I. A Kedrai Vola Na Tui 22 - AI VOLA TABU（FIJ1864）

Sa tavata ko Yiosafati na tui Juta kei Eapi, ka veivala kei ira na kai Siria, ka mate ko Eapi, 1-40. Sa tui Juta ko Yiosafati, 41-50. Sa tui Isireli ko Easiya, 51-53.

1A RA sa tiko ka yabaki tolu ka sega ni veivala ko ira na kai Siria kei ira na Isireli.

2Ia e na kenai katolu ni yabaki, sa lako sobu ko Yiosafati na tui Juta vei koya na tui Isireli.

3A sa kaya na tui Isireli vei ira na nona tamata, Dou sa kila beka ni sa noda ko Ramoci mai Kiliati? ia eda sa tiko lo ga, ka sega ni kauta tani mai na ligana na tui Siria.

4A sa kaya ko koya vei Yiosafati, O na lako kei au ki Ramoci mai Kiliati me ia nai valu, se segai? A sa kaya ko Yiosafati vua na tui Isireli, Ko kedaru vata ga; sa vata ga ko ira na nedaru tamata; sa vata ga ko ira na nedaru ose.

5A sa kaya ko Yiosafati vei koya na tui Isireli, Mo taroga mada na vosa i Jiova edaidai.

6A sa vakasoqoni ira vata na parofita ko na tui Isireli, e va beka na drau na tamata, a sa kaya vei ira, Meʼu lako ki Ramoci mai Kiliati meʼu kitaka kina nai valu, se kakua? A ra sa kaya, Mo lako cake, ia ena solia ko na Turaga ki na ligana na tui.

7A sa kaya ko Yiosafati, Sa sega beka ni tiko eke e dua talega na parofita i Jiova, me daru taroga vua?

8A sa kaya vei Yiosafati ko na tui Isireli, Sa dua tale na tamata, ko Mikayiu na luve i Imila, eda tarogi Jiova rawa kina: ia kaʼu sa cati koya; ni sa sega ni parofisaitaka na ka vinaka e na vukuqu, na ka ca ga. A sa kaya ko Yiosafati, Me kakua ni kaya vakakoya ko na tui.

9Sa qai kaciva e dua na turaga ko na tui Isireli, ka kaya, Me kusarawa mai ko Mikayiu na luve i Imila.

10A rau sa dui tiko e nonai tikotiko vakaturaga, na tui Isireli kei Yiosafati na tui Juta, e na rara mai na matamata-ni-koro ni Samaria, a rau sa vakaisulu e nai sulu vakatui; a ra sa ia tiko na parofisai e matadrau ko ira kecega na parofita.

11A sa cakava ko Sitikiya na luve i Kinana e so na kaukamea vakamanumanu e na aironi; a sa kaya, Sa vosa vakaoqo ko Jiova, O na cumuti ira na kai Siria e na veika o qo, ka mo vakaoti ira.

12A ra sa parofisai vakakina ko ira na parofita kecega, ka kaya, Mo lako cake ki Ramoci mai Kiliati, ka gumatua, ia ena solia ko Jiova ki na ligana na tui.

13Ia sa vosa vei Mikayiu ko nai talatala ka laʼki kaciva, a sa kaya, Raica, na nodra vosa na parofita, sa gusu e dua ga e na ka vinaka vua na tui: me tautauvata mada na nomu vosa kei na nona vosa e dua vei ira, ka mo cavuta na ka vinaka.

14A sa kaya ko Mikayiu, Me vaka sa bula ko Jiova, na ka sa kaya ko Jiova vei au, o qori ga kaʼu na vosataka.

15A sa lako mai ko koya vua na tui.

A sa kaya vua ko na tui, I Mikayiu, me keimami lako ki Ramoci mai Kiliati me vala, se kakua? A sa kaya vua ko koya, Mo lako cake, ka gumatua; ia ena solia ko Jiova ki na ligana na tui.

16A sa kaya vua ko na tui, Meʼu kitaki iko vakavica mada, mo vosavavakini vei au e na yaca i Jiova mo cavuta na dina walega?

17A sa kaya ko koya, Au a raici ira kecega na Isireli, ka ra dui sese e na veiulu-ni-vanua, me vaka na sipi sa sega na nodrai vakatawa: a sa kaya ko Jiova, Sa sega na nodra turaga ko ira o qo: me ra dui lesu e na vakacegu ki na nona vale.

18A sa kaya na tui Isireli vei Yiosafati, Au a sega li ni kaya vei iko, ni na sega ni parofisaitaka ko koya na ka vinaka e na vukuqu, na ka ca ga?

19A sa kaya ko koya, O koya o qo, mo rogoca kina na vosa i Jiova: Au a raici Jiova, ni sa tiko e nonai tikotiko vakaturaga, a ra sa tiko voleka vua e nai matau kei nai mawi ko ira kecega na lewe i lomalagi.

20A sa kaya ko Jiova, O cei ena cikevi Eapi, me lako cake me bale mai Ramoci mai Kiliati? A sa vosa vaka e dua, a sa vosa vaka e dua.

21A sa lako mai na yalo, ka laʼki tu e na mata i Jiova, ka sa kaya, Oi au ga, kaʼu na cikevi koya. A sa kaya vua ko Jiova, E na cava?

22A sa kaya ko koya, Au na lako yani, ia kaʼu na yalo lasu e na gusudra kecega na nona parofita. A sa kaya ko koya, O na ia na cikecike, ka gumatua talega: mo lako yani, ka kitaka vakakina.

23Ia o qo, sa tauca ko Jiova na yalo lasu e na gusudra kecega na nomu parofita o qo, a sa vosataka na ka ca ko Jiova, me yacovi iko.

24Ia sa toro ko Sitikiya na luve i Kinana, ka sabici Mikayiu e baluna, a sa kaya, A sala cava ka lako tani kina vei au na Yalo i Jiova me vosa vei iko?

25A sa kaya ko Mikayiu, Raica, ko na qai kunea e na siga ko na curu kina ki loma ni loqi, me vuni iko.

26A sa kaya na tui Isireli, Mo kauti Mikayiu, ka vakalesuya kivei Amoni, na turaga ni koro, kei Yoasi na luvena na tui,

27ka kaya, Sa vosa vakaoqo na tui, Drau vakacuruma o qo ki na vale ni veivesu, ka vakani koya e na madrai ni veivakararawataki, kei na wai ni veivakararawataki, ka meʼu tale vakacegu mada mai.

28A sa kaya ko Mikayiu, Kevaka ko na lesu vakaidina mai e na vakacegu, sa qai sega ni vosa e gusuqu ko Jiova. A sa kaya, Dou rogoca kecega, oi kemudou na tamata.

29A rau sa lako cake ki Ramoci mai Kiliati, na tui Isireli kei Yiosafati na tui Juta.

30A sa kaya na tui Isireli vei Yiosafati, Au na suluma nai sulu tani, ka lako ki nai valu; ia mo vakaisulutaki iko ga e na nomui sulu vakatui. A sa suluma nai sulu tani na tui Isireli, ka lako ki nai valu.

31Ia na tui Siria, sa rotaka vei ira na turaga ni valu, era lewe tolusagavulu ka rua, era lewa na nona veivale-vodoki, a sa kaya, Dou kakua ni veivala kaya e dua e lailai, se dua e levu, vei koya ga na tui Isireli.

32Ia ni sa raici Yiosafati ko ira na turaga ni veivale-vodoki, era sa kaya, O qori dina ga na tui Isireli. A ra sa lako vakatikitiki me veivala kaya: a sa qoqolou ko Yiosafati.

33Ia ni sa raica ko ira na turaga ni veivale-vodoki ni sa sega ni tui Isireli ko koya, era sa lesu tani kimuri, me kakua ni vakasava.

34A sa dua na tamata sa loka loa ga na dakai, ka vanai koya na tui Isireli e na tikina sa veiuturi kina na veitikina ni nonai sulu ni valu: a sa kaya ko koya vua sa vakauta na nona vale-vodoki, Mo vakalesuya na ligamu, ka kauti au tani e nai valu, niʼu sa vuetaki.

35A sa levu cake tiko nai valu e na siga ko ya: a sa tauri me tu cake rawa na tui e nona vale-vodoki, e na matadra na kai Siria, a sa mate e na yakavi: a sa dave na dra mai na vue ki loma ni vale-vodoki.

36A sa tukuni yani e na kedra maliwa nai valu, ni sa laʼki dromu na siga, ka vaka, Na tamata yadua ki na nona koro, kei na tamata yadua ki na nona vanua.

37A sa mate na tui, a sa kauti ki Samaria; a sa buluti mai Samaria ko na tui.

38Ia ni sa savai tiko na vale-vodoki mai na mata-ni-wai mai Samaria sa dausili kina ko ira na dauyatagane, sa dramica na nona dra ko ira na koli, me vaka na vosa ka cavuta ko Jiova.

39Ia na vo ni cakacaka i Eapi, kei na ka kecega sa cakava ko koya, kei na vale tabua ka cakava ko koya, kei na Veikoro kecega ka tara ko koya, sa sega li ni volai e nai vola ni veika sa caka e na nodra gauna na tui Isireli?

40A sa moce vata kei ira na nona qase ko Eapi; a sa tui ko Easiya na luvena, me kenai sosomi.

41IA ko Yiosafati na luve i Asa, sa mai tui vei ira na Juta e na kenai kava ni yabaki i Eapi na tui Isireli.

42Sa tolusagavulu ka lima na yabaki i Yiosafati ni sa mai tui: a sa lewa tiko mai Jerusalemi ka yabaki ruasagavulu ka lima. Ia na yaca i tinana ko Asupa, na luve i Sili.

43A sa muria nai valavala kecega i Asa na tamana; sa sega ni lako tani kina, me cakava na ka e dodonu e na mata i Jiova: ia ka sa sega ni biu na veitikina cecere; era sa vakacabocabo tiko ko ira na tamata, ka vakacaudreva na ka boi vinaka e na veitikina cecere.

44A rau sa veivinakati ko Yiosafati kei na tui Isireli.

45Ia na vo ni cakacaka i Yiosafati, kei na nona kaukauwa sa cakacaka kina ko koya, kei na nona vala, sa sega li ni volai e nai vola ni veika sa caka e na nodra gauna na tui Juta?

46Ia na kedra vo na tamata sa valavala vaka-Sotoma, o ira ka vo mai na gauna i Asa na tamana, sa vakaotia ko koya mai na vanua.

47Ia sa sega na tui Itomi: sa lesi ga e dua me tui.

48Sa Cakava e so na waqa ni Tarisisi ko Yiosafati, me lako ki Oferi me usa koula mai: a ra sa sega ni lako; ni sa basuraki na veiwaqa mai Esioni-keperi.

49Sa qai kaya ko Easiya na luve i Eapi kivei Yiosafati, Me ra lako vata ga ko ira na noqu tamata kei ira na nomu tamata e na veiwaqa. A sa bese ko Yiosafati.

50A sa moce vata kei ira na nona qase ko Yiosafati, a sa buluti kei ira na nona qase e na koro i Tavita na nona qase: a sa tui ko Yiorami na luvena, me kenai sosomi.

51E NA kenai katinikavitu ni yabaki i Yiosafati na tui Juta, sa mai tui Isireli mai Samaria ko Easiya na luve i Eapi, a sa tui tiko vei ira na Isireli, ka yabaki rua.

52A sa caka ca e na mata i Jiova, ka muria nai valavala i tamana, kei nai valavala i tinana, kei nai valavala i Yaropiami na luve i Nipati, o koya ka vakaivalavalacataki ira na Isireli:

53ni sa qaravi Peali ko koya, ka cuva vua, ka vakacudrui Jiova na nodra Kalou na Isireli, me vaka na ka kecega ka cakava ko tamana.