I. A Kedrai Vola Na Tui 21 - AI VOLA TABU（FIJ1864）

Sa vakamatei ko Napoci, me nei Eapi na nona veivainivaini, 1-16. Sa tukuna ko Ilija na cudru i Jiova vei Eapi kei Isepeli, 17-29.

1A SA oti na veika o qo, sa dua na veivainivaini nei Napoci na kai Isirieli, a ya mai Isirieli, ka sa voleka ki na vale vakaturaga i Eapi, na tui Samaria.

2A sa vosa vei Napoci ko Eapi, ka kaya, Mo solia vei au na nomu veivainivaini, me noqu were ni rourou, e na vuku ni sa voleka ki na noqu vale: ia kaʼu na solia vei iko me kenai sau e dua na veivainivaini e vinaka cake; kevaka ko sa vinakata me kenai voli nai lavo, kaʼu na solia vei iko.

3A sa kaya vei Eapi ko Napoci, Me yawa sara vei au e na vuku i Jiova, meʼu solia vei iko na nodrai votavota na noqu qase.

4A sa laʼki curu ki nona vale ko Eapi, a sa bibi ka yaloca e na vuku ni vosa ka vosataka vua ko Napoci na kai Isirieli, ni sa kaya ko koya, Au na sega ni solia vei iko na nodrai votavota na noqu qase. A sa davo sobu e na nonai mocemoce, ka vagolea tani na matana, a sa bese ni kana.

5A sa lako mai vua ko Isepeli na watina, ka kaya vua, A cava e rarawa kina na lomamu, ka ko sa sega ni kana?

6A sa kaya vua ko koya, E na vuku ni kaʼu a vosa vei Napoci na kai Isirieli, ka kaya vua, Mo solia vei au na nomu veivainivaini me kenai sau nai lavo; ia kevaka ko sa vinakata, kaʼu na solia vei iko e dua na veivainivaini me kenai sau: a sa kaya ko koya, Au na sega ni solia vei iko na noqu veivainivaini.

7A sa kaya vua ko Isepeli na watina, O iko, mo cakacaka vakatui ga e Isireli edaidai: mo tu cake mo kana, ia me marau na yalomu: koi au, au na solia vei iko na veivainivaini nei Napoci na kai Isirieli.

8A sa vola ko koya nai vola e na yaca i Eapi, ka dregata ka tabaka e na mama i koya, ka vakauta nai vola kivei ira na qase kei ira na tamata turaga e nona koro, era tiko vata kei Napoci.

9A sa vola ko koya e nai vola, ka kaya, Dou tukuna e dua na lolo, ka vakatikori Napoci e na tikina cecere vei ira na tamata:

10ja dou lesia e rua na tamata, erau luve ni vu-ni-ca, me tu e matana, ka me beitaki koya, me rau kaya, O a vosavakacacataka na Kalou kei na tui. Ia dou qai kauti koya ki nai bili, ka virika e na vatu, me mate.

11Ia sa cakacaka ko ira na nona lewe ni koro, na qase, kei ira na tamata turaga era tiko e nona koro, me vaka sa talaki kina vei ira ko Isepeli, me vaka sa volai e nai vola ka vakauta vei ira ko koya.

12Era sa tukuna e dua na lolo, ka vakatikori Napoci e na tikina cecere vei ira na tamata.

13A sa curu kina e rua na tamata, erau luve ni vu-ni-ca, a rau sa tiko e matana: ia erau sa beitaki Napoci koi rau na tamata ca, e na matadra na tamata, ka rau kaya, Sa vosavakacacataka na Kalou kei na tui ko Napoci. Erau sa qai kauti koya ki nai bili ni koro, ka virika e na vatu, a sa mate kina.

14Era sa qai talaki vei Isepeli, ka kaya, Sa lauviri e na vatu ko Napoci, a sa mate.

15Ia ni sa rogoca ko Isepeli ni sa lauviri e na vatu ko Napoci, ka sa mate, sa kaya ko Isepeli vei Eapi, Mo ia, mo laʼki taukena na veivainivaini nei Napoci na kai Isirieli, o qori ka bese ni solia vei iko me kenai sau nai lavo; ni sa sega ni bula ko Napoci, a sa mate ga.

16Ia ni sa rogoca ko Eapi ni sa mate ko Napoci, sa ia ko Eapi me lako sobu ki na veivainivaini i Napoci na kai Isirieli, ka me taukena.

17A sa lako mai na vosa i Jiova vei Ilija na kai Tisipa, ka kaya,

18Mo ia, mo lako sobu me tavaki Eapi na tui Isireli, o koya sa tiko mai Samaria: raica, sa e na veivainivaini i Napoci, o qori sa lako sobu kina me taukena:

19ia mo vosa vua, ka kaya, Sa vosa vakaoqo ko Jiova, O sa kitaka oti na veivakamatei, ka lako mo taukei talega, ne? ia mo vosa vua, ka kaya, Sa vosa vakaoqo ko Jiova, E na tikina era a dramica kina na dra i Napoci na veikeli, era na dramica ko ira na koli na nomu dra talega, io na nomu.

20A sa kaya vei Ilija ko Eapi, Sa kunei au beka ko iko, na noqu meca? A sa kaya ko koya, Au sa kunea; e na vuku ni ko sa volitaki iko me caka ca e na mata i Jiova.

21Raica, kaʼu na vakayacora na ca vei iko, ka kauta tani na nomu kawa, ka muduka tani vei Eapi na tagane kecega, kei koya sa sogolati, kei koya sa lako voli, vei ira na Isireli.

22Ia kaʼu na cakava na nomu mataqali me tautauvata kei na mataqali i Yaropiami, na luve i Nipati, ka tautauvata kei na mataqali i Pasa, na luve i Eiiya, e na vuku ni veivakacudrui ko sa kitaka, ni ko sa vakaivalavalacataki ira na Isireli.

23Ia e na vuku i Isepeli, sa vosa ko Jiova, ka kaya, Ena kani Isepeli mai na bai ni Isirieli ko ira na koli.

24O koya sa mate vei Eapi e na koro, ena kania ko ira na koli; kei koya sa mate e na veiwere, ena kania ko ira na manumanu ni lomalagi.

(

25Ia ka sa sega e lewe dua me tautauvata kei Eapi, me volitaki koya me caka ca e na mata i Jiova, o koya ka vakauqeta ko Isepeli na watina.

26A sa kitaka na ka vakasisila sara ko koya, ni sa muria na veimatakau, me vaka na ka kecega sa cakava ko ira na luve i Amori, o ira ka vakaseva ko Jiova e na matadra na luve i Isireli.)

27Ia ni sa rogoca na vosa o qo ko Eapi, sa dresulaka na nonai sulu, ka vakaisulutaka na yagona e nai sulu ca, ka lolo, ka koto e nai sulu ca, ka lako voli vakamalumalumu.

28A sa lako mai na vosa i Jiova vei Ilija na kai Tisipa, ka kaya,

29O sa raica, se segai, ni sa vakamalumalumutaki koya e mataqu ko Eapi? e na vuku ni sa vakamalumalumutaki koya e mataqu, kaʼu na sega ni vakayacora na ca e na nona gauna; e na gauna ni luvena ga kaʼu na vakayacora na ca ki na nona mataqali.