I. A Kedrai Vola Na Tui 13 - AI VOLA TABU（FIJ1864）

Sa tukuna ko na tamata ni Kalou na ka ena yaco rei Yaropiami, 1-10. Sa qai muria na vosa ni dua na parofita qase ko na tamata ni Kalou, ka mate kina, 11-32. Sa valavala ca ga ko Yaropiami, 33-34.

1KA, raica, sa lako e dua na tamata ni Kalou mai Juta ki Peceli, ni sa vosa vua ko Jiova: a sa wavu tu ko Yaropiami mai nai cabocabo, me vakacaudreva na ka boi vinaka.

2A sa kaci ko koya ki nai cabocabo e na vosa i Jiova, ka kaya, I cabocabo! i cabocabo! sa kaya vakaoqo ko Jiova, Raica, ena sucu e dua na goneatagane ki na mataqali i Tavita, ko Josia na yacana; ia ena vakamatei iratou ko koya e delamu na bete ni veitikina cecere, eratou a vakacaudreva na ka boi vinaka e delamu, ka na vakamai e delamu na sui ni tamata.

3Sa solia talega nai vakadinadina e na siga ko ya, ka kaya. Sa vakaoqo nai vakadinadina sa vosataka ko Jiova; Raica, sa na kavida nai cabocabo, ka tasova na dravu sa koto e delana.

4Ia ni sa rogoca ko na tui na nona vosa na tamata ni Kalou, o koya ka kaci ki nai cabocabo mai Peceli, sa dodoka yani na ligana ko Yaropiami mai nai cabocabo, ka kaya, Tauri koya. A sa malai yani na ligana ka dodoka vua ko koya, a sa sega ni lokia tale rawa vua.

5A sa kavida nai cabocabo, a sa tasova na dravu mai nai cabocabo, me vaka nai vakadinadina ka solia ko na tamata ni Kalou e na vosa i Jiova.

6A sa vosa na tui, ka kaya vua na tamata ni Kalou, Mo vakamasuti Jiova mada na nomu Kalou, ka masulaki au, ka me loki tale mai vei au na ligaqu. A sa vakamasuti Jiova ko na tamata ni Kalou, a sa loki tale vei koya na ligana na tui, ka yaco me vaka eliu.

7A sa kaya na tui vua na tamata ni Kalou, Daru lako ki vale, mo vakacegu kina, ia kaʼu na solia vei iko e dua na ka-ni-loloma.

8A sa kaya vua na tui ko koya na tamata ni Kalou, Kevaka ko na solia vei au e dua nai wase ni nomu vale ni sa wase rua, au na sega ni lako kei iko, se kania na kakana se gunu wai e na tikina o qo:

9niʼu sa vakaroti vakakina e na vosa i Jiova, ka vaka, Mo kakua ni kania na kakana se gunu wai, se lesu tale yani e na sala ko a lako kina.

10A sa lako yani ko koya e na sala tani, ka sega ni lesu tale e na sala ka lako kina ki Peceli.

11A sa tiko mai Peceli e dua na parofita qase; a sa lako na luvena ka tukuna vua na cakacaka kecega ka cakava mai Peceli na tamata ni Kalou e na siga ko ya: na vosa ka vosataka ko koya vua na tui, eratou sa tukuna vua na tamadratou.

12A sa kaya vei iratou ko na tamadratou, A sala cava sa lako kina ko koya? a sa raica oti ko iratou na luvena na sala ka lako kina na tamata ni Kalou, o koya ka lako mai Juta.

13Sa kaya talega vei iratou na luvena, Dou vauca vei au na vodovodo ki na asa. A ra sa vauca vei koya na vodovodo ki na asa; a sa vodoka ko koya,

14ka laʼki muria na tamata ni Kalou, ka kunei koya ni sa tiko e na ruku ni dua na oki: a sa kaya vua, O iko beka na tamata ni Kalou ka lako mai Juta? A sa kaya ko koya, Koi au.

15A sa kaya vua, Daru lako ki vale, ka kania na kakana.

16A sa kaya, E tabu meʼu lesu kei iko, se lako kei iko: au na sega talega ni kania na kakana se gunu wai kei iko e na tikina o qo:

17ni sa vakaroti vei au e na vosa i Jiova, Mo kakua ni kania na kakana se gunu wai maikea, se lesu tale me lako e na sala ko a lako kina.

18A sa kaya vua, Sa parofita koi au talega me vakai iko: a sa vosa vei au e dua na agilose e na vosa i Jiova, ka kaya, Mo vakalesui koya mai vei iko ki na nomu vale, me kania na kakana ka gunu wai. Sa lasu ga vua ko koya.

19Sa qai lesu kaya, ka kania na kakana ka gunu wai, e na vale i koya.

20A sa yaco ni rau sa tiko mai nai kanakana, sa lako mai na vosa i Jiova vua na parofita ka kauti koya mai:

21a sa kaci ko koya vua na tamata ni Kalou ka lako mai Juta, ka kaya, Sa vosa vakaoqo ko Jiova, E na vuku ni ko a talaidredre ki na gusu i Jiova, ka sega ni vakabauta na vunau ka vunautaka vei iko ko Jiova na nomu Kalou,

22a sa lesu ga mai, ka kania na kakana ka gunu wai e na tikina ka vakaroti kina vei iko, Mo kakua ni kania na kakana se gunu wai; ena sega ni yaco na yagomu ki na nodrai bulubulu na nomu qase.

23Ia ni sa kana oti ka gunu oti ko koya, sa vauca ko koya na vodovodo ki na asa vei koya, io, vua na parofita ka kauta tale mai.

24Ia ni sa lako ko koya, sa tavaki koya e na sala e dua na laioni, ka vakamatei koya: a sa biu tu e na sala na yagona, a sa tu vata kaya na asa; sa tu talega na laioni ka voleka ki na yagona.

25Ka, raica, era sa lako voli na tamata, ka raica ni sa biu no e na sala na yagona, ka tu voleka na laioni ki na yagona: a ra sa laʼki tukuna e na koro sa tiko kina na parofita qase.

26Ia ni sa rogoca ko na parofita ka vakalesui koya mai na sala, sa kaya ko koya, O qori na tamata ni Kalou, o koya ka talaidredre ki na gusu i Jiova: a sa soli koya kina ko Jiova ki na laioni, a ya sa basuraki koya, ka vakamatea, me vaka na vosa i Jiova, a ya ka vosataka vua.

27Sa vosa talega vei iratou na luvena, ka kaya, Dou vauca vei au na vodovodo ki na asa. A ratou sa vauca.

28A sa lako ko koya, ka kunea na yagona sa biu no e na sala, kei na asa kei na laioni erau sa tu voleka ki na yagona: sa sega ni kania na yagona na laioni, se basuraka na asa.

29A sa laveta na yago ni tamata ni Kalou ko koya na parofita, ka vakavodoka ki dela ni asa, ka kauta tale: a sa lako ki na koro na parofita qase, me tagi, ka buluti koya.

30A sa vakadavora na yagona e nonai bulubulu, ka ratou sa tagicaki koya, ka vaka, Ule, na wekaqu!

31Ia ni sa buluta oti ko koya, sa vosa vei iratou na luvena, ka kaya, Niʼu sa mate, dou buluti au e nai bulubulu sa bulu kina na tamata ni Kalou; dou vakotora vata na suiqu kei na suina:

32ni na yaco vakaidina na vosa ka kacivaka ko koya e na vosa i Jiova ki nai cabocabo-ni-soro mai Peceli, kei na veivale kecega e na veitikina cecere mai na veikoro vaka-Samaria.

33Ni sa oti na ka o qo sa sega ni lesu mai ko Yaropiami mai na nonai valavala ca, ka cakava tale me ra bete ni veitikina cecere na tamata walega: o koya sa vinakata, sa buli koya ko koya me dua na bete ni veitikina cecere.

34A sa ka o qo sa ia kina nai valavala ca e na mataqali i Yaropiami, ka me muduki tani, ka vakarusai tani mai na dela i vuravura.