I. A Kedrai Vola Na Tui 10 - AI VOLA TABU（FIJ1864）

Sa lako na radi ni Sipa me raici Solomoni, 1-13. Sa levu na nona koula, kei na yau tani, 14-29.

1IA ni sa rogoca, ko na radi ni Sipa nai rogo kei Solomoni e na vuku ni yaca i Jiova, sa lako me vakatovolei koya e na vosa vakaibalebale vuni.

2A sa lako ko koya ki Jerusalemi kei na lewe-ni-sala lewe vuqa sara, kei na kameli e so era kauta na ka boi vinaka, kei na koula na ka levu sara, kei na vatu talei: ia ni sa yaco ko koya vei Solomoni, sa veivosaki kaya e na ka kecega sa tu e lomana.

3A sa tukuna vua ko Solomoni na ka kecega sa taroga ko koya: sa sega e dua na ka sa vuni vua na tui, me sega ni tukuna vua ko koya.

4Ia ni sa raica oti ko na radi ni Sipa na vuku kecega i Solomoni, kei na vale sa tara oti ko koya,

5kei na kakana ki na nonai kanakana, kei na nodra tiko na nonai talatala, kei na nodra tu era sa qaravi koya, kei na nodrai sulu, kei ira era daukauta na mena, kei na nonai cabecabe sa cabe kina ko koya ki na vale i Jiova, sa yali na nona lomadei.

6A sa kaya ko koya vua na tui, Sai rogorogo dina kaʼu a rogoca e na noqu vanua, e na vuku ni nomui valavala kei na nomu vuku.

7Ia kaʼu a sega ga ni vakadinata na vosa, kaʼu a qai lako mai, ka sa raica na mataqu, kaʼu sa qai vakadinata: ka, raica, sa ka lailai sa tukuni vei au, ka levu na ka sa tawa tukuni: sa uasivi cake na nomu vuku kei na nomu marau e na ka kaʼu a rogoca.

8Sa kalougata ko ira na nomu tamata, sa kalougata ko ira o qo era dauqaravi iko, ka tu e matamu e na veisiga, ka rogoca na nomu vuku.

9Me vakarokorokotaki ko Jiova na nomu Kalou, o koya sa vinakati iko, ka vakatikori iko e nai tikotiko vakaturaga nei Isireli: e na vuku ni sa lomani ira na Isireli tikoga ko Jiova, sa lesi iko kina me tui, me ia na lewa kei na ka e dodonu.

10A sa solia ko koya vua na tui e dua na drau ka ruasagavulu na taledi koula, kei na ka boi vinaka na ka levu sara, kei na vatu talei e so: sa sega tale ni kau na ka boi vinaka me tauvata na kena levu kei na ka ko ya ka solia ko na radi ni Sipa kivei Solomoni na tui.

11Ia na veiwaqa i Irami ka kauta mai na koula mai Oferi, sa kauta na kau talei na ka levu, kei na vatu talei.

12A sa cakava ko na tui e na kau talei nai tautauri ni cabecabe ki na vale i Jiova kei na vale ni tui, na api talega kei na qiriqiri vei ira na dau-ni-meke: sa sega na kau talei me tauvata kaya sa kau kina, se raici, ka yacova na siga o qo.

13A sa solia vua na radi ni Sipa ko Solomoni na tui na ka kecega sa gadreva ko koya, na ka kecega sa kerea, kei na ka talega sa via solia vakatui vei koya ko Solomoni. A sa lesu ko koya, ka lako kina nona vanua, ko koya kei ira era qaravi koya.

14Ia na kena bibi na koula sa kauti vei Solomoni e na yabaki e dua, sa ono na drau ka onosagavulu ka ono na taledi koula,

15kei na kenai kuri maivei ira na tamata dauveivoli, kei ira na tamata dauveivoli e na ka boi vinaka, maivei ira talega na tui Arapia kecega, kei ira na tamata sa lewa na vanua.

16A sa cakava ko Solomoni na tui e rua na drau nai sasabai e na koula sa tukituki: sa caka e dua nai sasabai e na koula e ono na drau na sikeli:

17kei nai sasabai lalai e tolu na drau e na koula sa tukituki; sa caka e dua nai sasabai e na koula e dua na drau ka walusagavulu na sikeli: a sa virikotora ko na tui ki na vale ni veikau ni Lipanoni.

18A sa cakava ko na tui e dua nai tikotiko vakaturaga sa ka levu, e na tabua, ka botana e na koula dina.

19Sa ono nai cabecabe ni tikotiko vakaturaga, ia na tikina ecake ni tikotiko vakaturaga sa leleci mai dakuna: a sa vakaisobesobe na kena yasa ruarua e na tikina sa tikori, a sa rua na laioni sa tu voleka ki nai sobesobe:

20a sa tinikarua na laioni sa tu maikea, e na yasa e dua kei na yasa kadua e nai cabecabe e ono: sa sega na ka e vakakina sa caka e na dua na matanitu.

21A sa koula kecega na bilo ni gunu i Solomoni na tui, a sa koula talei kecega na bilo mai na vale ni veikau ni Lipanoni; sa sega e dua sa siliva: sa sega ni taleitaki e na gauna i Solomoni:

22ni sa tiko mai na wasawasa mai Tarisisi na nona veiwaqa na tui, kei na veiwaqa i Irami: a sa dautale vakadua mai e na yabaki e tolu na veiwaqa ni Tarisisi, ka usana mai na koula, kei na siliva, na tabua, ka so na geli, ka so na pikoko.

23A sa uasivi cake ko Solomoni na tui vei ira kecega na tui kei vuravura e na yau kei na vuku.

24A sa qarai Solomoni ko ira kecega na kai vuravura, me rogoca na nona vuku sa solia ki na yalona ko na Kalou.

25A ra sa kauta yadua na tamata na nonai loloma, e so nai yaya siliva, ka so nai yaya koula, kei na veisulu, kei na veisulu ni valu, kei na ka boi vinaka, e so na ose, ka so na asa, na kenai tavi e na veiyabaki.

26A sa vakasoqona vata ko Solomoni na veivale-vodoki, kei ira na tamata dauvodo e na ose: a sa dua na udolu ka va na drau na nona vale-vodoki, ka tinikarua na udolu na tamata dauvodo e na ose, a sa lesi ira me tiko e na Veikoro ni veivale-vodoki, ka me tiko kaya na tui mai Jerusalemi.

27A sa cakava ko na tui na siliva me vaka na vatu mai Jerusalemi, kei na sitari me vaka na kena vuqa na kau lolo sa tu e na vanua buca.

28A sa kauti tiko mai kivei Solomoni na ose e so mai Ijipita, io nai soqosoqo: sa vakauta nai soqosoqo ko ira na nona dauveivoli na tui, e na kedrai voli.

29A ra sa lako ka kauta mai e dua na vale-vodoki mai Ijipita, a sa kenai voli e ono na drau na siliva, a sa kenai voli e dua na ose e dua na drau ka limasagavulu; a sa vakakina ni ra sa kauta mai vei ira kecega na nodra tui na luve i Eci, kei ira na tui Siria.