I. A Kedrai Vola Na Tui 5 - AI VOLA TABU（FIJ1864）

Sa vakarau ko Solomoni me tara na vale ni soro, a sa vukei koya ko Irami, na tui Teiri.

1A SA talai ira ko Irami na tui Teiri na nona tamata vei Solomoni, ni sa rogoca oti ko koya ni sa lumuti ko koya me tui, nai sosomi kei tamana: ni ka lomani Tavita tikoga ko Irami.

2A sa talaki ko Solomoni vei Irami, ka kaya,

3O sa kilai Tavita na tamaqu, ni sa sega ni tara rawa e dua na vale ki na yaca i Jiova na nona Kalou, e na vuku ni valu sa voliti koya tikoga, ka me soli ira oti mada ko Jiova ki na ruku ni qeteqete ni yavana.

4Ia o qo, sa vakacegui au ko Jiova na noqu Kalou e na veiyasana kecega; sa sega e dua na meca, ka sega ni yaco tiko e dua na ka ca.

5Ka, raica, kaʼu sa vaka meʼu tara e dua na vale ki na yaca i Jiova na noqu Kalou, me vaka na ka ka kaya ko Jiova vei Tavita na tamaqu, ni sa kaya, A luvemu, o koya kaʼu na vakatikora e na nomui tikotiko vakaturaga me kemui sosomi, ena tara ko koya na vale ki na yacaqu.

6Ia o qo, mo vakarota me ra taya vei au e so na sitari mai Lipanoni; ia era na vata ko ira na noqu tamata kei ira na nomu tamata: ia kaʼu na solia vei iko na nodrai voli na nomu tamata me vaka na ka kecega ko na kaya: ni ko sa kila ni sa sega na tamata vei keitou e kila na ta kau me vakai ira na kai Saitoni.

7Ia ni sa rogoca ko Irami na vosa i Solomoni, sa marau vakalevu, ka kaya, Me vakavinavinakataki ko Jiova e na siga edaidai, o koya sa solia vei Tavita na luvena vuku, me lewai ira na tamata lewe vuqa o qo.

8Sa talaki talega vei Solomoni ko Irami, ka kaya, Au sa rogoca na ka ko sa talaki kina vei au; au na cakava na ka kecega ko sa vinakata e na kau sitari, kei na kau paini:

9ena kauta sobu mai Lipanoni ki na waitui ko ira na noqu tamata: ia kaʼu na vu-tona mai waitui ki na tikina ko na lesia vei au, ia kaʼu na biuta kikea, ko na qai vakauta; ia ko na kitaka na ka kaʼu sa vinakata, ka ko na solia kina na kakana vei ira na noqu lewe-ni-vale.

10A sa solia vei Solomoni ko Irami na kau sitari kei na kau paini, o qori kecega sa vinakata ko koya.

11A sa solia ko Solomoni vei Irami e tinikaono na oba na puseli witi, me kedra na nona lewe-ni-vale, kei na waiwai sa vutuki na kaloni e dua na udolu ka lima na drau; sa solia vakaoqo vei Irami ko Solomoni e na veiyabaki.

12A sa solia vei Solomoni ko Jiova na vuku, me vaka ka yalataka vua: a rau sa sautu ko Irami kei Solomoni; a rau sa ia na veiyalayalati.

13Asa vakarota ko Solomoni na tui me solia e so na tamata maivei ira kecega na Isireli: ia ko ira sa soli era sa lewe tolu na oba na tamata.

14A sa talai ira ki Lipanoni, e lewe dua na oba e na dua na vula, ka ra veitaravi; era sa tiko mai Lipanoni ka vula dua, mai na nodra veivale ka vula rua: a sa nodra turaga na tamata sa soli ko Etonirami.

15Asa oba vakavitu na tamata i Solomoni sa daucolacola, a sa oba vakawalu sa ta kau tiko mai na ulu-ni-vanua;

16kei ira talega na turaga nei Solomoni era lesi me vakaraica na cakacaka, era sa tolu na udolu ka tolu na drau, era lewai ira na tamata era sa kitaka tiko na cakacaka.

17A sa vakarota ko na tui, ka ra sa kauta na vatu lelevu, na vatu dredre, na vatu sa ta oti, me tauyavutaka kina na vale.

18A ra sa taya ko ira na tamata dautara-vale nei Solomoni, kei ira na tamata dautara-vale nei Irami, kei ira na kai Kipali: a ra sa vakarautaka na kau kei na veivatu me tara kina na vale.