II. Ai Kedrai Vola Na Tui 1 - AI VOLA TABU（FIJ1864）

A WASE I. —Sa tukuna ko Ilija, ni na mate ko Easiya na tui Isireli; ka qai taravi koya ko Yiorami.

1IA ni sa mate ko Eapi, sa qai bese ni qaravi ira tiko na Isireli ko ira na Moapi.

2A sa lutu sobu ko Easiya, mai na katuba ecake e nona tiki-ni-vale ecake mai Samaria, a sa malumalumu kina: a sa tala e so nai talatala ko koya, a sa kaya vei iratou, Dou laʼki tarogi Peali-sipupi na kalou ni Ekironi, seʼu na bula tale mai na malumalumu o qo, se segai.

3A sa kaya na agilose i Jiova Vei Ilija na kai Tisipa, Mo ia, mo laʼki tavaki iratou nai talatala i tui Samaria, ka kaya vei iratou, A ka beka ni sa sega na Kalou e Isireli, dou sa lako kina me tarogi Peali-sipupi na kalou ni Ekironi?

4o koya sa kaya kina vakaoqo ko Jiova, Ai mocemoce ko sa cabeta ko na sega ni lako sobu maikina, ko na mate vakaidina ga. A sa lako yani ko Ilija.

5A sa lesu tale vua ko iratou nai talatala, a sa kaya vei iratou ko koya, A cava dou sa qai lesu tale mai kina?

6A ratou sa kaya vua, Sa lako cake mai e dua na tamata me tavaki keitou, a sa kaya vei keitou, Dou lesu tale vua na tui ka talai kemudou, ka kaya vua, Sa vosa vakaoqo ko Jiova, A ka beka ni sa sega na Kalou e Isireli, ko sa talaki kina me tarogi Peali-sipupi na kalou ni Ekironi? o koya o qo ko na sega ni lako sobu mai kina mai nai mocemoce ko sa cabeta, ko na mate vakaidina ga.

7A sa kaya vei iratou ko koya, A tamata vakacava ka lako cake me tavaki kemudou, ka tukuna vei kemudou na vosa o qo?

8A ratou sa kaya vua, A tamata sa vakaisulu e nai sulu vutivutia, ka sa vauci na tolona e nai vau kuli-ni-manumanu. A sa kaya ko koya, Sai koya ko Ilija na kai Tisipa.

9Sa qai tala vua ko koya e dua na turaga ni lewe limasagavulu, kei ira na nona lewe limasagavulu. A sa lako cake vua ko koya: ka, raica, sa tiko ko koya e na dua na dela-ni-koro. A sa kaya ko koya vei koya, O iko na tamata ni Kalou, sa kaya na tui, Mo lako sobu mai.

10A sa vosa ko Ilija vua na turaga ni lewe limasagavulu, ka kaya, Kevaka sa tamata ni Kalou koi au, me lako sobu na buka waqa mai lomalagi, ka kani iko kei ira na nomu lewe limasagavulu. A sa lako sobu na buka waqa mai lomalagi, a sa kani koya kei ira na nona lewe limasagavulu.

11A sa tala tale vua ko koya e dua na turaga ni lewe limasagavulu, kei ira na nona lewe limasagavulu: a sa vosa ko koya, ka kaya vua, O iko na tamata ni Kalou, sa kaya vakaoqo na tui, Mo lako sobu kusarawa mai.

12A sa vosa ko Ilija, ka kaya vei ira, Kevaka sa tamata ni Kalou koi au, me lako sobu na buka waqa mai lomalagi, ka kani iko kei ira na nomu lewe limasagavulu. A sa lako sobu na buka waqa ni Kalou mai lomalagi, ka kani koya kei ira na nona lewe limasagavulu.

13A sa tala tale ko koya na turaga ni kenai katolu ni lewe limasagavulu, kei ira na nona lewe limasagavulu. A sa lako cake na kenai katolu ni turaga ni lewe limasagavulu, ka laʼki vakatekiduru e duruna e na mata i Ilija, ka vakamamasu vua, ka kaya vua, O iko na tamata ni Kalou, me ka talei e matamu na noqu bula, kei na nodra bula na nomu tamata e lewe limasagavulu o qo:

14raica, ka lako sobu na buka waqa mai lomalagi, ka kani rau na turaga ni lewe limasagavulu ka liu, kei na nodrau yalimasagavulu: ia o qo, me ka talei e matamu na noqu bula.

15A sa kaya vei Ilija na agilose i Jiova, Mo drau lako sobu kaya; kakua ni rerevaki koya. A sa tu cake ko koya, ka lako sobu kaya vei koya na tui.

16A sa kaya vua ko koya, Sa vosa vakaoqo ko Jiova, E na vuku ni ko a talai iratou nai talatala me tarogi Peali-sipupi na kalou ni Ekironi, a ka beka ni sa sega na Kalou e Isireli mo taroga nona vosa? o koya o qo ko na sega ni lako sobu mai kina mai nai mocemoce ko sa cabeta, ia ko na mate vakaidina ga.

17A sa mate ko koya, me vaka na vosa i Jiova ka vosataka ko Ilija. A sa tui me kenai sosomi ko Yiorami, e na kenai karua ni yabaki i Yiorami na luve i j Yiosafati na tui Juta; e na vuku ni sa sega na luvena.

18Ia na Vo ni cakacaka i Easiya ka kitaka ko koya, sa sega li ni volai e nai vola ni veika sa caka e na nodra gauna na tui Isireli?