua, ka yacova na siga o qo.

7A sa lako ki Tamasiko ko Ilisa; a sa tauvi mate ko Peni-etati na tui Siria; a sa tukuni vua, ka vaka, Sa lako mai kike ko koya na tamata ni Kalou.

8A sa kaya na tui vei Esaeli, Mo kauta e ligamu e dua na ka-ni-loloma, ka laʼki tavaki koya na tamata ni Kalou, ka tarogi Jiova vua, ka kaya, Au na bula tale mai na mate o qo, se segai?

9A sa laʼki tavaki koya ko Esaeli, ka kauta e ligana e dua na ka-ni-loloma, io na ka e so mai na ka vinaka kecega e Tamasiko, e kauta rawa na kameli e vasagavulu, ka laʼki tu e matana, a sa kaya, Sa talai au vei iko ko na luvemu na tui Siria ko Peni-etati, me kaya, Au na bula tale mai na mate o qo, se segai?

10A sa kaya vua ko Ilisa, Mo laʼki kaya vua, E rawa ga mo bula: ia ka sa vakatakila vei au ko Jiova, ni na mate vakaidina ko koya.

11A sa vakataudeitaka na matana ni sa rai matua, ka qai madua; a sa tagi ko koya na tamata ni Kalou.

12A sa kaya ko Esaeli, A cava e tagi kina na noqu turaga? A sa kaya ko koya, E na vuku niʼu sa kila na ka ca ko na cakava vei ira na luve i Isireli: a nodra Veikoro kaukauwa ko na vakama e na buka, kei ira na nodra cauravou ko na vakamatea e nai seleiwau, kei ira na nodra gone lalai ko na vakamatea laivi, ka tavai ira na nodra alewa era sa bukete voli.

13A sa kaya ko Esaeli, Sa cava na nomu tamata, na koli ga, meʼu kitaka na ka levu o qo? A sa kaya ko Ilisa, Sa vakatakila vei au ko Jiova ni ko na tui Sina.

14A sa lako tani ko koya vei Ilisa, ka lako ki na nona turaga; a sa kaya vua ko koya, A cava na ka sa kaya vei iko ko Ilisa? A sa kaya ko koya, Sa kaya vei au ni ko na bula vakaidina.

15Ia e na sabogibogi, sa kauta ko koya na gatu, ka tonisua e na wai, ka tevuka ki na mata i koya, a sa mate kina: a sa tui ko Esaeli, me kenai sosomi.

16IA e na kenai kalima ni yabaki i Yorami na tui Isireli, na luve i Eapi, ni sa tui Juta ko Yiosafati, sa tui mai ko Yiorami na luve i Yiosafati na tui Juta.

17Sa tolusagavulu ka rua na nona yabaki ni sa mai tui; a sa tui tiko mai Jerusalemi ka yabaki walu.

18A sa muria ko koya na nodrai valavala na tui Isireli, me vaka sa cakava na mataqali i Eapi: ni sa watina ko na luve i Eapi: a sa caka ca ko koya e na mata i Jiova.

19Ia ka sa sega ni via vakawabokotaki ira na Juta ko Jiova, e na vuku i Tavita na nonai talatala, me vaka ka kaya vua me solia tikoga vua na cina, vei ira talega na luvena.

20E na nona gauna sa bese ni qaravi ira tiko na Juta ko ira na Itomi, ka bulia e dua me nodra tui.

21A sa lako yani ko Yorami ki Sairi, ka vata kaya na veivale-vodoki kecega: a sa tu cake ko koya e na bogi, ka mokuti ira na kai Itomi era sa vakavolivoliti koya, kei ira na turaga ni veivale-vodoki: a ra sa dui dro ko ira na tamata ki nona vale.

22Ia ka sa bese tiko ni qaravi ira na Juta ko ira na Itomi, ka yacova na gauna o qo. A sa vuki ko ira na kai Lipina talega e na gauna ko ya.

23Ia na vo ni cakacaka i Yorami, kei na ka kecega sa cakava ko koya, sa sega li ni volai e nai vola ni veika sa caka e na nodra gauna na tui Juta?

24A sa moce vata ko Yorami kei ira na nona qase, ka sa buluti kei ira na nona qase e na koro i Tavita: a sa tui ko Easiya na luvena, me kenai sosomi.

25E na kenai katinikarua ni yabaki i Yorami na tui Isireli, na luve i Eapi, sa qai tui mai ko Easiya na luve i Yiorami na tui Juta.

26E ruasagavulu ka rua na nona yabaki ko Easiya ni sa mai tui; a sa tui mai Jerusalemi ka yabaki dua. Ia na yaca i tinana ko Acaliya na luve i Omiri na tui Isireli.

27A sa muria ko koya nai valavala ni mataqali i Eapi, ka caka ca e na mata i Jiova, me vaka na mataqali i Eapi: ni sa veivugone ko koya kei na mataqali i Eapi.

28A rau a lako kei Yorami na luve i Eapi ki nai valu vei Esaeli na tui Siria mai Ramoci-kiliati; a ra sa vuetaki Yorami na kai Siria.

29A sa lesu tale ki Isirieli ko Yorami na tui, me bula mai na vue era a vuetaki koya kina mai Rama ko ira na kai Siria, ni rau a veivala kei Esaeli na tui Siria. Ia ko Easiya na luve i Yiorami na tui Juta, sa lako sobu me raici Yorami na luve i Eapi mai Isirieli, e na vuku ni sa vuetaki tu ko koya.