I. A Kedrai Vola Na Tui 8 - AI VOLA TABU（FIJ1864）

A solevu ni vakacuruma na vale ni soro, 1-11. Sa vosavakalougatataki ira na tamata ko Solomoni, 12-21, 54-61. A nona masu, 22-53. A nonai soro, 62-64. A nona solevu, 65, 66.

1SA qai vakasoqoni ira vata na nodra qase na Isireli ko Solomoni, kei ira kecega na turaga ni veiyavusa, kei ira sa liu vei ira na nodra qase na luve i Isireli, vei Solomoni na tui ki Jerusalemi, me ra kauta cake na kato ni veiyalayalati i Jiova mai na koro i Tavita, a ya ko Saioni.

2A ra sa soqoni vata vei Solomoni na tui ko ira kecega na tamata Isireli, ki na solevu sa ia e na vula ko Icanimi, a ya nai kavitu ni vula.

3A ra sa lako kece mai na nodra qase na Isireli, a ra sa laveta cake na kato ko ira na bete.

4A ra sa kauta cake na kato i Jiova, kei na vale gatu ni veitata, kei nai yaya tabu kecega ka tu e na vale gatu, a ra sa kauta cake ko ira na bete kei ira na Levi.

5Ia ko Solomoni na tui, kei na nodrai soqosoqo taucoko na Isireli era soqoni vata vua, era sa vata kaya e na mata ni kato, ka vakacabora tiko na sipi kei na karavau, sa sega ni tukuni rawa se vuli, e na vuku ni kedra vuqa.

6A sa kauta ko ira na bete na kato ni veiyalayalati i Jiova ki na nona tikina, ki na loqi ni Vosa e na Vale, ki na tikina tabu sara, ki ruku ni tabadrau na Jerupi.

7Ni sa vakatetaba koi rau na Jerupi e na tikina sa tu kina na kato; a rau sa vaka-ruruga maicake na kato kei na kena veivua koi rau na Jerupi.

8A ra sa ucuna nai vua me raici rawa na mua ni vua, mai na tikina tabu e na mata ni loqi ni Vosa, a sa sega ni raici maitautuba, ka sa toka maikea ka yacova na siga o qo.

9Sa sega na ka e loma ni kato, na vatu raraba ga e maka viria kina ko Mosese mai Orepi, ni sa veiyalayalati ko Jiova kei ira na luve i Isireli, ni ra sa lako tani mai na vanua ko Ijipita.

10A sa yaco ni ra sa curu yani na bete mai na tikina tabu, sa qai vakasinaita na vale i Jiova na o,

11a ra sa sega ni tu rawa na bete me kitaka na cakacaka, e na vuku ni o; ni sa vakasinaita na vale i Jiova nai ukuuku i Jiova.

12Sa qai kaya ko Solomoni, Sa kaya ko Jiova ni na tiko ko koya e na butobuto loaloa:

13au sa tara vakaidina e dua na vale mo tiko kina, io, e dua na tikina mo tiko tawa mudu kina.

14A sa vagolea na matana na tui, ka vosavakalougatataki ira kecega na nodrai soqosoqo na Isireli: (a ra sa wavu tu na nodrai soqosoqo taucoko na Isireli:)

15a sa kaya ko koya, Me vakarokorokotaki ko Jiova na nodra Kalou na Isireli, o koya ka vosa e na gusuna vei Tavita na tamaqu, a sa vakayacora e na ligana, ka vaka,

16Mai na siga kaʼu a kauti ira tani kina na noqu tamata na Isireli mai Ijipita, au a sega ni digitaka e dua na koro e na nodra yavusa kecega na Isireli me tara e dua na vale, me tiko maikea na yacaqu; ia kaʼu a digitaki Tavita ga me turaga vei ira na noqu tamata na Isireli.

17A sa tu e na loma i Tavita na tamaqu me tara e dua na vale ki na yaca i Jiova na nodra Kalou na Isireli.

18A sa kaya ko Jiova vei Tavita na tamaqu, E na vuku ni sa tu e lomamu me tara e dua na vale ki na yacaqu, sa vinaka vei iko ni ka tu e lomamu:

19ia ko na sega ni tara na vale; a luvemu ga, o koya ka lako mai na tolomu, ena tara ko koya na vale ki na yacaqu.

20A sa vakataudeitaka ko Jiova na nona vosa ka vosataka ko koya, niʼu sa tubu cake nai sosomi kei Tavita na tamaqu, ia kaʼu sa tiko e nai tikotiko vakaturaga nei Isireli, me vaka ka yalataka ko Jiova, ia kaʼu sa tara oti na vale ki na yaca i Jiova na nodra Kalou na Isireli.

21Au sa cakava talega maikea na tikina me tu kina na kato, sa tu kina na veiyalayalati i Jiova, a ya sa cakava ko koya kei ira na noda qase, ni sa kauti ira tani mai na vanua ko Ijipita.

22A sa tu ko Solomoni e na mata ni cabocabo-ni-soro i Jiova e matadra na nodrai soqosoqo taucoko na Isireli, a sa dodoka yani na ligana ruarua kivaka ki lomalagi:

23a sa kaya ko koya,

I Jiova na nodra Kalou na Isireli, sa sega na Kalou me tauvata kei iko, mai lomalagi ecake, se dela i vuravura era, ni ko sa vakabauta tiko na veiyalayalati kei na loloma kei ira na nomu tamata era lako voli e matamu mai na vu ni yalodra taucoko:

24o sa vakabauta na ka ko a yalataka vua na nomu tamata ko Tavita na tamaqu: ia ko a vosa e na gusumu, a sa vakayacora e na ligamu, me vaka e na siga o qo.

25Ia o qo, i Jiova na nodra Kalou na Isireli, mo vakabauta mada vua na nomu tamata ko Tavita na tamaqu na ka ko a yalataka vua, ni ko a kaya, Ena sega ni mudu vei iko na tamata me tiko e mataqu e nai tikotiko vakaturaga nei Isireli; kevaka era na qarauna na nodrai valavala na luvemu, me lako voli e mataqu me vaka ni ko a lako voli e mataqu.

26Ia o qo, na nodra Kalou na Isireli, me vakadinadinataki mada na nomu vosa, ko a vosataka vua na nomu tamata ko Tavita na tamaqu.

27Ia ena tiko vakaidina li na Kalou e vuravura? raica, ko lomalagi, kei lomalagi ecake sara, sa sega ni ka ko sa yalani rawa kina; sa segai vakaidina na vale o qo kaʼu sa qai tara.

28Ia mo goleva ga, i Jiova na noqu Kalou, na vakamamasu ni nomu tamata kei na nona kerekere, mo rogoca na tagi kei na vakamamasu, sa masu kina edaidai e matamu na nomu tamata:

29me yadra tu na matamu ki na vale o qo e na bogi kei na siga, ki na tikina ko a kaya kina, Ena tiko maikea na yacaqu; mo rogoca kina na masumasu sa kitaka na nomu tamata e na tikina o qo.

30Ia mo rogoca na noqu kerekere na nomu tamata, kei na nodra na nomu tamata na Isireli, ni ra na masumasu e na tikina o qo: ia mo rogoca mai lomalagi, na yasana ko sa tiko kina: ia ni ko sa rogoca, mo kakua ni cudru.

31Kevaka sa caka cala e dua na tamata vua na kai nona, a sa kitaka me vosavavakini, a sa kau mai na nona vavakini ki na mata ni nomui cabocabo-ni-soro e na vale o qo:

32mo qai rogoca mai lomalagi, ka cakava, ka lewai ira na nomu tamata, ni ko vakacalai koya na caka cala, me tauca ki na uluna na nonai valavala; ka vakadonui koya sa caka dodonu, me solia vua me vaka na nonai valavala dodonu.

33Ni ra sa yaviti na nomu tamata na Isireli e na mata ni meca, e na vuku ni ra sa valavala ca vei iko, a ra sa saumaki tale vei iko, ka vakatusa na yacamu, ka vakamamasu, ka kerekere vei iko e na vale o qo;

34mo qai rogoca mai lomalagi, ka kakua ni cudruvaka na nodrai valavala ca na nomu tamata na Isireli, ia mo vakalesui ira tale ki na vanua ko a solia ki na nodra qase eliu.

35Ni sa sogo ko lomalagi, ka sega kina na uca, e na vuku ni ra sa valavala ca vei iko; kevaka era na vakamamasu e na tikina o qo, ka vakatusa na yacamu, ka saumaki mai na nodrai valavala ca, ni ko sa vakararawataki ira;

36mo qai rogoca mai lomalagi, ka kakua ni cudruvaka na nodrai valavala ca na nomu tamata, io, na nomu tamata na Isireli, mo vakavulici ira kina e na sala vinaka me ra lako kina, ka solia na uca ki na nomu vanua, a ya ko sa solia vei ira na nomu tamata mei votavota.

37Kevaka sa yaco e na vanua na dausiga, kevaka sa dua na mate levu, kevaka sa tauvi mate levu na teitei, se malai levu, se so na vodre, se na nuve; kevaka sa buki na kedra druadrua ko ira na meca e na vanua ni nodra Veikoro; kevaka sa dua na rarawa levu, se dua na mate;

38na masu kecega kei na kerekere kecega sa na cakava e dua na tamata, se ko ira kecega na nomu tamata na Isireli, ni sa kila na tamata yadua na kena ca ni lomana, a sa dodoka yani na ligana vaka ki na vale o qo;

39mo qai rogoca mai lomalagi, na yasana ko sa tiko kina, ia mo kakua ni cudru, mo cakava ga ka solia vua na tamata yadua me vaka na nonai valavala kecega, ni ko sa kila na lomana; (ni ko sa kila, ko iko duaduaga, na lomadra kecega na luve ni tamata;)

40me ra rerevaki iko e na gauna kecega era na bula tiko kina e na vanua ko a solia vei ira na neimami qase eliu.

41Ia e na vuku ni kai tani, o koya sa sega ni kai vata kei ira na nomu tamata na Isireli, a sa lako mai na vanua vakayawa e na vuku ni yacamu;

42(ni ra na rogoca na yacamu levu, kei na ligamu kaukauwa, kei na ligamu sa dodo tu;) ni ra na lako mai ka masu e na vale o qo;

43mo qai rogoca mai lomalagi, na yasana ko sa tiko kina, ka mo cakava me vaka na ka kecega sa kaci kina vei iko ko ira na kai tani: me ra kila na yacamu ko ira kecega na kai vuravura, me rerevaki iko, me vakai ira na nomu tamata na Isireli; me ra kila ni sa vakatokai e na yacamu na vale o qo kaʼu sa tara.

44Kevaka era sa lako yani ko ira na nomu tamata me ra vala kei ira na nodra meca, e na sala kecega ko na talai ira kina, ka ra sa masu vei Jiova, kivaka ki na koro o qo ko a digitaka, kei na vale kaʼu sa tara oti ki na yacamu:

45mo qai rogoca mai lomalagi na nodra masumasu, kei na nodra kerekere, ka cakava na ka e dodonu vei ira.

46Kevaka era sa valavala ca vei iko, (ni sa sega na tamata e tawa valavala ca,) ka ko sa cudruvi ira, ka soli ira ki na meca, me ra kauti ira vakabobula ki na vanua ni meca, e yawa se voleka;

47ia kevaka era sa vakanananu e na vanua era a kauti vakabobula kina, ka veivutuni, ka masuti iko e na nodra vanua era a vakabobulataki ira, ka kaya, Keitou sa valavala ca ka caka vakatakelo, keitou sa caka cala;

48a ra sa saumaki vei iko e na lomadra taucoko, kei na vu ni yalodra taucoko, e na vanua ni nodra meca, o ira ka vakabobulataki ira, ka masumasu vei iko kivaka ki na nodra vanua ko a solia vei ira na nodra qase, na koro ko sa digitaka, kei na vale kaʼu sa tara oti ki na yacamu;

49mo qai rogoca mai lomalagi, na yasana ko sa tiko kina, na nodra masumasu, kei na nodra kerekere, ka cakava na ka e dodonu vei ira,

50ia mo kakua ni cudruvi ira na nomu tamata era sa valavala ca vei iko, kei na nodrai valavala talaidredre era sa talaidredre kina vei iko, ia mo cakacaka e na vukudra me ra vinakati ira ko ira era a vakabobulataki ira, ka me ra lomani ira:

51ni ra sa nomu tamata, kei na nomui votavota, ko a kauta tani mai Ijipita, mai loma ni lovo kaukamea sa vakawaicalataki:

52me rai tu na matamu ki na nona kerekere na nomu tamata, kei na nodra kerekere na nomu tamata na Isireli, mo rogoci ira kina e na ka kecega era sa masu kina vei iko.

53Ni ko a tawasei ira vei iko me nomui votavota, maivei ira kecega na veimatanitu i vuravura, me vaka ko a vosa e na gusu i Mosese na nomui talatala, i Jiova na Kalou, ni ko a kauti ira tani na neimami qase mai Ijipita.

54Ia ni sa vakaotia kece ko Solomoni na masumasu kei na kerekere o qo, vei Jiova, sa tu cake ko koya mai na mata ni cabocabo-ni-soro i Jiova, me kakua ni vaka-tekiduru tiko e duruna ka dodoka na ligana ki lomalagi.

55A sa tu cake ko koya, ka vosavakalougatataki ira na nodrai soqosoqo taucoko na Isireli, e na domo levu, ka kaya,

56Me vakarokorokotaki ko Jiova, o koya sa solia nai vakavakacegu vei ira na nona tamata na Isireli, me vaka na ka kecega ka yalataka ko koya: sa sega ni lutu e dua na vosa e na nona vosa ni yalayala vinaka kecega, ka vosataka ko koya e na gusu i Mosese na nonai talatala.

57Me tikoga kei keda ko Jiova na noda Kalou, me vaka ni ka tiko kei ira na noda qase: me kakua ni biuti keda, se lako tani vei keda:

58ka me leleca na lomada vei koya, me da lako kina e na nona sala kecega, a me vakabauta na nona veivakaro, kei na nona veilesilesi, kei na nona lelewa, a ya ka vunautaka ko koya vei ira na noda qase.

59Ia na noqu vosa o qo kaʼu sa masu kina e na mata i Jiova, me voleka vei Jiova na noda Kalou e na siga kei na bogi,; me kitaka kina ko koya na ka e dodonu vei au na nona tamata, kei na ka e dodonu vei ira na nona tamata na Isireli: me vaka sa yaga e na veisiga:

60me ra kila kina ko ira kecega na veimatanitu i vuravura, ni sa Kalou ko Jiova, ka sega e dua tani.

61Ia me dodonu na lomamudou vei Jiova na noda Kalou, me lako e na nona veilesilesi, ka vakabauta na nona veivakaro, me vaka e na siga o qo.

62A ra sa cabora nai soro e na mata i Jiova ko na tui, kei ira vata kaya kecega na Isireli.

63A sa cabora ko Solomoni nai soro e na veivinakati, e rua na oba ka rua na udolu na karavau, ka tinikarua na oba na sipi, a ya ka cabora ko koya vei Jiova. A ra sa vakatabuya na vale i Jiova ko na tui, kei ira kecega na luve i Isireli.

64E na siga ko ya ka vakatabuya ko na tui na lomanibai e na mata ni vale i Jiova, ni sa cabora maikea nai soro kama, kei nai madrali laukana, kei na uro ni soro e na veivinakati; e na vuku ni sa lailai nai cabocabo-ni-soro parasa sa tu e na mata i Jiova, me cabori kina nai soro kama, kei nai madrali laukana, kei na uro ni soro e na veivinakati.

65E na gauna ko ya, sa kitaka na solevu ko Solomoni, kei ira vata kaya na Isireli kecega, nai soqosoqo levu, sa vakatekivu mai nai curucuru ki Emaci ka yacova na uciwai ni Ijipita, e na mata i Jiova na noda Kalou, ka bogi vitu ka bogi vitu, io e tinikava na bogi.

66E nai kawalu ni bogi sa talai ira yani na tamata ko koya: a ra sa vosavakalougatataki koya na tui, a ra sa lako ki na nodra veivale, a sa rereki ka marau e na yalodra e na vuku ni ka vinaka kecega sa cakava ko Jiova vei Tavita na nonai talatala, kei irana Isireli na nona tamata.