II. Ai Kedrai Vola Na Tui 2 - AI VOLA TABU（FIJ1864）

Sa kauti cake ko Ilija ki lomalagi, 1-11. Sa qai cakava na veika mana na parofita ko Ilisa, 12-25.

1A SA yaco ni sa voleka ni kauti Ilija cake ki lomalagi ko Jiova, e na covu-laca, sa rau lako ko Ilija kei Ilisa mai Kilikali.

2A sa kaya vei Ilisa ko Ilija, Mo tiko mada ga eke; ni sa talai au ki Peceli ko Jiova. A sa kaya ko Ilisa, Me vaka sa bula ko Jiova, ka sa bula na yalomu, kaʼu na sega ni laivi iko. A rau sa lako sobu ki Peceli.

3Ia sa lako yani vei Ilisa ko ira na luvedra na parofita mai Peceli, a ra sa kaya vua, O sa kila beka, ni na kauta tani edaidai na nomu turaga ko Jiova, me kakua ni lewai iko tiko? A sa kaya ko koya, Au sa kila ga; dou tikolo.

4A sa kaya vua ko Ilija, I Ilisa, mo tiko mada ga eke, ni sa talai au ko Jiova ki Jeriko. A sa kaya ko koya, Me vaka sa bula ko Jiova, ka sa bula na yalomu, kaʼu na sega ni laivi iko. A rau sa lako ki Jeriko.

5Ia sa toro vei Ilisa ko ira na luvedra na parofita mai Jeriko, ka kaya vua, O sa kila beka, ni na kauta tani edaidai na nomu turaga ko Jiova, me kakua ni lewai iko tiko? A sa kaya ko koya, Au sa kila ga; dou tikolo.

6A sa kaya vua ko Ilija, Mo tiko mada ga eke; ni sa talai au ko Jiova ki na Joritani. A sa kaya ko koya, Me vaka sa bula ko Jiova, ka sa bula na yalomu, kaʼu na sega ni laivi iko. A rau sa lako ruarua yani.

7Ia ka ra lewe limasagavulu na tamata vei ira na luvedra na parofita, era sa laʼki tu vakayawa me ra vakararai: ia erau sa tu ruarua mai na Joritani.

8A sa taura na nonai sulu ko Ilija, ka lobia, ka yavita na wai, a sa tawase vaka ka vaka, a rau sa lako kina ki tai kadua e na qele mamaca.

9Ia ni rau sa yaco ki tai kadua, sa qai kaya vei Ilisa ko Ilija, Mo kerea na ka meʼu cakava eliu vei iko, niʼu sa sega ni kauti tani vei iko. A sa kaya ko Ilisa, Me tu mada vei au e rua nai votavota ni yalo sa nomu.

10A sa kaya ko koya, Sa dredre na ka ko sa kerea: kevaka ko na raici au niʼu sa kauti tani vei iko, ena yaco vakakina vei iko; ia kevaka e segai, ena segai o qo.

11Ia ni rau sa lakolako tiko, ka veivosaki, raica, sa dua na vale-vodoki caucaudre, ka so na veiose caucaudre, sa tawasei rau e dua mai na dua; a sa lako cake ki lomalagi ko Ilija e na covulaca.

12A sa raica tiko ko Ilisa, a sa qolouvaka, Na tamaqu, na tamaqu! na vale-vodoki nei Isireli, kei ira na nodra tamata sa dauvodo e na ose! A sa sega ni raici koya tiko: a sa taura na nonai sulu, ka sea rua.

13A sa laveta cake nai sulu i Ilija ka lutu mai vua, ka lesu tale, ka laʼki tu e na bati ni Joritani.

14A sa taura ko koya nai sulu i Ilija ka lutu mai vua, ka yavita kina na wai, a sa kaya, Evei ko Jiova na nona Kalou ko Ilija? Ia ni sa yavita oti na wai ko koya talega, sa tawase vaka ka vaka; a sa lako ki tai kadua ko Ilisa.

15Ia ni sa raica ko ira na luvedra na parofita era a tu me vakararai mai Jeriko, era sa kaya, Sa lutu vei Ilisa na yalo i Ilija. A ra sa laʼki tavaki koya, ka ra sa cuva vua ki na qele.

16A ra sa kaya vua, Raica, sa tiko kei keitou na nomu tamata e lewe limasagavulu na tamata kaukauwa; me ra lako madani, ka vakasaqarai koya na nomu turaga: de kauti koya kicake beka na Yalo i Jiova, ka biuti koya ki na dua na ulu-ni-vanua, se ki na dua na qakila. A sa kaya ko koya, Dou kakua ni talaki.

17Ia ni ra sa kitaki koya tiko ka madua, ko koya, sa qai kaya, Dou talaki ga. A ra sa tala na tamata e lewe limasagavulu; a ra sa vakasaqara ka bogi tolu ka sega ni kunea.

18A ra sa lesu tale vua, (ni sa tikoga mai Jeriko ko koya,) a sa kaya ko koya vei ira, Au sa sega beka ni kaya vei kemudou, Dou kakua ni lako?

19A sa kaya vei Ilisa ko ira na lewe ni koro ko ya, Raica mada, sa toka vinaka na koro o qo, me vaka sa raica tiko na noqu turaga; ia ka sa ca na wai, a sa tawa vua na qele.

20A sa kaya ko koya, Dou kauta mai vei au e dua na tavaya vou, ka viria kina na masima. A ra sa kauta vua.

21A sa lako yani ko koya ki na vurevure ni wai, ka biuta kina na masima, a sa kaya, Sa vosa vakaoqo ko Jiova, Au sa vakavina-kataka na wai o qo; ena sega tale maikina emuri na mate se na tawa vua.

22A sa vinaka mai na wai, ka yacova na gauna o qo, me vaka na vosa ka vosataka ko Ilisa.

23A sa lako cake maikea ko koya ki Peceli: ia ni sa lako cake tiko e na sala, sa curu yani mai na koro e so na cauravou lalai, ka vakalialiai koya, ka kaya vua. Mo lako cake, na ulu drika; mo lako cake, na ulu drika.

24A sa gole kimuri ko koya, ka raici ira, ka rukaki ira e na yaca i Jiova. A sa lako yani e rua na pera alewa mai na veikaukau, a rau sa dresulaka e lewe vasagavulu ka rua na gone vei ira.

25A sa lako tani maikea ko koya ki na ulu-ni-vanua ko Karimeli, a sa lesu yani maikea ki Samaria.