1IA ko Peni-etati na tui Siria, sa vakasoqoni ira vata kecega na nona mataivalu: a ra sa tolusagavulu ka rua na tui era vata kaya, kei na veiose kei na veivale-vodoki: a sa lako cake ko koya, ka buku na druadrua ki Samaria, ka vala kaya.
2A sa tala ko koya e so nai talatala ki loma ni koro kivei Eapi na tui Isireli, a sa kaya vua, Sa vosa vakaoqo ko Peni-etati,
3Sa noqu na nomu siliva kei na nomu koula; a sa noqu ko iratou na watimu kei iratou na luvemu, io ko ira sa vinaka vei ira.
4A sa vosa ko koya na tui Isireli, ka kaya, Me vaka na nomu vosa, noqu turaga na tui; sa nomu koi au, kei na noqu ka kecega.
5A sa lako tale ko ira nai talatala, ka kaya, Sa vosa vakaoqo ko Peni-etati, ka kaya, E dina kaʼu a talaki vei iko, ka kaya, Mo solia mai vei au na nomu siliva, kei na nomu koula, kei iratou na watimu, kei iratou na luvemu;
6ia kaʼu na tala ga vei iko na noqu tamata e so e na sabogibogi e na gau-ni-siga vakaoqo, a ra na vakasaqara e na nomu vale, kei na nodra vale na nomu tamata; ia na ka kecega ko sa domona, me soli ki na ligadra, me ra kauta tani.
7Sa qai kacivi ira kecega na qase ni vanua ko na tui Isireli, a sa kaya, Dou kila mada, ka raica ni sa qara na ka ca na tamata o qo; ni sa talaki vei au me nona ko iratou na watiqu, kei iratou na luvequ, kei na noqu siliva, kei na noqu koula; ia kaʼu a sega ni bureitaka vua.
8Ia sa kaya vua ko ira kecega na qase, kei ira kecega na tamata, Mo kakua ni vakarogoca, se vakadonuya.
9A sa kaya kina ko koya vei iratou nai talatala i Peni-etati, Dou kaya vua na noqu turaga na tui, A ka kecega ko a talaki kina eliu vei au na nomu tamata kaʼu na cakava; ia na ka o qo au sa sega ni cakava rawa. A ratou sa lako yani nai talatala, ka kauta tale vua na vosa.
10A sa talaki vua ko Peni-etati, ka kaya, Me kitaka vakakina vei au ko ira na kalou, ka vakaikuritaka vakaoqo, kevaka sa levu na kuvu-ni-soso mai Samaria me ra tauyadua na tikina sa qumia rawa na ligadra na tamata kecega sa muri au.
11A sa vosa ko na tui Isireli, ka kaya, Dou tukuna, Me kakua ni dokai koya ko koya sa vauca vua nai sulu ni valu me vakataki koya sa luvata.
12Ia ni sa rogoca na vosa o qo ko koya, sa gunu tiko ko koya kei ira na tui e na veivale vakacevaceva, a sa kaya ko koya vei ira na nona tamata, Dou vakarau: a ra sa vakarau me kaba na koro.
13Ka, raica, sa toro mai e dua na parofita vei Eapi na tui Isireli, ka kaya, Sa vosa vakaoqo ko Jiova, O sa raici ira na lewe vuqa kecega o qo, se segai? raica, kaʼu na solia ki na ligamu edaidai: ia ko na kila kina ni sa ko Jiova koi au.
14A sa kaya ko Eapi, E na liga i cei? A sa kaya ko koya, Sa vosa vakaoqo ko Jiova, E na ligadra ga na cauravou era turaga ni vei qali. A sa kaya ko koya, O cei ena lewa nai valu? A sa kaya ko koya, Ko iko.
15A sa wiliki ira na cauravou era turaga ni veiqali ko koya, a ra sa rua na drau ka tolusagavulu ka rua: ka sa oti sa qai wiliki ira kecega na tamata, io ko ira kecega na luve i Isireli, a ra sa lewe vitu na udolu.
16A ra sa curu yani e na siga levu. A sa gunu tiko ko Peni-etati, a sa mateni e na vale vakacevaceva, o koya kei ira na tui, ko ira na tui e lewe tolusagavulu ka rua sa vukei koya.
17A ra sa curu yani eliu na cauravou era turaga ni veiqali; a sa talaki yani ko Peni-etati, a ra sa tukuna vua, ka kaya, Sa ra curu yani e so na tamata mai Samaria.
18A sa kaya ko koya, Kevaka era sa curu mai me ia na sautu, dou taura bula; ia kevaka era sa curu mai me ia nai valu, dou taura bula.
19A ra sa curu yani e na koro na cauravou era turaga ni veiqali, kei ira nai valu era muri ira.
20A ra sa mokuta na tamata yadua na nona tamata: a sa dro ko ira na kai Siria, a sa cicimuri ira ko ira na Isireli; a sa dro bula ko Peni-etati na tui Siria ni sa vodo e na ose, vata kei ira era sa dauvodo e na ose.
21A sa curu yani na tui Isireli, ka mokuta na veiose, kei na veivale-vodoki, a sa mokuti ira na kai Siria e na mokumoku levu.
22A sa toro mai na parofita vua na tui Isireli, ka kaya vua, Mo lako, mo vakaukauwataki iko, ka vakasama, ka raica na ka mo cakava: ni na mai labati iko tale ko na tui Siria ni na yabaki vou.
23Ia sa kaya vua na tui Siria ko ira na nonai talatala, Era sa kalou ni veiulu-ni-vanua na nodra veikalou; o koya era sa gumatua kina vei keda; ia me da veivala mada kei ira e na buca, eda na qai gumatua vakaidina vei ira:
24ia mo cakava na ka o qo, Mo kauti ira tani na tui, na tamata yadua mai na nona tikina, ka lesi ira na turaga ni valu me kedrai sosomi:
25ia mo wilika e dua nai valu me tautauvata kei nai valu sa baleti iko, kei na ose me tautauvata kei na ose, kei na vale-vodoki me tautauvata kei na vale-vodoki: ia eda na veivala kei ira e na buca, eda na qai gumatua vakaidina vei ira. A sa vakarorogo ki na domodra ko koya, ka kitaka vakakina.
26A sa yaco, ni sa yabaki vou, sa qai wiliki ira na kai Siria ko Peni-etati, ka lako cake ki Efeki, mo kitaka nai valu vei ira na Isireli,
27A ra sa wili ko ira na luve i Isireli, ka kauta yadua na kenai vaqa, ka lako yani me tavaki ira: a ra sa laʼki tiko e na matadra ko ira na luve i Isireli me vaka e rua na qele lailai ni koti; ia ko ira na kai Siria, era robota na vanua.
28A sa toro mai na tamata ni Kalou, ka vosa vua na tui Isireli, ka kaya, Sa vosa vakaoqo ko Jiova, E na vuku ni ra sa kaya na kai Siria, Sa Kalou ni veiulu-ni-vanua ga ko Jiova, ka sa sega ni Kalou ni veibuca, au na qai soli ira na lewe vuqa kecega o qo ki na ligamu, ia dou na kila ni sa ko Jiova koi au.
29A ra sa tiko vakaivalu ka veidonui, ka bogi vitu. Ia e na kenai kavitu ni siga sa veiyacovi nai valu: a sa mokuti ira na kai Siria ko ira na luve i Isireli, e oba vakatini na tamata sa lako e yavadra e na siga e dua.
30Ia sa dro ko ira sa vo ki Efeki, ki loma ni koro; a sa baleta ko na bai e oba vakarua ka vitu na udolu vei ira na tamata sa vo. A sa dro ko Peni-etati, ka curuma na koro, ka lako ki loma ni dua na tiki-ni-vale ecake.
31A sa kaya vua ko ira na nona tamata, Raica, keitou sa rogoca oti ni ra sa tui yalololoma ko ira na nodra tui na mataqali ni Isireli: me keitou vakaisulutaka mada na tolo i keitou e nai sulu ca, ka vakadali na ulu i keitou, ia keitou na curu yani vua na tui Isireli: de na vakabulai iko kina.
32A ra sa vauca nai sulu ca ki na tolodra, ka vakadali na uludra, ka lako vua na tui Isireli, ka ra sa kaya, Sa kaya ko Peni-etati na nomu tamata, Meʼu bula mada. A sa kaya ko koya, Oi, sa bula tiko li ko koya? sa wekaqu ko koya.
33Ia sa vakasama ko ira na tamata ni sa ka vinaka, ka sa qara vakusakusa nai vakadinadina ni sa maivei koya o qo: a ra sa kaya, Na wekamu, ko Peni-etati. A sa kaya ko koya, Dou laʼki kauti koya mai. A sa lako yani ko Peni-etati vei koya; a sa kauti koya cake ko koya ki na vale-vodoki.
34A sa kaya vua ko koya, A veikoro sa kauta tani ko tamaqu maivei tamamu, kaʼu na vakasuka; ia mo cakava na nomu yatu vale mai Tamasiko, me vaka ka cakava ko tamaqu mai Samaria. A sa kaya ko Eapi, Au na qai laivi iko mo lako yani e na veiyalayalati o qo. A sa veiyalayalati kaya, ka laivi koya me lako yani.
35A sa dua na tamata vei ira na luvedra na parofita, sa kaya vua na kai nona e na vosa i Jiova, Mo yaviti au mada. A sa bese ni yaviti koya ko na tamata.
36A sa kaya vua ko koya, E na vuku ni ko a sega ni vakarorogo ki na domo i Jiova, raica, ni ko sa lako tani vei au, ena mokuti iko e dua na laioni. Ia ni sa lako tani vua, sa kunei koya e dua na laioni, ka mokuti koya.
37A sa kunea ko koya e dua na tamata tani, a sa kaya, Mo yaviti au mada. A sa yaviti koya na tamata, a sa vuetaki koya na tamata ni sa yavita.
38A sa lako yani na parofita, ka laʼki waraka na tui e na sala, ka liatamata tani, ka tabonaka na matana e nai sala.
39Ia ni sa lako yani kina na tui, sa qoqolou ko koya vua na tui: a sa kaya, Sa lako yani na nomu tamata e loma ni valu; ka, raica, sa lako vakatikitiki e dua na tamata, ka kauta vei au e dua na tamata, ka kaya, Mo vakatawa na tamata o qo: ke sa dua na ka e yali kina, ko na mate e na vukuna, se sauma e na dua na taledi siliva.
40Ia ni sa oga voli vaka ka vaka na nomu tamata, raica, sa yali ko koya. A sa kaya vua ko na tui Isireli, Ko Ua lewai me vakakina; sai iko ga sa vakataudeitaka.
41A sa kusarawa ko koya, ka kauta tani nai sala mai na matana; a sa kilai koya ko na tui Isireli, ni sa dua vei ira na parofita.
42A sa kaya vua ko koya, Sa vosa vakaoqo ko Jiova, E na vuku ni ko sa laiva me lako tani e ligamu na tamata kaʼu a lesia me rusa sara, enai sosomi ni nona mate na nomu mate, ka na nodrai sosomi na nona tamata ko ira na nomu tamata.
43A sa lako yani ki na nona vale ko na tui Isireli, a sa bibi ka yaloca, ka yaco ki Samaria.
Who We AreWhat We EelieveWhat We Do
2025 by iamachristian.org,Inc All rights reserved.
