I. A Kedrai Vola Na Tui 9 - AI VOLA TABU（FIJ1864）

Sa rairai ko Jiova vei Solomoni, ka vosa vua, 1-9. Sa cata ko Irami na veikoro ka soli vua, 10-14. O ira na tamata cakacaka i Solomoni, 15-23. Ai soro sa daucabori, 25. A veiwaqa Solomoni, 26-28.

1A SA yaco ni sa tara vakaotia ko Solomoni na vale i Jiova, kei na vale ni tui, kei na ka kecega ka gadreva ko Solomoni ka via cakava,

2sa qai rairai tale vei Solomoni ko Jiova, me vaka na nona rairai vua mai Kipioni.

3A sa kaya vua ko Jiova, Au sa rogoca oti na nomu masumasu, kei na nomu kerekere, ko a masu kina e mataqu: au sa vakatabuya na vale o qo, ko sa tara oti, me tiko kina na yacaqu ka tawa mudu; ia ena tiko maikea na mataqu kei na lomaqu e na veisiga kecega.

4Ia kevaka ko na lako voli e mataqu, me vaka ka lako ko Tavita na tamamu, e na yalodina, kei nai valavala dodonu, me cakava na ka kecega kaʼu a vunautaka vei iko, ka vakabauta na ka kaʼu sa lesia kei na ka kaʼu sa lewa:

5au na qai vakataudeitaka nai tikotiko vakaturaga ni nomu matanitu, me lewa kina vei ira na Isireli, ka tawa mudu, me vaka ni kaʼu a yalataka e na vuku i Tavita na tamamu, ka kaya, Ena sega ni mudu vei iko na tamata me tiko e na nodrai tikotiko vakaturaga na Isireli.

6Kevaka dou na lesu tani mo dou kakua ni muri au, oi kemudou sei ira na luvemudou, ka sega ni vakabauta na noqu veivakaro kei na noqu veilesilesi kaʼu sa tauca vei kemudou, ia dou na lako tani ka qarava e so na kalou tani, ka cuva vei ira:

7au na qai muduki ira tani na Isireli mai na dela ni vanua kaʼu a solia vei ira; ia na vale kaʼu sa vakatabuya ki na yacaqu, au na biuta tani e mataqu; ena yaco talega ko ira na Isireli me daucavuti e na vosa vakaibalebale, ka vosataki me vakalialiai vei ira na veimatanitu kecega:

8ia e na vuku ni vale o qo, sa cecere tu, era na kurabui ko ira kece sa lako voli kina, ka vakaisaisa; a ra na kaya, E na vuku ni cava beka sa cakacaka vakaoqo ko Jiova ki na vanua o qo kei na vale o qo?

9ia ena kainaki, E na vuku ni ra sa biuti Jiova na nodra Kalou, o koya ka kauti ira tani na nodra qase mai na vanua ko Ijipita, a ra sa taura e so na kalou tani, ka cuva vei ira, ka qaravi ira: o koya o qo sa vakayacora kina vei ira ko Jiova na ka ca kecega o qo.

10IA ni sa oti na yabaki e ruasagavulu sa tara tiko kina ko Solomoni na vale ruarua, na vale i Jiova, kei na vale ni tui,

11(sa kauta vei Solomoni ko Irami na tui Teiri na kau sitari kei na kau paini, kei na koula, me vaka na ka kecega sa vinakata ko koya,) sa qai solia vei Irami ko Solomoni na tui e ruasagavulu na koro e na vanua ko Kalili.

12A sa lako yani ko Irami mai Teiri me laʼki raica na Veikoro ka solia vua ko Solomoni; a sa sega ni vinaka e matana.

13A sa kaya ko koya, A veikoro a cava o qo ko sa solia mai vei au, na wekaqu? A sa vakatoka o qori ko koya, Na vanua ko Kapuli, ka yacova na siga o qo.

14A sa vakauta eliu ko Irami vei koya na tui e dua na drau ka ruasagavulu na taledi koula.

15Ia o qo nai vakacavacava sa vakarota me ia ko Solomoni na tui, me tara na vale i Jiova, kei na nona vale, kei Milo, kei na bai i Jerusalemi, kei Asori, kei Mikito, kei Keseri: (

16Sa lako cake eliu ko Fero na tui Ijipita, ka kabati Keseri, ka vakama e na buka, ka vakamatei ira na kai Kenani era a tiko e na koro, ka solia me ka-ni-loloma vua na luvena, na wati i Solomoni:

17a sa tarai Keseri ko Solomoni, kei Peci-oroni maira,

18kei Pealaci, kei Tatimori mai na veikau, e na vanua,

19kei na nona Veikoro kecega ni yau ko Solomoni, kei na Veikoro ni veivale-vodoki, kei na nodra Veikoro na tamata dauvodo e na ose, kei na ka kecega sa via tara ko Solomoni mai Jerusalemi, kei Lipanoni, kei na vanua kece ni nona matanitu:)

20Ko ira na tamata kecega sa vo maivei ira na luve i Amoni, kei ira na luve i Eci, kei ira e na Veikoro lalai, kei ira na luve i Evi, kei ira na kai Jepusa, era sega ni luve i Isireli,

21ia na luvedra sa vo me taravi ira e na vanua, ko ira era a sega ni vakarusa rawa ko ira na luve i Isireli, vei ira o qori sa lesia ko Solomoni nai vakacavacava ni bobula, ka yacova na siga o qo.

22Ia ka sega ni vakabobulataka e dua maivei ira na luve i Isireli ko Solomoni; ia era sa tamatai valu ga, kei na nonai talatala, kei na nona tamata turaga, kei na turaga ni nonai valu, kei na turaga ni nona vale-vodoki, kei na nona tamata dauvodo e na ose.

23O ira o qo sa turaga vei ira sa lewa na cakacaka i Solomoni, era sa lewe lima na drau ka limasagavulu, era sa lewai ira na tamata era sa kitaka na cakacaka.

24Ia sa lako cake na luvena alewa ko Fero mai na koro i Tavita, ki na nona vale sa tarai me nona: sa qai tarai ko Milo.

25A sa cabora vakatolu e na veiyabaki ko Solomoni e so nai soro kama, kei nai soro e na veivinakati, e na dela ni cabocabo-ni-soro ka cakava ko koya e na vale i Jiova, a sa vakama na ka boi vinaka e delana o qori sa tu e na mata i Jiova; a sa vakaotia na vale ko koya.

26A sa cakava ko Solomoni na tui e so na waqa mai Esioni-keperi, a ya sa voleka ki Eloci, mai na matasawa ni Wasa Damudamu, e na vanua ko Itomi.

27A sa talai ira ko Irami na nona tamata e na veiwaqa, na gonedau ni waqa era daukila na wasawasa, vata kei ira na tamata i Solomoni.

28A ra sa lako ki Oferi, ka kauta maikea na koula, e va na drau ka ruasagavulu na taledi, ka kauta vei Solomoni na tui.