1A SA ia ko Solomoni na veiwekani kei Fero na tui Ijipita, ka kauta na luvena alewa ko Fero, ka kauti koya ki na koro i Tavita, ka me tara oti mada eliu na nona vale, kei na vale i Jiova, kei na bai me voliti Jerusalemi.
2A ra sa cabocabo tiko ko ira na tamata e na veitikina cecere ga, e na vuku ni sa sega ni tara oti tu e dua na vale ki na yaca i Jiova, ka yacova na veisiga o qori.
3A sa lomani Jiova ko Solomoni, ka lako tiko me vaka na vunau i Tavita na tamana: ia ka sa cabocabo tiko, ka vakacaudreva na ka boi vinaka, e na veitikina cecere.
4A sa lako na tui ki Kipioni me ia maikina nai soro; ni sa rogo vakalevu na tikina cecere ko ya: sa cabora ko Solomoni e dua na udolu nai soro kama e nai cabocabo-ni-soro ko ya.
5Sa rairai vei Solomoni ko Jiova mai Kipioni e na tadra e na bogi: a sa kaya na Kalou, Mo kerea na ka kaʼu na solia vei iko.
6A sa kaya ko Solomoni, O ni sa caka loloma vakalevu vua na nomu tamata ko Tavita na tamaqu, me vaka sa lako ko koya e na matamu e na yalodina, kei nai valavala dodonu, kei na yalododonu vei iko; ia ko a cakava vua na loloma levu o qo, ni ko sa solia na kawa vei koya, me tiko e nonai tikotiko vakaturaga, me vaka edaidai o qo.
7Ia o qo, Jiova na noqu Kalou, o sa bulia na nomu tamata me tui, mei sosomi kei Tavita na tamaqu: ia koi au, kaʼu sa gone lailai: au sa sega ni kila me curu yani se curu mai.
8A sa tiko na nomu tamata e na kedra maliwa na nomu tamata, o ira ko a digitaka, na lewe vuqa, era sega ni wiliki se tukuni rawa.
9Ia mo solia vei au na nomu tamata na yalo vakavuku, meʼu lewai ira rawa na nomu tamata, meʼu kila na ka vinaka kei na ka ca; ia ko cei sa rawata me lewai ira na nomu tamata e lewe vuqa o qo?
10A sa vinaka vua na Turaga na vosa ko ya, ni sa kerea na ka o qo ko Solomoni.
11A sa kaya na Kalou vei koya, E na vuku ni ko a kerea na ka o qo, ka sega ni kerea me nomu na bula balavu; ka sega ni kerea me nomu na yau, ka sega ni kerei ira na nomu meca me mate; a sa kerea me nomu na vuku, mo kila kina na lewa dodonu;
12raica, kaʼu sa caka me vaka na nomu vosa: raica, kaʼu sa solia vei iko na yalo sa vuku ka daulelewa; me kakua kina e dua eliu me tautauvata kei iko, ena sega talega ni tubu e dua emuri me vakataki iko:
13ia kaʼu sa solia talega vei iko na ka ko a sega ni kerea, na yau, kei na vakarokoroko: me kakua ni dua vei ira na tui me tautauvata kei iko e na nomu siga kecega:
14ia kevaka ko na lako e na noqu sala, me vakabauta na noqu vunau, kei na noqui vakaro, me vaka ka lako na tamamu ko Tavita, kaʼu na qai vakabalavutaka na nomu bula.
15A sa yadra ko Solomoni; ka, raica, sa tadra ga. A sa lako ki Jerusalemi, ka tu e na mata ni kato ni veiyalayalati i Jiova, ka cabora e so nai soro kama, ka kitaka e so nai soro e na veivinakati, ka cakava na magiti vei ira kecega na nona tamata.
16SA qai lako mai vua na tui e rua na alewa dauyatagane, a rau sa mai tu e matana.
17A sa kaya na alewa e dua, I noqu turaga, keirau sa tiko kaya na alewa o qo e na vale e dua; ia kaʼu a vakasucu ni keirau a tiko kaya e na vale ko ya:
18ia e na kenai katolu ni siga niʼu a vakasucu oti, sa qai vakasucu na alewa o qo talega; ia keirau sa tiko duaduaga; sa sega na kai tani keitou sa tiko kaya e na vale; ko keirau duaduaga sa tiko e na vale ko ya:
19a sa mate na luvena tagane na alewa o qo e na bogi, e na vuku ni sa bika ko koya:
20a sa tu cake ko koya e na lomaloma-ni-bogi, ka kauta tani vei au na luvequ tagane, ni sa moce koto na nomu vada, a sa vakotora e na lomaserena, ka vakotora na luvena sa mate ki na lomaserequ:
21ia kaʼu a duri cake e na sabogibogi me vakasucuma na luvequ, ka, raica, sa mate: ia niʼu a vakaraici koya e na sabogibogi, raica, sa sega ni luvequ, o koya kaʼu a vakasucuma.
22A sa kaya na alewa kadua, E segai; ni sa luvequ ko koya sa bula, ka sa luvemu ko koya sa mate. A sa kaya ko koya o qo, E segai; sa luvemu ga ko koya sa mate, ka sa luvequ ga ko koya sa bula. A rau sa vosa e na mata ni tui.
23A sa kaya na tui, Sa kaya e dua, A luvequ o qo ko koya sa bula, ka sa luvemu ko koya sa mate: a sa kaya nai kadua, E segai; ni sa luvemu ga ko koya sa mate, a sa luvequ ko koya sa bula.
24Sa kaya talega na tui, Dou kauta mai vei au e dua nai seleiwau. A ra sa kauta nai seleiwau ki na mata ni tui.
25A sa kaya na tui, Dou waseruataka na gone sa bula, ka solia e dua na wase vua e dua, vua talega na kenai karua e dua na wase.
26A sa vosa vua na tui na alewa, o koya sa nona na gone sa bula, ni sa yavala na ketena vua na luvena, a sa kaya, I noqu turaga, mo solia vei koya na gone sa bula; ka kakua sara ni vakamatea. A sa kaya na alewa kadua, Me kakua ni noqu se nomu; dou waseruataka ga.
27Sa qai vosa na tui, ka kaya, Dou solia na gone sa bula vei koya, ka kakua sara ni vakamatea: sa tinana ko koya.
28A ra sa rogoca ko ira kecega na Isireli na lewa ka kitaka ko na tui: a ra sa rerevaka na tui; ni ra sa kunea ni sa tu vua na vuku ni Kalou, me kitaka kina na lewa.
Who We AreWhat We EelieveWhat We Do
2025 by iamachristian.org,Inc All rights reserved.
