I. A Kedrai Vola Na Tui 12 - AI VOLA TABU（FIJ1864）

Sa buli me tui ko Riapiami; a sa valavala vakaukauwa ko koya, ka bese kina ni vakarogoci koya na yavusa e tini, 1-24. Sa tui Isireli ko Yaropiami, a sa ia na soro ki na matakau e so, 20, 25-33.

1A SA lako ki Sikemi ko Riapiami: ni ra sa lako ko ira kecega na Isireli ki Sikemi me buli koya me tui.

2Ia ni sa rogoca ko Yaropiami na luve i Nipati, ni sa tikoga mai Ijipita, (ni sa dro eliu mai na mata i Solomoni na tui, a sa tiko mai Ijipita ko Yaropiami;

3a ra sa talaki me kacivi koya mai;) era sa qai lako, ko Yaropiami kei na nodrai vavakoso taucoko na Isireli, ka ra laʼki vosa vei Riapiami, ka kaya,

4O tamamu sa vakabi-bitaka na neimami vua; ia o qo, mo vakamamadataka na cakacaka rarawa i tamamu, kei nai vua bibi sa tauca vei keimami ko koya; keimami na qai qaravi iko.

5A sa kaya vei ira ko koya, Dou lako madani ka bogi tolu, dou qai lako tale mai vei au. A ra sa lako tani na tamata.

6A sa bose vata ko Riapiami na tui, kei ira na qase ka tu e na mata i Solomoni na tamana ni sa bula tiko ko koya, a sa kaya ko koya, Dou sa lewa meʼu vosa tale vakaevei vei ira na tamata o qo?

7A ra sa vosa vua, ka kaya, Kevaka ko nai talatala edaidai vei ira na tamata o qo, ka qaravi ira, ka vosa tale vei ira, ni ko vosataka vei ira na vosa vinaka, era na qai qaravi iko ka tawa mudu.

8A sa biuta ko koya na nodra lewa na qase, na ka era sa lewa vua, ka bose vata kei ira na cauravou era cadra kaya, era dautu e matana: a sa kaya vei ira ko koya,

9A cava dou sa lewa me da vosataka vei ira na tamata o qo, ko ira ka vosa mai vei au, ka kaya, Mo vakamamadataka nai vua ka tauca vei keimami ko tamamu?

10A ra sa vosa vua na cauravou era cadra kaya, ka kaya, Mo vosa vakaoqo vei ira na tamata o qo ka vosa vei iko, ka kaya, Sa vakabibi-taka na neimami vua ko tamamu, ia mo vakamamadataka vei keimami; mo vosa vakaoqo vei ira, A noqui qaqalo lailai ena vavaku, ka mamare na tolo i tamaqu:

11ia o qo, sa bibi nai vua sa virikotora vei kemudou ko tamaqu, ia kaʼu na vakaikuritaka na nomudoui vua: sa vakanakuitataki kemudou ko tamaqu e na veidali, ia kaʼu na vakanakuitataki kemudou e na kuita sa buki.

12A ra sa tale mai ko Yaropiami kei ira kecega na tamata kivei Riapiami e na kenai katolu ni siga, me vaka ka kaya eliu na tui vei ira, ni sa kaya, Dou lako tale mai vei au e nai katolu ni siga.

13A sa vosa vakaukauwa ko na tui vei ira na tamata, ka biuta na nodra lewa na qase era a tauca vua;

14ka vosa vei ira me vaka na nodra lewa na cauravou, ni ra sa kaya, Sa vakabibitaka na nomudoui vua ko tamaqu, ia kaʼu na vakaikuritaka na nomudoui vua: sa vakanakuitataki kemudou ko tamaqu e na veidali, ia kaʼu na vakanakuitataki kemudou e na kuita sa buki.

15A sa sega ni vakarorogo na tui vei ira na tamata; ni sa maivei Jiova na ka, me vakayacora na nona vosa ka vosataka ko Jiova e na gusu i Eiiya, na kai Silo, kivei Yaropiami na luve i Nipati.

16Ia ni saraica ko ira kecega na Isireli ni sa sega ni rogoci ira ko na tui, era sa qai vosa vua na tui ko ira na tamata, ka kaya, Keimami sai votavota vata vakaevei kei Tavita? ka sa sega na neimami votavota vata kei koya na luve i Isei: ki na nomudou veivale, oi kemudou na Isireli! o qo, mo qarauna na nomu vale, i Tavita. A ra sa lako na Isireli ki na nodra veivale.

17Ia ko ira na luve i Isireli era tiko e na veikoro i Juta, sa turaga vei ira ko Riapiami.

18A sa talai Etorami ko Riapiami na tui, o koya ka lewa nai vakacavacava: a sa viriki koya e na vatu ko ira kecega na Isireli, a sa mate ko koya. A sa kusarawa kina ko Riapiami na tui me vodoka na nona vale-vodoki, me dro ki Jerusalemi.

19A sa talaidredre kina ko ira na Isireli ki na mataqali i Tavita, ka yacova na siga o qo.

20Ia ni sa rogoca ko ira kecega na Isireli ni sa tale mai ko Yaropiami, era sa talaki ka kacivi koya vei ira nai vavakoso, ka ra sa buli koya me tui vei ira kecega na Isireli: sa sega e dua sa muria na mataqali i Tavita, na yavusa i Juta duaduaga.

21Ia ni sa yaco ki Jerusalemi ko Riapiami, sa vakasoqoni ira vata kecega na mataqali i Juta, kei na yavusa i Penijamini, e oba vakatinikawalu na tamata digitaki era dauia nai valu, me laʼki veivala kei na nodra mataqali na Isireli, mo vakalesuya na matanitu kivei Riapiami na luve i Solomoni.

22A sa lako mai na vosa ni Kalou vei Simaya na tamata ni Kalou, ka kaya,

23Mo vosa vei Riapiami, na luve i Solomoni, na tui Juta, kei ira kecega na mataqali i Juta kei Penijamini, kei ira na tamata sa vo, ka kaya,

24Sa vosa vakaoqo ko Jiova, Dou kakua ni lako cake; dou kakua ni veivala kei ira na wekamudou na luve i Isireli: dou lesu yani na tamata yadua ki na nona vale; ni sai au na vu ni ka o qo. A ra sa vakarorogo ki na vosa i Jiova; ka lesu me lako yani me vaka na vosa i Jiova.

25A SA tarai Sikemi mai na ulu-ni-vanua ko Ifireimi ko Yaropiami, ka tiko maikina; a sa lako tani maikea, ka tarai Penieli.

26A sa kaya e lomana ko Yaropiami, Sa na qai vuki na matanitu ki na mataqali i Tavita:

27kevaka era sa lako cake na tamata o qo, me kitaka nai soro e na vale i Jiova mai Jerusalemi, ena qai vuki na lomadra na tamata o qo ki na nodra turaga, io kivei Riapiami na tui Juta, a ra na vakamatei au, ka lako tale vei Riapiami na tui Juta.

28A sa ia na bose na tui, ka cakava kina e rua na luve ni karavau e na koula, a sa kaya vei ira, Sa dredre vei kemudou mo dou lako cake ki Jerusalemi: raica, koi rau na nomudou kalou, oi kemudou na Isireli, erau a kauti kemudou cake mai na vanua ko Ijipita.

29A sa virikotora e dua mai Peceli ko koya, ka vakatura na kenai kadua mai Tani.

30A sa ka o qo sa ia kina nai valavala ca; ni ra sa lako ki Tani ko ira na tamata ki na matana e dua.

31A sa cakava ko koya na vale e na veitikina cecere, ka lesia e so na bete maivei ira na tamata walega, era sega ni luve i Levi.

32A sa lesia ko Yaropiami e dua na solevu e na kenai kawalu ni vula, e na kenai katinikalima ni siga ni vula, me tauvata kei na solevu mai Juta, a sa vakacabocabo e na dela ni cabocabo-ni-soro. Sa kitaka vakakina mai Peceli, ka vakacabocabo kivei rau na luve ni karavau ka cakava ko koya: a sa vakatikori iratou ki Peceli na bete ni veitikina cecere ka cakava ko koya.

33A sa vakacabocabo e na dela ni cabocabo-ni-soro ka cakava ko koya mai Peceli, e na kenai katinikalima ni siga ni kenai kawalu ni vula, e na vula ka lesia walega e lomana; a sa cakava na solevu vei ira na luve i Isireli: ka vakacabocabo e na dela ni cabocabo-ni-soro, ka vakacaudreva na ka boi vinaka.