I. A Kedrai Vola Na Tui 6 - AI VOLA TABU（FIJ1864）

Sa tara na vale ni soro ko Solomoni e na yabaki e vitu.

1A SA yaco e nai kava na drau ka walusagavulu ni yabaki ni ra sa lako oti mai na vanua ko Ijipita ko ira na luve i Isireli, e nai kava ni yabaki sa lewa kina ko Solomoni vei ira na Isireli, e na vula ko Sifi, a ya nai karua ni vula, sa mai tara ko koya na vale i Jiova.

2Ia na vale sa tara vei Jiova ko Solomoni na tui, na kena balavu e dua na drau ka ruasagavulu na caga, kei na kena raraba e vasagavulu, kei na kena cecere e onosagavulu na caga.

3Ia na virada e na mata ni vale ni soro, e vasagavulu na caga na kena balavu, me tautauvata kei na raraba ni vale; sa ruasagavulu na caga na kena raraba e na mata ni vale.

4A sa cakava ko koya ki na vale, e so na katuba ecake vakaisogo me rai voli kina.

5A sa cakava e so nai taba-ni-vale ecake ki na lalaga ni vale, me volita na veilalaga ni vale, io, na tikina tabu, kei na loqi ni Vosa: ia sa cakava e so nai taba-ni-vale ecake me volita:

6nai taba-ni-vale era, e tini na caga na kena raraba, ia o qori eloma, sa tinikarua na caga na kena raraba; ia nai katolu, sa tinikava na caga na kena raraba: ni sa cakava ko koya e so nai nono me volita etaudaku na vale, ka me kakua ni vauci ki na veilalaga ni vale.

7Ia na vale, ni sa tara tiko, sa tara e na vatu sa cokonaki oti eliu, ka kauti kikea emuri: a sa sega kina ni rorogo e na vale ko ya nai tukituki, se na matau, se dua na ka kaukamea vakamatai, ni sa tara tiko.

8A katuba ni taba-ni-vale eloma, sa no mai na kena yasa i matau ni vale: a ra sa cabe cake e nai kabakaba takelo ki na kena eloma, ia mai na kena eloma ki na kenai katolu.

9A sa tara na vale ko koya, ka vakaotia; ka ubia na vale e nai sa kei na papa sitari.

10A sa cakava e so nai taba-ni-vale e na veiyasana kece ni vale, e tini na caga na kedra cecere: a sa koto o qori ki na vale e na kau sitari.

11A sa lako mai na vosa i Jiova vei Solomoni, ka kaya,

12Na vale o qo ko sa tara tiko, kevaka ko sa lako e na noqu vei-vakaro, ka kitaka na noqu lewa, ka vakabauta na noqu vunau kecega me lako vakakina, au na qai vakataudeitaka vei iko na noqu vosa, a ya kaʼu a vosataka vei Tavita na tamamu:

13ia kaʼu na tiko e na kedra maliwa na luve i Isireli, ka sega ni biuti ira na noqu tamata na Isireli.

14A sa tara na vale ko Solomoni, ka vakaotia.

15A sa botana eloma na veilalaga ni vale e na papa sitari, io mai nai coco ni vale ka kauta ki na veicoka sa no kina nai botani: sa botana na lomana e na kau, ka botana nai coco ni vale e na papa paini.

16A sa botana na veilalaga ni vale e na papa sitari, ka caga vasagavulu, io mai nai coni ka yaco ki na veicoka: a sa cakava mailoma me dua kina na loqi ni Vosa, a ya me tikina tabu sara.

17Ia sa walusagavulu na caga na vale, io, na tikina tabu e matana.

18Ia sa ceuti na sitari e loma ni vale e na vago kei na se ni kau sa tevuraki; sa sitari kecega; sa sega ni rairai na vatu.

19A sa cokonaki na loqi ni Vosa e loma ni vale, me viritu kina na kato ni veiyalayalati i Jiova.

20Ia na loqi ni Vosa, sa vasagavulu na caga na kena balavu e matana, ka vasagavulu na caga na kena raraba, ka vasagavulu na caga na kena cecere: a sa botani e na koula talei, ka sa botani nai cabocabo sitari.

21A sa botana eloma na vale ko Solomoni e na koula talei; a sa viria e dua na bai e na sinucodo koula, e na mata ni loqi ni Vosa, a sa botana e na koula.

22A sa botana eloma ko koya na vale taucoko e na koula, ka me oti sara mada na vale: kei nai cabocabo taucoko, a ya sa tu mai na loqi ni Vosa, sa botani e na koula.

23Ia mai loma ni loqi ni Vosa, sa cakava ko koya e rua na Jerupi, e na kau ni waiwai, sa tauyaruasagavulu na caga na kedrau cecere.

24A sa tini na caga na tabana e dua ni Jerupi, ka tini talega na caga na tabana kadua ni Jerupi: mai na mua ni tabana e dua, ka yaco ki na mua ni tabana kadua, sa ruasagavulu na caga.

25A sa ruasagavulu na caga na Jerupi kadua: sa tautauvata na kedraui vakarau na Jerupi, kei na kedrau levu.

26Sa ruasagavulu na caga na kena cecere na Jerupi e dua, a sa vakakina na Jerupi kadua.

27A sa viritu na Jerupi ki loma ni vale eloma: a rau sa vakatetaba tu na Jerupi, a sa tara na lalaga na taba ni dua, a sa tara na lalaga kadua na tabana na Jerupi kadua; a sa veiyacovi na tabadrau mai loma ni vale.

28A sa botana ko koya na Jerupi e na koula.

29A sa ceuta ko koya na veilalaga kecega ni vale, me volita, e nai vakatakarakara ni Jerupi, kei na balabala, kei na se ni kau sa tevuraki, eloma, ka etaudaku.

30A sa botana nai coco ni vale e na koula, eloma, ka etaudaku.

31Ia ki nai curucuru ni loqi ni Vosa, sa cakava ko koya nai sogo e na kau ni waiwai; na duru ni katuba kei na kau kicake, sa yasa e lima.

32Ia sa kau ni waiwai talega nai sogo ruarua; a sa ceuta kina ko koya nai vakatakarakara ni Jerupi, kei na balabala, kei na se ni kau sa tevuraki, ka botana e na koula, ka botana e na koula na Jerupi kei na balabala.

33A sa cakava vakakina ki na katuba ni vale, na duru e rua e na kau ni waiwai, sa ta vakarivirivi.

34Ia sa kau paini nai sogo e rua: sa lobi rawa e rua na yasa ni sogo e dua, ka sa lobi rawa e rua na yasa ni sogo kadua.

35A sa ceuta kina ko koya na Jerupi, kei na balabala, kei na se ni kau sa tevuraki; a sa botana e na koula sa vakarauvatani kei na kena ceuceu.

36A sa viria na bai ni rara eloma e na vatu sa ta, ka taqa tolu, ka dua na yatu e na coka sitari.

37Sa tauyavutaki na vale i Jiova e nai kava ni yabaki, e na vula ko Sifi:

38ia e na kenai katinikadua ni yabaki, e na vula ko Puli, (a ya nai kawalu ni vula,) sa oti na vale e na kena veiyasana kecega, me vaka na kenai valavala kecega. A sa vitu na yabaki ko koya ni sa tara tiko.