I. A Kedrai Vola Na Tui 15 - AI VOLA TABU（FIJ1864）

Sa tui Juta ko Epiyami, 1-8. Sa tui Juta ko Asa, 9-24. Sa tui Isireli ko Natapi, 25-32: a sa tarava ko Pasa, 33, 34.

1A SA yaco e na kenai katinikawalu ni yabaki i Yaropiami na tui, na luve i Nipati, sa mai tui vei ira na Juta ko Epiyami.

2Sa tui tiko mai Jerusalemi ka yabaki tolu. Ia na yaca i tinana ko Meeka, na luve i Episalomi.

3A sa lako ko koya e nai valavala ca kecega i tamana, a ya ka kitaka ni sa bula eliu vei koya; a sa sega ni dodonu na lomana vei Jiova na nona Kalou, me vaka na loma i Tavita na nona qase.

4E na vuku i Tavita ga sa solia vei koya ko Jiova na nona Kalou na cina mai Jerusalemi, ni sa vakatubura na luvena me taravi koya, ka me vakataudeitaki Jerusalemi:

5e na vuku ni ka cakava ko Tavita na ka e dodonu e na mata i Jiova, ka sega ni lesu tani mai na ka e dua sa vunautaki vua, e na veisiga kecega ni nona bula, na ka ga i Uriya na luve i Eci.

6A rau sa veivaluti ko Riapiami kei Yaropiami e na gauna kece ni nona bula.

7Ia na vo ni cakacaka i Epiyami, kei na ka kecega ka cakava ko koya, sa sega li ni volai e nai vola ni veika sa caka e na nodra gauna na tui Juta? A rau sa veivaluti tiko ko Epiyami kei Yaropiami.

8A sa moce vata kei ira na nona qase ko Epiyami; a sa buluti ko koya e na koro i Tavita; a sa tui ko Asa na luvena, me kenai sosomi.

9Ia e na kenai karuasagavulu ni yabaki i Yaropiami na tui Isireli, sa mai tui vei ira na Juta ko Asa.

10A sa tui tiko ko koya mai Jerusalemi ka yabaki vasagavulu ka dua. Ia na yaca i tinana ko Meeka, na luve i Episalomi.

11A sa caka dodonu ko Asa e na mata i Jiova, me vakai Tavita na nona qase:

12a sa vakasevi ira tani mai na vanua era sa valavala vaka-Sotoma, ka biuta tani na matakau kecega ka cakava ko ira na nona qase:

13ia ko Meeka talega na tinana, sa biuta ko koya me kakua ni ranadi tiko, e na vuku ni ka cakava e dua na matakau ki na kaloualewa ni veikau; a sa vakacacana na nona matakau ko Asa, ka Vakama mai na uciwai ko Kitironi.

14A sa sega ni biu na veitikina cecere: a sa dodonu ga vei Jiova na loma i Asa e na nona gauna kecega.

15A sa kauta ki na vale i Jiova na veika ka vakatabuya ko tamana, kei na veika ka vakatabuya ko koya, na siliva, kei na koula, kei nai yaya.

16A rau sa veivaluti tiko ko Asa kei Pasa na tui Isireli e na nodrau gauna kecega.

17A sa lako cake ko Pasa na tui Isireli me veivala kei ira na Juta, a sa tarai Rama, ka me kakua ni laiva e dua me lako tani se lako mai vei Asa na tui Juta.

18A sa qai kauta ko Asa kecega na siliva kei na koula sa vo tu e na yau ni vale i Jiova, kei na yau ni vale ni tui, ka solia ki na ligadra na nona tamata: a sa vakauta ko Asa na tui kivei Peni-etati na luve i Tapirimoni, na luve i Esioni, na tui Siria, o koya sa tiko mai Tamasiko, a sa kaya,

19Sa dua na nodaru veiyalayalati, kei na nodrau na tamaqu kei na tamamu: raica, kaʼu sa vakauta vei iko e dua na ka-ni-loloma, na siliva kei na koula: mo lako mai, mo musuka na nomudrau veiyalayalati kei Pasa na tui Isireli, ka me lako tani vei au ko koya.

20A sa vakarorogo vei Asa na tui ko Peni-etati, ka talai ira na turaga ni nona mataivalu me veivala kei na nodra Veikoro na Isireli, a sa mokuti lyoni, kei Tani, kei Apeli-peci-meeka, kei Kineroci taucoko, kei na vanua taucoko ko Nafitali.

21Ia ni sa rogoca ko Pasa, sa kua so ni tarai Rama ko koya, a sa laʼki tiko mai Tirisa.

22A sa kacivi ira kecega na Juta ko Asa na tui; sa sega ni vakalaivi e dua: a ra sa kauta tani na veivatu mai Rama, kei na kena kau, ka tara kina ko Pasa; a sa tarai Kepa kina ka nei Penijamini, kei Misipa, ko Asa na tui.

23Ia na vo ni cakacaka kecega i Asa, kei na nona kaukauwa kecega, kei na ka kecega ka cakava ko koya, kei na veikoro ka tara ko koya, sa sega li ni volai e nai vola ni veika sa caka e na nodra gauna na tui Juta? Ia e na gauna sa qase kina sa tauvi mate na yavana.

24A sa moce vata kei ira na nona qase ko Asa, a sa buluti vata kei ira na nona qase e na koro i Tavita na nona qase: a sa tui ko Yiosafati na luvena, me kenai sosomi.

25A SA mai tui vei ira na Isireli ko Natapi, na luve i Yaropiami, e na kenai kania ni yabaki i Asa na tui Juta, a sa tui vei ira na Isireli ka yabaki rua.

26A sa caka ca ko koya e na mata i Jiova, ka lako e na sala i tamana, kei na nonai valavala ca ka vakaivalavalacataki ira kina na Isireli.

27A sa buki kena vere ko Pasa na luve i Eiiya, e na mataqali i Isakari; a sa mokuti koya ko Pasa mai Kipiconi, na nodra na kai Filisitia; ni ra sa tiko vakaivalu ki Kipiconi ko Natapi kei ira kecega na Isireli.

28Ia sa vakamatei koya ko Pasa, e na kenai katolu ni yabaki i Asa na tui Juta; a sa tui ko koya me kenai sosomi.

29Ia ni sa tui ko koya, sa mokuti ira kecega na kawa i Yaropiami; sa sega ni vakavoca kivei Yaropiami e dua sa cegu-cegu rawa, ka me vakarusai koya oti, me vaka na vosa i Jiova, a ya ka vosataka ko koya e na gusu ni nonai talatala ko Eiiya na kai Silo:

30e na vuku ni valavala ca i Yaropiami ka kitaka ko koya, ka vakaivalavalacataki ira kina na Isireli, e na nona ka veivakacudrui ka vakacudrui Jiova kina na nodra Kalou na Isireli.

31Ia na vo ni cakacaka i Natapi, kei na ka kecega ka cakava ko koya, sa sega li ni volai e nai vola ni veika sa caka e na nodra gauna na tui Isireli?

32A rau sa veivaluti ko Asa kei Pasa na tui Isireli e na nodrau gauna kecega.

33E na kenai katolu ni yabaki i Asa na tui Juta, sa mai tui ko Pasa, na luve i Eiiya, vei ira kecega na Isireli mai Tirisa, ka yabaki ruasagavulu ka va.

34A sa caka ca ko koya e na mata i Jiova, ka lako e na sala i Yaropiami, kei na nonai valavala ca ka vakaivalavalacataki ira kina na Isireli.