II. Ai Kedrai Vola Na Tui 6 - AI VOLA TABU（FIJ1864）

Sa nawa na kaukamea, 1-7. Sa tukuna ko Ilisa na ka e nakita ko na tui Siria, 8-13. Sa tala nai valu levu na tui Siria ki Tocani, a ra sa vakamatabokotaka ka ra vakauti ki Samaria, 14-23. Sa kabai tale ko Samaria, ka levu kina na dausiga, 24-33.

1A SA kaya vei Ilisa ko ira na luvedra na parofita, Raica mada, sa osooso vei keda na tikina eda sa tiko kina kei iko:

2tou lako mada ki na Joritani, ka kauta maikina me tauyadua na tamata e dua na taba ni kau, ia me da kitaka maikina e dua na tikina, me da tiko maikea. A sa kaya ko koya, Dou lakani.

3A sa kaya e dua, Me vinaka mada vei iko, mo lako kei keitou na nomu tamata. A sa kaya ko koya, Au na lako.

4A sa lako vata kei ira ko koya. Ia ni ra sa yaco ki na Joritani, era sa ta kau.

5Ia ni sa taya tiko e dua na coka e lewe dua, sa lutu ki wai na matau; a sa qoqolou ko koya, ka kaya, Ule, noqu turaga! ni sa saravi ga.

6A sa kaya na tamata ni Kalou, Sa lutu evei? A sa vakatakila ko koya na tikina vei koya. A sa taya mai ko koya e dua na kau, ka viritaka kikea; a sa nawa na kaukamea.

7A sa kaya ko koya, Mo laveta cake vei iko. A sa dodoka yani na ligana, ka taura.

8A SA kitaka nai valu vei ira na Isireli ko tui Siria, ka bose vata kei ira na nona tamata, ka kaya, E na tikina vaka ena tiko kina na noqui tikotiko ni valu.

9A sa talaki vei tui Isireli ko koya na tamata ni Kalou, a sa kaya, Mo qarauni iko, mo kakua ni lako voli e na tikina vaka: ni ra sa lako sobu kina na kai Siria.

10A sa talaki ko tui Isireli ki na tikina ka tukuna ka vakasalataka vua ko na tamata ni Kalou, ka vakabulai koya maikea, sa sega ni vakadua se vakarua.

11A sa rarawa na yalo i tui Siria e na vuku ni ka o qo; a sa kacivi ira na nona tamata, ka kaya vei ira, Dou na sega beka ni vakatakila vei au, se ko cei vei keda sa totaki koya na tui Isireli?

12A sa kaya e dua vei ira na nona tamata, Sa segai, noqu turaga na tui; ia ko Ilisa, o koya na parofita sa tiko vei ira na Isireli, sa dautukuna vua na tui Isireli na vosa ko sa cavuta e na nomu loqi ni moce.

13A sa kaya ko koya, Dou laʼki raica, se sa evei ko koya, meʼu talaki ka kauti koya tani. A sa tukuni vua, ka vaka, Raica, mai Tocani.

14A sa tala kikea e so na ose, ka so na vale-vodoki, kei nai valu levu: a ra sa lako e na bogi, ka buku na druadrua ni koro.

15A sa sou e na sabogibogi na tamata sa qaravi koya na tamata ni Kalou, a sa curu yani, ka raica, sa buku na druadrua ni koro e nai valu, e na veiose, kei na veivale-vodoki. A sa kaya na nona cauravou vei koya, Ule, noqu turaga! a cava me daru cakava?

16A sa kaya ko koya, Kakua ni rere: ni ra sa lewe vuqa era sa tiko kei kedaru, ka lewe lailai era sa tiko kei ira.

17A sa masu ko Ilisa, ka kaya, I Jiova, mo vakayadrata mada na matana, me rai rawa ko koya. A sa vakayadrata na matana na cauravou ko Jiova; a sa rai ko koya: ka, raica, sa oso na ulu-ni-vanua e na veiose, kei na veivale-vodoki caucaudre, era tiko voliti Ilisa.

18A ra sa lako sobu vua, a sa vakamamasu vei Jiova ko Ilisa, ka kaya, Mo yaviti ira mada na tamata o qo, me ra mataboko. A sa yaviti ira ko koya me ra mataboko, me vaka na vosa i Ilisa.

19A sa kaya vei ira ko Ilisa, Sa sala tani o qo; a sa koro tani o qo: dou muri au, kaʼu na kauti kemudou vua na tamata dou sa vakasaqara tiko. A sa vakauti ira ki Samaria.

20Ia ni ra sa yaco ki Samaria, sa kaya ko Ilisa, I Jiova, mo vakayadrata na matadra na tamata o qo, me ra rai rawa. A sa vakayadrata na matadra ko Jiova, a ra sa rai rawa; ka, raica, era sa tiko e na loma i Samaria.

21Ia ni sa raici ira ko tui Isireli, sa kaya vei Ilisa, Na tamaqu, meʼu yavita, meʼu yavita, no?

22A sa kaya ko koya, Mo kakua ni yavita: ko na yaviti ira li ko sa vakabobulataka e na nomui seleiwau kei na nomu dakai? mo tauca e matadra na kakana kei na wai, me ra kana ka gunu, ka lako yani ki na nodra turaga.

23A sa cakava ko koya na magiti levu vei ira: a ra sa kana ka gunu, a sa talai ira yani ko koya, a ra sa lako ki na nodra turaga. A sa sega ni lako tale na nodra veimataivalu na kai Siria ki na nodra vanua na Isireli.

24A SA oti na ka o qo, sa vakasoqona vata na nonai valu taucoko ko Peni-etati na tui Siria, ka lako cake, ka buku na druadrua ki Samaria.

25A sa levu na viakana mai Samaria: ka, raica, sa buku tiko na druadrua, ka me volitaki mada kina e dua na ulu ni asa e na siliva e walusagavulu, kei na de ni ruve sa sega ni dua na painiti e na siliva e lima.

26Ia ni sa lako voli e na dela ni bai ko tui Isireli, sa tagi e dua na alewa vei koya, ka kaya, Mo veivuke, noqu turaga na tui.

27A sa kaya ko koya, Kevaka e sega ni vukei iko ko Jiova, au na vukei iko maivei? mai na rara ni sila, se nai keli-waini?

28A sa kaya na tui vei koya, O sa vakaevei? A sa kaya ko koya, Sa kaya vei au na alewa o qo, Mo solia na luvemu me daru kania edaidai, edaru na qai kania na luvequ e na sabogibogi:

29ia edaru a saqata na luvequ, ka kania: kaʼu a qai kaya vua e na siga sa muri, Mo solia na luvemu, me dara kania: a sa vunia na luvena ko koya.

30Ia ni sa rogoca ko na tui na nona vosa na alewa, sa dresulaka na nonai sulu; a sa lako voli ko koya e na dela ni bai, a sa rai voli ko ira na tamata, ka, raica, sa vakaisulutaki na yagona e nai sulu ca.

31A sa kaya ko koya, Me cakacaka vakakina vei au na Kalou, ka vakaikuritaka talega, ke sa tu vei Ilisa na luve i Safati na uluna edaidai.

32A sa tiko e nona vale ko Ilisa, a sa tiko kaya ko ira na qase; a sa tala yani ko na tui e dua na tamata: ni sa sega ni yaco nai talatala vei koya, sa kaya ko koya vei ira na qase, Dou sa raica, se segai, ni sa talaki na luve ni dauvcivakamatei ko ya me seledrutia na uluqu? dou raica, ni sa lako mai nai talatala, dou sogota na katuba, ka tauri koya matua mai na katuba: sa sega li ni muri koya nai rogo ni yava ni nona turaga?

33Ni sa veivosaki tiko kei ira, raica, sa lako sobu mai nai talatala vei koya, a sa kaya vua, Raica, sa maivei Jiova na ca o qo; meʼu waraki Jiova tiko e na vuku ni cava?