I. A Kedrai Vola Na Tui 14 - AI VOLA TABU（FIJ1864）

Sa tauvi mate na luvena na tui, 1-5. Sa tukuna na cudru i Jiova vei Yaropiami Ito Eiiya na parofita, 6-16. Sa tui Juta Ito Riapiami, ka sa valavala caga, 21-31.

1E NA gauna ko ya sa tauvi mate ko Epiya na luve i Yaropiami.

2A sa kaya ko Yaropiami ki na watina, Mo tu cake mada, ka vakamataliataki iko, mo kakua ni kilai kina ni ko sa wati i Yaropiami; ka lako ki Silo: raica, sa tiko maikea ko Eiiya na parofita, o koya ka tukuna vei au niʼu na nodra tui na tamata o qo:

3ia mo kauta kei iko e tini nai buli madrai, ka so na madrai mamare, ka dua na tavaya oni, ka lako vua: ena tukuna vei iko ko koya na ka ena yaco vua na gone.

4A sa kitaka vakakina na wati i Yaropiami, ka tu cake, ka lako ki Silo, ka lako ki na vale i Eiiya: a sa sega ni rai rawa ko Eiiya: ni sa boko na matana e na vuku ni nona qase.

5A sa kaya ko Jiova vei Eiiya, Raica, sa lako mai na wati i Yaropiami me taroga vei iko e dua na ka e na vuku ni luvena; ni sa tauvi mate ko koya: mo vosa vua vaka ka vaka: ia ena viavia tamata tani ko koya ni sa curu mai.

6Ia ni sa rogoca na rorogo ni yavana ko Eiiya, ni sa toro mai ko koya ki na katuba, sa kaya, Mo curu mai, na wati i Yaropiami; a cava ko sa viavia tamata tani kina? ni sa ka bibi kaʼu sa talaki kina vei iko:

7mo lako, mo kaya vei Yaropiami, Sa vosa vakaoqo ko Jiova na nodra Kalou na Isireli, E na vuku ni kaʼu a laveti iko cake maivei ira na tamata, ka lesi iko mo tui vei ira na noqu tamata na Isireli,

8ka dresulaka na matanitu mai na mataqali i Tavita, ka solia vei iko: ia ko sa sega ga ni vakai Tavita na noqui talatala, o koya ka vakabauta na noqu veivakaro, ka muri au e na yalona taucoko, me cakava walega na ka e dodonu e mataqu;

9ka ko sa ia nai valavala ca sa uasivia na nodra kecega era a bula eliu vei iko; ni ko sa lako ka cakava vei iko e so na kalou tani, kei na matakau e so sa vakawaicalataki, ka me vakacudrutaki au, ka sa biuti au ki dakumu:

10o koya o qo, kaʼu na vakayacora na ca ki na vale i Yaropiami, ka muduka laivi vei Yaropiami na tagane kecega, io ko koya sa sogolati, kei koya sa lako voli, e Isireli, ia kaʼu na kauta tani na vo ni kawa i Yaropiami, me vaka ni sa kau tani na de-ni-manumanu, ka me oti sara.

11O koya Sa mate vei Yaropiami e na koro, ena kania ko na veikoti; kei koya sa mate e na veiwere, ena kania ko na manumanu ni lomalagi: ni sa vosataka ko Jiova.

12Ia ko iko, mo ia, mo lako ki na nomu vale: ni sa curuma na koro na yavamu, ena ciba na gone.

13A ra na tagicaki koya ko ira kecega na Isireli, ka buluta: ni na yaco ki nai bulubulu ko koya duaduaga maivei Yaropiami, e na vuku ni sa kune vua na ka vinaka vei Jiova, na nodra Kalou na Isireli, e na mataqali i Yaropiami.

14Ia ena vakatubura ko Jiova e dua na tui vei ira na Isireli, o koya ena muduka laivi na mataqali i Yaropiami e na siga ko ya: ka vakaevei? sa yaco na kena gauna.

15Ia ena yaviti ira na Isireli ko Jiova, me vaka sa vakayavalataki na gasau e na wai, ka cavuivuvutaki ira na Isireli mai na vanua vinaka o qo, a ya ka solia ko koya vei ira na nodra qase eliu, ka na duibiubiuti ira ki tai kadua ni Uciwai, e na vuku ni ra sa cakava na nodra veikaloualewa ni veikau, ka vakacudrutaki Jiova.

16Ia ena soli ira na Isireli yani e na vuku ni valavala ca i Yaropiami, o koya ka kitaka nai valavala ca, ka vakaivalavalacataki ira na Isireli.

17A sa ia na wati i Yaropiami, ka lako yani, ka yaco ki Tirisa: ia ni sa yaco ko koya ki nai lago ni katuba, sa ciba na gone;

18a ra sa buluta; a ra sa tagicaka ko ira kecega na Isireli, me vaka na vosa i Jiova, a ya ka vosataka ko koya e na gusu ni nonai talatala ko Eiiya na parofita.

19Ia na vo ni cakacaka i Yaropiami, na nonai valu, kei na nona lewa, raica, sa volai e nai vola ni veika sa caka e na nodra gauna na tui Isireli.

20Ia na gauna sa lewa kina ko Yaropiami sa ruasagavulu ka rua na yabaki: a sa moce vata kei ira na nona qase, a sa tui ko Natapi na luvena, me kenai sosomi.

21A SA tui mai Juta ko Riapiami na luve i Solomoni: sa vasagavulu ka dua na yabaki i Riapiami ni sa mai tui, a sa tinikavitu na yabaki sa lewa kina ko koya mai Jerusalemi, na koro ka digitaka ko Jiova mai na nodra veiyavusa kecega na Isireli, me vakatikora kina na yacana. Ia na yaca i tinana ko Neema, na kai Amoni.

22A sa caka ca ko ira na Juta e na mata i Jiova, a ra sa vakavuvutaki koya vakalevu e na nodrai valavala ca era sa cakava, ka vakalailai ko ira kece na nodra qase.

23Ia era sa tara vei ira ko ira talega o qo na veitikina cecere, kei na veimatakau, kei na veikau lailai e so, e na dela ni vei-ulu-ni-koro cecere kecega, ka e na ruku ni kau karakarawa kecega.

24A sa so na tamata talega e na Vanua era sa valavala vaka-Sotoma: era sa cakacaka me vaka na nodra ka vakasisila kecega na veimatanitu ka vakaseva tani ko Jiova e na matadra na luve i Isireli.

25A sa yaco e na kenai kalima ni yabaki i Riapiami na tui, sa laʼki vala ki Jerusalemi ko Sisaki na tui Ijipita:

26a sa kauta tani na yau ni vale i Jiova, kei na yau ni nona vale na tui; sa kauta kece yani: a sa kauta kecega nai sasabai koula ka cakava ko Solomoni.

27A sa cakava ko Riapiami na tui e so nai sasabai parasa me kedrai sosomi, ka solia ki na ligadra na turaga ni valu i vakatawa, ko ira; sa vakatawa na katuba ni nona vale na tui.

28Ia ni sa laʼki curu na tui ki na vale i Jiova, sa qai kauta o qori ko ira nai vakatawa, a sa qai vakasuka ki na nodra vale nai vakatawa.

29Ia na vo ni cakacaka i Riapiami, kei na ka kecega sa cakava ko koya, sa sega li ni volai e nai vola ni veika sa caka e na nodra gauna na tui Juta?

30A rau sa veivaluti, tiko ko Riapiami kei Yaropiami e na nedrau gauna kecega.

31A sa moce vata kei ira na nona qase ko Riapiami, a sa buluti vata kei ira na nona qase e na koro i Tavita. Ia na yaca i tinana ko Neema, na kai Amoni. A sa tui ko Epiyami na luvena, me kenai sosomi.