I. A Kedrai Vola Na Tui 16 - AI VOLA TABU（FIJ1864）

Sa taravi na Isireli ko Ela na luvena, a sa vakamatei koya ko Simiri, 1-14. Sa tui Isireli ko Simiri, 15-22. Sa tui Isireli ko Omiri, 23-28; a sa tarava ko Eapi, 29-33. Sa tarai ko Jeriko, 34.

1A SA lako mai na vosa i Jiova vei Yeu na luve i Enani e na vuku i Pasa, a sa kaya,

2E na vuku ni kaʼu a laveti iko cake mai na kuvu-ni-qele, ka lesi iko me turaga vei ira na noqu tamata na Isireli; ia ko sa lako ga e na sala i Yaropiami, a sa vakaivalavalacataki ira na noqu tamata na Isireli, ka me vakacudrui au e na nodrai valavala ca;

3raica, kaʼu na kauta tani na kawa i Pasa, kei na kawa ni nona mataqali; ia kaʼu na cakava na nomu mataqali me tauvata kei na mataqali i Yaropiami na luve i Nipati:

4o koya na nei Pasa sa mate e na koro, ena kania ko na veikoli; kei koya sa mate vua e na veiwere, ena kania ko na manumanu ni lomalagi.

5Ia na vo ni cakacaka i Pasa, kei na ka sa cakava ko koya, kei na nona kaukauwa, sa sega li ni volai e nai vola ni veika sa caka e na nodra gauna na tui Isireli?

6A sa moce vata kei ira na nona qase ko Pasa, a sa buluti mai Tirisa; a sa tui ko Ela na luvena, me kenai sosomi.

7A sa lako talega mai na vosa i Jiova e na gusu i Yeu na parofita, na luve i Enani, e na vuku i Pasa, ka e na vuku ni nona mataqali; io e na vuku ni ka ca kecega ka cakava ko koya e na mata i Jiova, me vakacudrui koya e na cakacaka ni ligana, ni sa tautauvata kei na mataqali i Yaropiami; ka e na vuku ni sa mokuti koya.

8E na kenai karuasagavulu ka ono ni yabaki i Asa na tui Juta, sa mai tui vei ira na Isireli mai Tirisa ko Ela na luve i Pasa, ka yabaki rua.

9A sa buki kena vere ni sa tiko mai Tirisa na nona tamata ko Simiri, na turaga ni dua na wase ni nona vale-vodoki, ni sa gunu ka mateni e na vale i Erisa, o koya sa lewa na nona vale mai Tirisa.

10A sa curu ko Simiri, ka mokuti koya, ka vakamatea, e na kenai karuasagavulu ka vitu ni yabaki i Asa na tui Juta, a sa tui me kenai sosomi.

11A sa yaco ni sa qai tui mai ko koya, ni sa tiko e na nonai tikotiko vakaturaga, sa qai vakamatei ira kecega na mataqali i Pasa; sa sega ni vakavoca vua e dua na tagane: e sega vei ira na wekana dina, se wekana walega.

12A sa vakarusai ira kece na mataqali i Pasa ko Simiri, me vaka na vosa i Jiova ka vosataki Pasa kina e na gusu i Yeu na parofita,

13e na vuku ni valavala ca kecega i Pasa, kei nai valavala ca i Ela na luvena, erau a valavala ca kina, ka vakaivalavalacataki ira kina na Isireli, me vakacudrui Jiova na nodra Kalou na Isireli, e na nodra veika vakailasu.

14Ia na vo ni cakacaka i Ela, kei na ka kecega ka cakava, ko koya, sa sega li ni volai e nai vola ni veika sa caka e na nodra gauna na tui Isireli?

15E na kenai karuasagavulu ka vitu ni yabaki i Asa na tui Juta, sa tui mai Tirisa ko Simiri, ka bogi vitu. A sa tiko vakaivalu ko ira na tamata ki Kipiconi, a nodra na kai Filisitia.

16A sa rogoca ko ira na tamata ka tiko vakaivalu, ka vaka, Sa buki vere ko Simiri, ka mokuta talega na tui: a ra sa buli Omiri na turaga ni valu ko ira kecega na Isireli, me tui Isireli e na siga ko ya e nai tikotiko ni valu.

17A sa lako cake mai Kipiconi ko Omiri, kei ira vata kaya na Isireli kecega, ka buku druadrua ki Tirisa.

18Ia ni sa raica ko Simiri ni sa kabai na koro, sa curu ki na tikina cecere e na vale ni tui, ka vakacaudreva e na buka na vale ni tui e delana, a sa mate,

19e na vuku ni nonai valavala ca sa valavala ca kina ni sa caka ca e na mata i Jiova, ni sa lako e na sala i Yaropiami, kei na nonai valavala ca ka kitaka ko koya, ni sa vakaivalavalacataki ira na Isireli.

20Ia na vo ni cakacaka i Simiri, kei na nona vere ka kitaka ko koya, sa sega li ni volai e nai vola ni veika sa caka e na nodra gauna na tui Isireli?

21Sa ra qai wase rua ko ira na tamata Isireli: e dua na nodra wase na tamata sa muri Tipini na luve i Kinaci, me buli koya me tui; ia e dua na wase sa muri Omiri.

22A ra sa gumatua na tamata era sa muri Omiri vei ira na tamata era sa muri Tipini na luve i Kinaci: a sa mate ko Tipini, ka sa tui ko Omiri.

23E na kenai katolusagavulu ka dua ni yabaki i Asa na tui Juta, sa qai tui vei ira na Isireli ko Omiri, ka yabaki tinikarua: e ono na yabaki sa tui mai Tirisa.

24A sa volia ko koya na ulu-ni-vanua ko Samaria maivei Semeri, e na taledi siliva e rua, a sa tara e na ulu-ni-vanua, ka vakatoka na yaca ni koro ka tara ko koya, e na yaca i Semeri, nai taukei ni ulu-ni-vanua ko Samaria.

25A sa caka ca ko Omiri e na mata i Jiova, ia sa levu cake na nona ca ka lailai sobu na nodra ca kecega sa bula eliu vei koya.

26A sa lako ko koya e na sala kecega i Yaropiami na luve i Nipati, kei na nonai valavala ca sa vakaivalavalacataki ira kina na Isireli, ka me vakacudrui Jiova na nodra Kalou na Isireli e na nodra veika vakailasu.

27Ia na vo ni cakacaka i Omiri ka kitaka ko koya, kei na nona qaqa ka cakava ko koya, sa sega li ni volai e nai vola ni veika sa caka e na nodra gauna na tui Isireli?

28A sa moce vata kei ira na nona qase ko Omiri, ka sa buluti mai Samaria; a sa tui ko Eapi na luvena, me kenai sosomi.

29Ia e na kenai katolusagavulu ka walu ni yabaki i Asa na tui Juta, sa mai tui ko Eapi na luve i Omiri vei ira na Isireli; a sa tui vei ira na Isireli mai Samaria ko Eapi na luve i Omiri, ka yabaki ruasagavulu ka rua.

30A sa caka ca e na mata i Jiova ko Eapi na luve i Omiri, ka levu cake vei ira kecega era a bula eliu vei koya.

31Ia me vaka sa ka lailai me muria nai valavala ca i Yaropiami na luve i Nipati, sa kauti Isepeli me watina, o koya na luve i Ecipeali, na nodra tui na kai Saitoni, ka laʼki qaravi Peali, ka soro vua.

32A sa cakava e dua nai cabocabo-ni-soro vei Peali, e na vale i Peali, o qori ka tara ko koya mai Samaria.

33A sa cakava ko Eapi e dua na kaloualewa ni veikau; a sa levu na ka sa vakacudrui Jiova kina na nodra Kalou na Isireli ko Eapi, ka lailai ko ira kecega na tui Isireli era a bula eliu vei koya.

34E na nona gauna sa tarai Jeriko ko Ieli na kai Peceli: ni sa tauyavutaka ko koya, sa mate ko Epirami na nona ulumatua, ia ni sa vakatura cake na kena matamata-ni-koro, sa mate ko Sikupi, o koya sa nonai tinitini, me vaka na vosa i Jiova ka vosataka e na gusu i Josua na luve i Nuni.