I. A Kedrai Vola Na Tui 7 - AI VOLA TABU（FIJ1864）

Sa tara e so na vale ko Solomoni, 1-12. Sa kau mai Teiri na matai vuku ko Irami, me cakava nai yaya ni vale ni soro, 13-51.

1A SA tinikatolu na yabaki ko Solomoni ni sa tara tiko na nona vale.

Ia ni sa oti taucoko na nona vale,

2sa qai tara talega na vale ni veikau ni Lipanoni; na kena balavu e rua na drau na caga, kei na kena raraba e dua na drau na caga, kei na kena cecere e onosagavulu na caga, e na domo ni duru sitari sa yatu va, a sa so nai coka sitari e na domo ni veiduru.

3A sa ubi ecake e na sitari e na dela ni veicoka, a ya sa no e na domo ni duru e vasagavulu ka lima, sa tauyatinikalima e na yatu.

4A sa tolu na yatu katuba me rai kina, a sa veidonui na yasana me rai kina e na yatu e tolu.

5A sa takiveilevu na katuba kecega, kei na veiduru talega; a sa veidonui na katuba me rai kina e na yatu e tolu.

6A sa cakava ko koya e dua na virada e na veiduru, a kena balavu e dua na drau na caga, kei na kena raraba e onosagavulu na caga: a sa tu e na matadra na virada: ka so na duru kei nai coka levu e na matadra.

7A sa qai cakava e dua na virada me tu kina nai tikotiko me lewa maikina, io na virada ni veilewai: a sa botani e na sitari mai na yasa e dua ni coni ki na kenai kadua.

8Ia na nona vale ka dautiko kina ko koya, sa dua tani na kena lomanibai, na kena bai na virada, a sa vakakina na kena cakacaka.

A sa cakava talega ko Solomoni e dua na vale me vaka na virada o qo me nona na luve i Fero, o koya ka kauta me watina.

9Sa vatu talei o qori kecega, me vaka nai vakarau ni vatu sa ta, sa lauvaro e na vei varo, mailoma, maitaudaku talega, io mai na yavu ka yaco ki na dela ni lalaga, ka maitaudaku kivaka ki na lomanibai levu.

10Ia sa vatu talei na kena yavu, na vatu lelevu, na vatu e ruasagavulu na kena caga, kei na vatu e tinikaono na kena caga.

11Ia e delana sa so na vatu talei (me vaka nai vakarau ni vatu sa ta), ka so na sitari.

12Ia na lomanibai levu sa vakavolivolita, sa yatu tolu ni vatu sa ta; ka dua na yatu ni coka sitari, ia me bai ni rara eloma ki na vale i Jiova, kei na virada ni vale.

13A SA talaki ko Solomoni ka vakauti Irami mai Teiri.

140 koya na luvena e dua na alewa dawai e na yavusa i Nafitali, a sa kai Teiri ko tamana, na tamata daucaka parasa: a sa sinai ko koya e na vuku, kei na loma kasa, ka kila me cakava na ka kecega e na parasa.

A sa lako mai ko koya vei Solomoni na tui, ka kitaka na nona cakacaka kecega,

15A sa tulia e rua na duru parasa, sa tau-yatolusagavulu ka ono na caga na kedrau cecere na duru; a sa vivia tauyadua na dali sa ruasagavulu ka va na kena caga.

16A sa cakava e na parasa sa vakawaicalataki e rua na domodomo, me viri ki dela ni veiduru: a kena cecere e dua na domodomo e tini na caga, ia na kena cecere na domodomo kadua e tini na caga:

17na lawa veivolavolai, kei na sinucodo sa muloci, ki na veidomodomo sa tu e dela ni veiduru: e vitu ki na dua na domodomo, ka vitu ki na domodomo kadua.

18A sa cakava na veiduru, ia e rua na yatu me lako voli e taudaku ni lawa, me ubia e nai ukuuku e vaka na vua ni kau na domodomo, a ya sa tu e deladra: a sa cakava vakakina e na kenai kadua na domodomo.

19A sa cakavi na domodomo sa tu e na dela ni veiduru, me vaka na se ni viavia e na virada, sa walu na kena caga.

20Ia na domodomo e na dela ni duru e rua sa tu maicake mai na tikina sa tolo levu, a ya sa donuya na lawa; ia nai ukuuku e vaka na vua ni kau, e rua na drau, sa yatuni ka vivia na domodomo ruarua.

21A sa vakaduria ko koya na veiduru e na virada ni vale ni soro: a sa vakaduria na duru i matau, ka vakatoka na yacana ko Yakini; a sa vakaduria na duru i mawi, ka vakatoka na yacana ko Poasi.

22A sa cakavi na domo ni duru me vaka na se ni viavia: a sa oti na cakacaka ni duru ruarua.

23A sa cakava ko koya e na ka sa vakawaicalataki e dua na sedre, sa vakatokai na Wasawasa, e ruasagavulu na caga mai na batina e dua ki na batina kadua: sa momokiti e na veiyasana, a sa tini na caga na kena cecere: a sa vivia na dali sa onosagavulu na kena caga.

24A sa so na vago e ruku ni tutuna me volita, e tini e na rua na caga, ka volita sara na sedre: sa vakawaicalataki na vago me rua na yatu ni sa vakawaicalataki o qo.

25A sa tu e deladratou na karavau e tinikarua, e tolu sa mata ki na tokalau, ka tolu sa mata ki ra, ka tolu sa mata ki na ceva, ka tolu sa mata ki na tu i cake: a sa tu ecake e na deladratou na sedre, a sa tu yani kiloma na rubu-dratou kecega.

26Ia na kena vavaku, sa tauvata kei na raraba ni liga, a sa cakavi na batina, me vaka na bati ni bilo, e na se ni viavia; sa sova rawa kina na kaloni e oba ka lima na udolu.

27A sa cakava ko koya e tini nai tutu parasa; e walu na caga na kena balavu e dua nai tutu, ka walu na caga na kena raraba, ka ono na caga na kena cecere.

28Ia sa vakaoqo na cakacaka ni tutu: sa vakatutuna, ia na veitutuna sa no e na macawa ni kau sa vakababa:

29ia e na veitutuna sa no e na macawa ni kau sa vakababa, sa so na laioni, na karavau, kei na Jerupi: ia ecake, e na dela ni kau vakababa, sa dua na botona: ia e ruku ni veilaioni kei na veikaravau sa vakaikuritaki kina e so na cakacaka mamari.

30A sa tauyava na kena wila parasa nai tutu kecega, kei na tiki ni parasa me wiri kina; ia sa vakaitokoni na tutuna e va: e rukuruku ni sedre kei na yasana kecega sa vakaikuritaki, sa so kina nai totoko sa vakawaicalataki.

31Ia na kena dreke sa tu ki loma ni domodomo, ka ecake, sa caga rua: ia sa momokiti na kena dreke, me vaka na cakacaka ni tutu, a sa tolu na caga; a sa ceu na kena dreke kei na belena, a sa sega ni momokiti, sa takiveilevu na veiyasana.

32Ia e ruku ni belena sa va na wila; a sa vakamauti ki nai tutu na ka e wiri kina na wila; ia na kena cecere e dua na wila, e tolu na caga.

33Ia na cakacaka ni wila o qori, sa vaka na cakacaka ni wila ni vale-vodoki; sa vakawaicalataki kecega na ka sa wiri kina, kei na tikina sa curu kina na ka sa wiri kina, kei na batina, kei na kenai sa.

34A sa tauyava na kenai totoko e na dua nai tutu e na tutuna e va: sa caka vata sara na vei-totoko kei nai tutu.

35Ia mai na dela ni tutu, sa dua na domodomo sa dua na caga na kena cecere: ia e dela ni tutu, na kenai vakababa, kei na belena sa caka vakakina.

36A sa ceuta ko koya e na veitikina raraba e na kenai vakababa, kei na belena, e so na Jerupi, na laioni, kei na balabala, a sa vakarauvatani vakavinaka kecega, kei na ka sa vakaikuritaki voli kina.

37Sa cakava vakaoqo nai tutu e tini: sa tautauvata na kedratoui tulituli, na kedratoui vakarau, na kedratou levu.

38Sa cakava talega ko koya e tini na sedre parasa: sa sova rawa ki na dua na sedre na kaloni e tolu na drau; a sa tauya-walu na caga na sedre yadua: a sa tu tauyadua na sedre e nai tutu e tini.

39A sa vakatikora e lima nai tutu ki na yasa i matau ni vale, ka lima ki na yasa i mawi ni vale: a sa viritu na sedre e na yasa i matau ni vale kivaka ki cake, ka donuya na ceva.

40A sa cakava na veisedre ko Irami, kei na veibilo me kau tani kina na dravu, kei na veibilo me kau kina na dra me kureitaki. A sa vakaotia ko Irami na cakacaka kecega sa cakava ko koya vei Solomoni na tui, ki na vale i Jiova;

41e rua na duru, kei nai ukuuku momokiti e na domodomo sa tu e na dela ni duru e rua; ka rua na ka sa caka vakatawa, me ubia nai ukuuku momokiti e rua e na domodomo sa tu e na deladrau na duru;

42kei nai ukuuku e va na drau e vaka na vua ni kau, ki na ka vakatawa e rua; e rua na yatu ukuuku e vaka na vua ni kau ki na dua na lawa, me ubia nai ukuuku momokiti e rua e na domodomo sa tu e na deladrau na duru;

43kei nai tutu e tini, kei na sedre e tini e na deladratou nai tutu;

44ka dua na sedre sa vakatokai na wasawasa, kei na karavau e tinikarua e ruku ni sedre ko ya;

45kei na vei-kuro, kei na veibilo me kau tani kina na dravu, kei na veibilo me kau kina na dra me kureitaki: ia sa parasa sa solo vakavinaka nai yaya kecega o qori sa cakava ko Irami vei Solomoni na tui, ki na vale i Jiova.

46Sa cakava o qori na tui e na buca mai Joritani, e na vanua qele-ni-kuro, e na macawa i Sukoci kei Saricani.

47A sa tawa nanuma na bilo kecega ko Solomoni, e na vuku ni sa ka vuqa sara: sa sega ni qarai na kena bibi ni parasa.

48A sa cakava ko Solomoni nai yaya kecega sa tu e na vale i Jiova: nai cabocabo koula, kei nai kanakana koula, sa dautu kina na madrai dauraici,

49kei na veitutu-ni-cina koula dina, sa caka kina na se ni kau, e lima e nai matau, ka lima e nai mawi, e na mata ni loqi ni Vosa, kei na veicina kei na veisaga-ni-buka koula,

50kei na veibilo, kei na veikoti-ni-cina, kei na veibilo me kau kina na dra me kureitaki, kei na veitaki, kei na veimiqa ni ka boi vinaka, e na koula dina; kei na veika e yavala kina nai sogo ni vale eloma, na tikina tabu sara, io mei sogo ni vale, a ya na vale ni soro, e na koula.

51A sa kitaki oti na cakacaka kecega ka cakava ko Solomoni na tui ki na vale i Jiova. A sa kauta kiloma ko Solomoni na ka ka cabora ko Tavita na tamana: na siliva, kei na koula, kei nai yaya, sa viritu vata kei na yau ni vale i Jiova.