1A SA lomana ko Solomoni na tui na alewa era kai tani e lewe vuqa, kei koya na luve i Fero, io, ko ira na alewa ni Moapi, ko ira na alewa ni Amoni, ko ira na alewa ni Itomi, ko ira na alewa ni Saitoni; na luve i Eci;
2mai na veimatanitu ka kaya kina ko Jiova vei ira na luve i Isireli, Dou kakua ni toro vei ira, me ra kakua talega ni toro mai vei kemudou: era na saumaka vakaidina na lomamudou me muri ira na nodra kalou: sa kabiti ira o qo ko Solomoni e na loloma.
3A sa vitu na drau na watina, era alewa turaga, ka tolu na drau na watina lalai: a sa saumaka vakatani na lomana ko ira na watina.
4Ia ni sa qase mai ko Solomoni, sa saumaka na yalona ko ira na watina me muri ira na kalou tani: a sa sega ni dodonu na yalona vei Jiova na nona Kalou, me vaka na yalo i Tavita na tamana.
5A sa lako ko Solomoni me muri Asetoreci na nodra kaloualewa na kai Saitoni, ka muri Milikomi na nodra ka vakasisila na luve i Amoni.
6A sa caka ca ko Solomoni e na mata i Jiova, ka sega ni muri Jiova sara, me vakai Tavita na tamana.
7Sa qai tara ko Solomoni na tikina cecere me nei Kimosi, na nodra ka vakasisila na Moapi, e na ulu-ni-vanua sa donui Jerusalemi, nei Moleki talega na nodra ka vakasisila na luve i Amoni.
8A sa kitaka vakakina e na vukudra na watina kecega era kai tani, era sa vakacaudreva na ka boi vinaka ka cabocabo vei ira na nodra kalou.
9A sa cudru ko Jiova vei Solomoni, e na vuku ni sa saumaki tani na yalona vei Jiova na nodra Kalou na Isireli, o koya ka rairai vakarua vua,
10ka vunau vua e na vuku ni ka o qo, ka me kakua ni muri ira na kalou tani: a sa sega ni vakabauta ko koya na ka ka vunautaka ko Jiova.
11A sa kaya vei Solomoni ko Jiova, E na vuku ni ko sa vakaoqo, ka sega ni vakabauta na noqu veiyalayalati kei na noqu veilesilesi kaʼu a vunautaka vei iko, au na dresulaka tani vakaidina vei iko na matanitu, ka solia vua na nomu tamata:
12ia kaʼu na sega ga ni cakava e na nomu gauna e na vuku i Tavita na tamamu; au na dresulaka ga mai na liga ni luvemu:
13ia kaʼu na sega ni dresulaka na matanitu taucoko; au na solia ga e dua na yavusa vua na luvemu e na vuku i Tavita na noqui talatala, ka e na vuku i Jerusalemi, a ya kaʼu a digitaka.
14A sa vakatubura ko Jiova e dua na meca vei Solomoni, ko Etati na kai Itomi: o koya sa vei ira na kawa ni tui Itomi.
15Ni sa tiko mai Itomi ko Tavita, a sa lako cake ko Yoapi na turaga ni valu, me buluti ira sa moku, ni sa mokuta oti na tagane kecega mai Itomi: (
16ni sa tiko maikea ko Yoapi kei ira kecega na Isireli, ka vula ono, me mokuta oti mada eliu na tagane kecega mai Itomi:)
17sa qai dro ko Etati, ko koya kei ira vata kaya e so vei ira na tamata i tamana era kai Itomi, me lako ki Ijipita; ia sa gone lailai ko Etati.
18A ra sa tu cake mai Mitiani, ka lako ki Perana: a ra sa kauta kei ira e so na tamata mai Perana, a ra sa lako ki Ijipita, kivei Fero na tui Ijipita; ia sa solia vua ko koya e dua na vale, ka lesia vua na kakana, ka solia vua na vanua.
19A sa kune loloma levu e na mata i Fero ko Etati, a sa solia ko koya na taci i watina me watina, io na taci i Tapanesi, na ranadi.
20A sa vakasucuma vua ko na taci i Tapanesi na luvena tagane ko Kinupaca, a sa kalia ko Tapanesi e na vale i Fero: a sa tiko vata kei iratou na goneatagane i Fero ko Kinupaca e na vale i Fero.
21Ia ni sa rogoca ko Etati mai Ijipita ni sa moce vata kei ira na nona qase ko Tavita, ka mate ko Yoapi na turaga ni valu, sa qai kaya vei Fero ko Etati, Mo laivi au meʼu lako yani, meʼu lako ki na noqu vanua.
22A sa kaya vua ko Fero, Ia ka cava ko sa dravudravua kina ni ko sa tiko kei au, ko sa qara kina me lako ki na nomu vanua? A sa kaya ko koya; E segai: ia mo laivi au sara ga.
23Sa vakatubura talega ko na Kalou vei koya e dua na meca, ko Kisoni na luve i Eliyata, o koya ka dro tani mai na nona turaga ko Etateseri na tui Sopa:
24a sa vakasoqoni ira vata vua na tamata e so, ka yaco me turaga ni dua na mataivalu, a sa mokuti ira ko Tavita: a ra sa lako ki Tamasiko, ka tiko maikina, ka lewa mai Tamasiko.
25A sa nodra meca na Isireli ko koya e na gauna kece i Solomoni, nai kuri ni ka ca ka kitaka ko Etati: a sa vakasisilataki ira na Isireli, a sa mai tui Siria ko koya.
26Ia ko Yaropiami na luve i Nipati na kai Efiraca mai Sirata, na tamata nei Solomoni, na yaca i tinana ko Sirua e dua na alewa dawai, sa laveta cake ko koya na ligana vua na tui.
27Ia o qo na ka sa laveta cake kina na ligana vua na tui: sa tarai Milo ko Solomoni; sa viria na kabasu ni bai-ni-koro i Tavita na tamana.
28Ia sa tamata kaukauwa na tamata ko Yaropiami: a sa raica ko Solomoni ni sa cauravou daucakacaka ko koya, a sa lesi koya me lewa nai colacola kecega e na mataqali i Josefa.
29Ia e na gauna ko ya ni sa lako tani mai Jerusalemi ko Yaropiami, sa kunei koya e na sala na parofita ko Eiiya na kai Silo; a sa vakaisulu ko koya e nai sulu vou; a rau sa tiko vakai rau ga e na veiwere:
30a sa taura ko Eiiya nai sulu vou ka vakaisulu kina ko koya, ka dresulaka me tinikarua na kena tikina:
31a sa kaya vei Yaropiami, Mo kauta e tini na tikina: ni sa vosa vakaoqo ko Jiova, na nodra Kalou na Isireli, Raica, kaʼu na dresulaka na matanitu mai na liga i Solomoni, ka solia vei iko e tini na yavusa: (
32ia ena nona ga e dua na yavusa e na vuku i Tavita na noqu tamata, ka e na vuku i Jerusalemi, na koro kaʼu sa digitaka mai na yavusa kecega ni Isireli:)
33e navuku ni sa biuti au ko ira, ka soro vei Asetoreci na nodra kaloualewa na kai Saitoni, ko Kimosi na nodra kalou na Moapi, kei Milikomi na nodra kalou na luve i Amoni, a sa sega ni lako e na noqu sala, me cakava na ka e dodonu e mataqu, kei na noqu veilesilesi, kei na noqu lelewa, me vakai Tavita na tamana.
34Ia kaʼu na sega ni kauta tani na matanitu taucoko mai na ligana: ia kaʼu na cakavi koya me lewa tiko e na veisiga kecega ni nona bula, e na vuku i Tavita na noqui talatala, o koya kaʼu a digitaka, e na vuku ni ka vakabauta na noqu vei vakaro kei na noqu veilesilesi:
35ia kaʼu na kauta tani na matanitu mai na liga i luvena, ka solia vei iko, io e tini na yavu sa.
36Ia kaʼu na solia e dua na yavusa vei koya na luvena, me dua tikoga kina e mataqu na cina ni noqui talatala ko Tavita mai Jerusalemi, na koro kaʼu a digitaka me vakatikora maikea na yacaqu.
37Ia kaʼu na kauti iko, ka ko na lewa kina e na ka kecega sa domona na yalomu, ia ko na yaco me tui Isireli.
38Ia kevaka ko na vakarorogo ki na ka kecega kaʼu na vunautaka vei iko, ka lako e na noqu sala, ka cakava na ka e dodonu e mataqu, e na vakabauta na noqu veilesilesi kei na noqu veivakaro, me vaka ka cakava na noqui talatala ko Tavita; au na qai tiko kei iko, ka tara vei iko na vale dei, me vaka kaʼu a tara vei Tavita, ka soli ira na Isireli vei iko.
39Ia kaʼu na vakararawataka na kawa i Tavita e na vuku ni ka o qo, ia ka sega ni tawa mudu.
40A sa vakasaqara kina ko Solomoni me vakamatei Yaropiami. A sa ia ko Yaropiami, ka dro ki Ijipita, kivei Sisaki na tui Ijipita, a sa tiko mai Ijipita me mate mada ko Solomoni.
41IA na vo ni cakacaka i Solomoni, kei na ka kecega sa cakava ko koya, kei na nona vuku, sa sega li ni volai e nai vola ni valavala i Solomoni?
42Ia na gauna ka lewa kina ko Solomoni mai Jerusalemi, vei ira kecega na Isireli, sa vasagavulu na yabaki.
43A sa moce vata kei ira na nona qase ko Solomoni, a sa buluti e na koro i Tavita na tamana: a sa tui ko Riapiami na luvena, me kenai sosomi.
Who We AreWhat We EelieveWhat We Do
2025 by iamachristian.org,Inc All rights reserved.
