I. A Kedrai Vola Na Tui 17 - AI VOLA TABU（FIJ1864）

Sa tukuna ko Ilija na dausiga, ka qai laʼki vakani mai na uciwai, 1-7. Sa qai lako ko koya ki na alewa dawai mai Sarifaci, 8-16; ka sa vakabulai na luvena ka mate, 17-24.

1A SA kaya vei Eapi ko Ilija na kai Tisipa, e dua vei ira na kai Kiliati, Me vaka sa bula ko Jiova na nodra Kalou na Isireli, o koya kaʼu sa tu e matana, ena sega na tegu se na uca e na veiyabaki o qo, ena vaka ga na noqu vosa.

2A sa yaco mai vua na vosa i Jiova, ka kaya,

3Mo lako tani eke, ka gole kivaka ki na tu i cake, ka vuni iko mai na uciwai ko Kirici, o qori e na mata ni Joritani:

4ia ko na gunu mai na uciwai; au sa vakaroti ira talega na reveni me ra vakani iko tiko maikea.

5A sa lako ko koya, ka cakava me vaka na vosa i Jiova: ni sa lako ko koya ka tiko mai na uciwai ko Kirici, o qori e na mata ni Joritani.

6A sa daukauta vei koya ko ira na reveni na madrai kei na lewe ni manumanu e na sabogibogi, kei na madrai kei na lewe ni manumanu e na yakavi; a sa gunu ko koya mai na uciwai.

7A sa oti na bogi e so, sa qai maca na uciwai, e na vuku ni ka sega na uca e na vanua.

8A sa yaco mai vua na vosa i Jiova, ka kaya,

9Mo tu cake, mo lako ki Sarifaci, o qori sa vaka-Saitoni, ka tiko maikea: raica, kaʼu sa vakarota vua e dua na alewa dawai maikea me vakani iko.

10A sa tu cake ko koya, ka lako ki Sarifaci. Ia ni sa yaco ki na matamata-ni-koro, raica, sa tiko maikea na alewa dawai, a sa ca buka tiko: a sa kaci vua ko koya, ka kaya, Mo kauta mada mai vei au e dua na wai lailai e na bilo, meʼu gunu.

11Ia ni sa lako yani ko koya me kauta mai, sa kaci vua ko koya, ka kaya, Mo kauta mada mai vei au e na ligamu e dua na tiki ni madrai.

12A sa kaya ko koya, Me vaka sa bula ko Jiova na nomu Kalou, sa sega vei au nai buli madrai, sa dua ga na madrai droka sa qumi rawa e ligaqu e na saqa, ka dua na waiwai lailai e na tavaya: ka, raica, kaʼu sa ca tiko e rua na buka meʼu laʼki cakava vei keirau kei luvequ, me keirau kania, ka qai mate yani.

13A sa kaya vua ko Ilija, Mo kakua ni rere; mo laʼki cakava me vaka na nomu vosa; ia mo cakava mada eliu vei au e dua nai buli lailai, ka kauta mai vei au, mo qai kitaka emuri vei kemudrau kei luvemu:

14ni sa vosa vakaoqo ko Jiova na nodra Kalou na Isireli, Ena sega ni oti na saqa madrai droka, ena sega talega ni lailai sobu na tavaya waiwai, ka me yaco mada na siga ena solia ko Jiova na uca ki na dela i vuravura.

15A sa lako ko koya, ka kitaka me vaka na vosa i Ilija: a sa kana tiko ko koya, kei koya, kei iratou na nona lewe-ni-vale, ka bogi vuqa.

16Sa sega ni oti na saqa madrai droka, ka sega ni lailai sobu na tavaya waiwai, me vaka na vosa i Jiova ka vosataka ko koya e na gusu i Ilija.

17A sa oti na veika o qo, sa qai tauvi mate na luvena na alewa ko ya, nai taukei ni vale; ia sa kaukauwa sara na nona mate, me sega ni vo vua na cegu.

18A sa kaya ko koya vei Ilija, A cava vei kedaru, o iko na tamata ni Kalou? o sa lako beka mai me vakananumi au e na noqui valavala ca, me vakamatea talega na luvequ?

19A sa kaya vua ko koya, Mo solia mai vei au na luvemu. A sa tauri koya ko koya mai na lomaserena, ka kauta kicake ki na tiki-ni-vale ecake sa dautiko kina ko koya, a sa vakadavora e na nonai mocemoce.

20A sa kaci ko koya vei Jiova, a sa kaya, I Jiova na noqu Kalou, o sa vakayacora tale beka na ca vua na alewa dawai kaʼu sa tiko vulagi kaya, ni ko sa vakamatea na luvena?

21A sa kotora na gone vakatolu ko koya, ka kaci vei Jiova, ka kaya, I Jiova na noqu Kalou, me curu tale mada mai na yalo ni gone o qo vei koya.

22A sa rogoca na domo i Ilija ko Jiova; a sa curu tale mai na yalo ni gone vei koya, a sa bula.

23A sa taura na gone ko Ilija, ka kauti koya sobu ki vale mai na tikina ecake, ka solia vei tinana; a sa kaya ko Ilija, Raica, sa bula na luvemu.

24A sa kaya vei Ilija ko koya na alewa, Au sa qai kila e na ka o qo ni sa tamata ni Kalou ko iko, a sa dina na vosa i Jiova e na gusumu.