II. Ai Kedrai Vola Na Tui 7 - AI VOLA TABU（FIJ1864）

Sa vakarerei ira na kai Siria ko Jiova, ka ra sa dro; sa qai lako ko ira na Isireli, ka tokitaka ki Samaria na nodra ka na kai Siria.

1A SA kaya ko Ilisa, Dou rogoca na vosa i Jiova: Sa vosa vakaoqo ko Jiova, E na sabogibogi, e na gau-ni-siga vakaoqo, ena volitaki mai na matamata-ni-koro ni Samaria, e dua nai vakarau madrai droka vinaka e na dua na sikeli, ka rua nai vakarau parile e na dua na sikeli.

2A sa vosa mai e dua na turaga ka ravita na ligana ko na tui, a sa kaya vua na tamata ni Kalou, Raica, kevaka sa cakava ko Jiova e so na katuba mai lomalagi, sa yaco rawa beka na ka o qo? A sa kaya ko koya, Raica, ko na kunea e na matamu, ia ko na sega ni kana kina.

3A sa tiko na tamata vukavuka e lewe va mai nai sogo ni matamata-ni-koro: a ratou sa veikayaki vakai iratou, Edatou sa tiko eke me datou mate e na vuku ni cava?

4kevaka edatou kaya, Me datou curu ki na koro, sa tiko e na koro na viakana, ia edatou na mate maikina: ia kevaka edatou tikoga eke, tou na mate talega: ia o qo, tou lako yani, tou laʼki lutu ki na nodrai valu na kai Siria; kevaka era na vakabulai kedatou, edatou na bula; ia kevaka era na vakamatei kedatou, edatou na mate ga.

5A ratou sa tu cake ni sa butobuto vakalailai mai, me lako ki na nodrai tikotiko ni valu na kai Siria: a ra sa yaco sara ki nai yalayala ni nodrai tikotiko ni valu na kai Siria, ka raica, sa sega na tamata maikea.

6Ni sa vakarorogotaka vei ira nai valu ni Siria ko na Turaga na rorogo ni veivale-vodoki, kei na rorogo ni veiose, io na rorogo ni valu levu: a ra sa veikayaki vakai ira, Raica, sa voli iratou ko na tui Isireli na nodra tui na luve i Eci, kei iratou na nodra tui na kai Ijipita, me ra mai lutuki keda.

7A ra sa ia ka dro ni sa butobuto vakalailai mai, i ka biuta na nodra veivale gatu, kei na nodra veiose, kei na nodra veiasa, io nai tikotiko ni valu sa toka ga, ka dro me ra bula kina.

8Ia ni ratou sa yaco ko iratou na vukavuka o qori ki nai yalayala ni tikotiko ni valu, eratou sa curu ki na dua na vale gatu, ka kana ka gunu, ka kauta tani maikina na siliva, kei na koula, kei nai sulu, ka laʼki vunia; ia eratou sa lesu tale, ka curu ki na dua tani na vale gatu, ka kauta talega maikina, ka laʼki vunia.

9Eratou sa qai veikayaki vakai iratou, Sa sega ni ka dodonu na ka edatou sa cakava: a siga ni rogorogo vinaka na siga o qo, ia edatou sa galu ga: kevaka edatou sa waraka na rarama ni sabogibogi, ena yacovi kedatou na ka ca: ia o qo, tou lako, tou laʼki tukuna e na vale ni tui.

10A ratou sa lako ka kacivi iratou mai na matamata-ni-koro: a ratou sa tukuna vei iratou, ka kaya, Keitou a lako ki na nodrai tikotiko ni valu na kai Siria, ka raica, sa sega na tamata sa tiko kina, se na domo ni tamata, a sa noka tu ga na veiose, ka noka na veiasa, kei na veivale gatu sa toka ga.

11Ia sa kacikaci ko iratou mai na matamata-ni-koro; a ratou sa tukuna kivei ira e na vale ni tui.

12A sa tu cake na tui e na bogi, ka kaya vei iratou sa qaravi koya, Au na vakatakila vei kemudou na ka era sa cakava vei keda ko ira na kai Siria. Era sa kila ni da sa viakana; a ra sa lako tani kina mai nai tikotiko ni valu me vuni ira e na were, ni ra kaya, Ni ra sa curu yani mai na koro, eda na tauri ira bula, ka curu ki na koro.

13A sa vosa e dua maivei iratou sa qaravi koya, ka kaya, Me kauti mada e lima vei ira na ose sa vo tu, a ya sa vo e loma ni koro, (raica, eratou sa tautauvata kei na lewe vuqa kecega na Isireli sa vo tu kina; raica, eratou sa tautauvata kei na lewe vuqa kecega na Isireli sa mate:) ia tou talaki me da raica.

14Era sa kauta kina e rua na ose ni vale-vodoki; a sa tala ko na tui me muria na nodrai valu na kai Siria, ka kaya, Drau laʼki raica.

15A rau sa laʼki muri ira ka yacova na Joritani: ka, raica, sa oso walega na salatu e na veisulu kei nai yaya, ka ra sa biuta tani na kai Siria ni ra sa vakusakusa. A sa lesu mai koi rau ka talai, ka tukuna vua na tui.

16A sa curu yani ko ira na tamata, ka yanaka na nodrai tikotiko ni valu na kai Siria. A sa volitaki e dua nai vakarau madrai droka vinaka e na dua na sikeli, ka rua nai vakarau parile e na dua na sikeli, me vaka na vosa i Jiova.

17Ia sa lesia ko na tui na turaga ka ravita eliu na ligana ko koya, me vakatawa na matamata-ni-koro: a ra sa butuki koya mai na matamata-ni-koro ko ira na tamata, a sa mate kina ko koya, me vaka ka vosataka ko na tamata ni Kalou, o koya ka vosa ni sa lako sobu na tui vei koya.

18A sa yaco me vaka ka vosataka ko na tamata ni Kalou vua na tui, ni sa kaya, Ena volitaki e rua nai vakarau parile e na dua na sikeli, ka dua nai vakarau madrai droka vinaka e na sikeli e dua, mai na matamata-ni-koro mai Samaria, e na gau-ni-siga vakaoqo e na sabogibogi:

19a sa vosa vua na tamata ni Kalou na turaga ko ya, ka kaya, Raica, kevaka sa cakava ko Jiova e so na katuba mai lomalagi, sa yaco rawa beka na ka sa vakaoqo? A sa kaya ko koya, Raica, ko na kunea e na matamu, ia ko na sega ni kana kina.

20A sa yaco vakakina vua: ni ra sa butubutuka ko ira na tamata mai na matamata-ni-koro, a sa mate kina ko koya.