II. Ai Kedrai Vola Na Tui 5 - AI VOLA TABU（FIJ1864）

Sa lako ko Neemani kivei Ilisa, me vakabulai mai na nona vukavuka, 1-19. Sa laʼki lasu ko Keesi kivei Neemani, ka qai tauvi koya na vukavuka, 20-27.

1IA ko Neemani, na turaga ni nonai valu na tui Siria, sa tamata vakaturaga e mata ni nona turaga, ka vakarokorokotaki, e na vuku ni sai koya ka vakabulai Siria kina ko Jiova: a sa tamatai valu kaukauwa, ia ka sa tauvi vukavuka.

2Ia era a lako yani vakamataivalu eliu na kai Siria, ka kauta tani e dua na gonealewa lailai mai na nodra vanua na Isireli; a sa dauqarava na wati i Neemani ko koya.

3A sa kaya ko koya vua na nona marama, Me sa tiko mada na noqu turaga e matana na parofita mai Samaria! ena qai vakabulai koya ko koya mai na nona vukavuka.

4A sa lako e dua, ka tukuna vua na nona turaga, ka kaya, Sa vosa vakaoqo na gonealewa, o koya sa mai na vanua nei Isireli.

5A sa kaya na tui Siria, Mo ia, mo lako, ia kaʼu na vakauta e dua nai vola vua na tui Isireli. A sa lako yani ko koya, ka kauta e ligana e tini na taledi siliva, ka ono na udolu na koula, kei nai sulu me rauti vakatini.

6A sa kauta ko koya nai vola vua na tui Isireli, a ya sa vaka, O qo, ni sa yaco vei iko nai vola o qo, raica, kaʼu sa tala vei iko na noqu tamata ko Neemani, mo vakabulai koya kina mai na nona vukavuka.

7Ia ni sa wilika oti nai vola ko na tui Isireli, sa dresulaka na nonai sulu, a sa kaya, Oi au beka na Kalou, meʼu ia na veivakamatei kei na veivakabulai, sa talaki kina vei au na tamata o qo meʼu Vakabula e dua na tamata mai na nona vukavuka? ia dou kila mada, ka raica, ni sa via vakatubu ca vei au ko koya.

8Ia ni sa rogoca ko Ilisa na tamata ni Kalou ni sa dresulaka na nonai sulu ko na tui Isireli, sa talaki vua na tui, ka kaya, A cava ko sa dresulaka kina na nomui sulu? me lako mada mai vei au ko koya, me kila ni sa dua na parofita e Isireli.

9A sa lako mai ko Neemani kei na nona veiose kei na nona vale-vodoki, a sa tu mai na katuba ni vale i Ilisa.

10A sa tala e dua nai talatala vei koya ko Ilisa, ka kaya, Mo laʼki sisili vakavitu e na Joritani, ena qai lesu mai vei iko na lewemu, ia ko na savasava mai.

11A sa cudru ko Neemani, ka lako tani, ka kaya, Kaica, kaʼu a vakasama, ni na curu vakaidina mai vei au ko koya, ka tu, ka masuta na yaca i Jiova na nona Kalou, ka yalovaka na ligana e dela ni tikina, ka vakabula na vukavuka:

12sa sega li ni vinaka cake ko Epana kei Paripari, na uciwai mai Tamasiko, e na wai kecega ni Isireli? meʼu kua li ni sisili maikina, ka savasava mai? a sa vuki rubu ko koya, ka lako vakacudrucudru yani.

13A sa toro voleka ko ira era sa qaravi koya, ka vosa vua, ka kaya, I tamaqu, kevaka ka vakarota vei iko na ka levu ko na parofita, ko a sega li ni cakava? ia sa dodonu vakalevu cake, ni sa kaya ko koya vei iko, Mo sisili, ka ko na savasava.

14Sa qai lako sobu ko koya, ka Silimi koya vakavitu e na Joritani, me vaka na nona vosa na tamata ni Kalou: a sa lesu na lewena me vaka na lewe ni gone lailai, a sa savasava ko koya.

15A sa lesu ko koya vua na tamata ni Kalou, o koya kei ira kece na nona lewe ni sala, a sa laʼki tu e matana: a sa kaya, Raica, au sa qai kila ni sa sega e dua na Kalou e vuravura taucoko, e Isireli duaduaga: ia o qo, mo taura mada e dua nai loloma maivei au na nomu tamata.

16A sa kaya ko koya, Me vaka sa bula ko Jiova, o koya kaʼu sa tu e matana, kaʼu na sega ni taura. A sa cikeva ko koya me taura; a sa bese ko koya.

17A sa kaya ko Neemani, Kevaka sa segai, me soli mada vei au na nomu tamata e so na qele, e kauta rawa e rua na asa; ni na sega ni cabora tale ko na nomu tamata nai soro kama, se dua nai madrali, vei ira na kalou tani, vei Jiova ga:

18me kakua ni cudruva na nomu tamata ko Jiova e na vuku ni ka o qo, ni sa curu na noqu turaga ki na sava i Rimoni me soro maikina, a sa ravita na ligaqu, ia, ni kaʼu sa cuva e na sava i Rimoni; io, ni kaʼu sa cuva e na sava i Rimoni, me kakua mada ni cudruva na nomu tamata ko Jiova e na vuku ni ka o qo.

19A sa kaya vua ko koya, Mo lako e na vakacegu. A sa lako vakalailai yani ko koya.

20A sa vaka ko Keesi, na cauravou i Ilisa na tamata ni Kalou, Raica, sa lomani Neemani o qo na kai Siria ko na noqu turaga, ka sega ni taura maivei koya na ka sa kauta mai ko koya: me vaka sa bula ko Jiova, kaʼu na cicimuri koya, ka kauta mai vua e dua na ka.

21A sa cicimuri Neemani ko Keesi. Ia ni sa raici koya ko Neemani ni sa cicimuri koya tiko, sa sobu yani mai na vale-vodoki mo laʼki tavaki koya, a sa kaya, Sa vinaka tiko, se segai?

22A sa kaya ko koya, Sa vinaka: sa talai au na noqu turaga, ka kaya, Raica, sa qai lako mai vei au edaidai e rua na cauravou, maivei ira na luvedra na parofita, mai na ulu-ni-vanua ko Ifireimi: mo solia mada vei rau e dua na taledi siliva, kei nai sulu me rauti vakarua.

23A sa kaya ko Neemani, Sa leca, mo kauta e rua na taledi. A sa cikevi koya, ka viviraka e rua na taledi siliva e na taga e rua, kei nai sulu me rauti vakarua, ka tauca vei rau na nona tamata e le rua; a rau sa colata, ka sa liutaki koya.

24Ia ni sa yaco ko koya ki na vanua-cecere, sa kauta mai na ligadrau, ka binia e loma ni vale: ka talai rau yani na tamata, a rau sa lako.

25A sa lako ko koya, ka tu e matana na nona turaga. A sa kaya vua ko Ilisa, O sa maivei, i Keesi? A sa kaya ko koya, Sa sega na vanua sa lako kina na nomu tamata.

26A sa kaya vua ko koya, Sa sega beka ni lako na yaloqu ni sa lesu tale na tamata mai na nona vale-vodoki me tavaki iko? sa gauna li o qo me rawa kina na siliva, ka rawa na veisulu, kei na veiolive, kei na veivainivaini, kei na veisipi, kei na veikaravau, kei ira nai talatala, kei ira na vada?

27ena kabiti iko kina na vukavuka i Neemani, kei ira na nomu kawa ka tawa mudu. A sa lako tani ko koya e matana ni sa tauvi vukavuka, sa vaka na uca-vulavula.