I. A Kedrai Vola Na Tui 2 - AI VOLA TABU（FIJ1864）

Sa tatau ko Tavita vei Solomoni, ka qai mate, 1-11. Sa vakataudeitaki na matanitu i Solomoni, 12; a sa vakamatei ko Etoniya, 13-25. Sa vakasivoki ko Epiyacari, 26, 27; a sa vakamatei ko Yoapi, 28-35. Sa vakamatei ko Simi, 36-46.

1A SA toro mai na siga i Tavita me mate kina; a sa vakaroti Solomoni na luvena, ka kaya,

2Au sa lako e na sala sa lako kina ko ira kecega na kai vuravura: mo kaukauwa ka vakatagane;

3ka vakabauta na ka e rotaka ko Jiova na nomu Kalou, mo lako e nona sala, mo vakabauta na ka e lesia ko koya, na ka e vunautaka, kei na ka e lewa ko koya, kei na ka e vakarota ko koya, me vaka sa volai e na vunau i Mosese, mo vinaka kina e na ka kecega ko na cakava, kei na ka kecega ko na goleva:

4me vakataudeitaka kina ko Jiova na nona vosa ka vosataka vei au, ni sa kaya, Kevaka ena raica vinaka ko ira na luvemu na nodrai valavala, me lako e mataqu e na yalodina, e na lomadra taucoko, kei na vu ni yalodra taucoko, (sa kaya ko koya,) ena sega ni mudu vei iko na tamata e nai tikotiko vakaturaga nei Isireli.

5Ia ko sa kila talega na ka ka kitaka vei au ko Yoapi na luve i Siruya, io, na ka ka kitaka vei rau na turaga ni valu nei Isireli, vei Epineri na luve i Neri, kei Amasa na luve i Yeceri, oi rau ka vakamatea ko koya, ka vakadavea na dra ni valu e na gauna ni sautu, ka boroya na nonai vau ni sulu sa vau kina na tolona, kei na nonai vava sa vakaivava kina na yavana, e na dra ni valu.

6Ia mo cakacaka ga me vaka na nomu vuku, ka kua ni laiva na uluna sika me lako vakacegu sobu ki nai bulubulu.

7Ia mo caka vinaka vei iratou na luve i Parisilai na kai Kiliati, a me ratou tiko kei ira era kana mai na nomui kanakana: ni ratou sa lako vakakina mai vei au niʼu a dro e na vuku i Episalomi na tuakamu.

8Ka, raica, sa vata kei iko ko Simi na luve i Kira, na Penijamini na kai Peurimi, o koya ka rukaki au e na ruru ca e na siga kaʼu a lako kina ki Meeneimi: a sa lako sobu ko koya me tavaki au mai na Joritani, ia kaʼu a vosavavakini vua e na yaca i Jiova, ka kaya, Au na sega ni vakamatei iko e nai seleiwau.

9Ia o qo, mo kakua ni vakadonui koya, ni sa tamata vuku ko iko, ka kila na ka mo cakava vua; ka mo vakayacora na uluna sika ki nai bulubulu e na dra.

10A sa moce vata kei ira na nona qase ko Tavita, a sa buluti e na koro i Tavita.

11Ia na gauna sa tui kina ko Tavita vei ira na Isireli, e vasagavulu na yabaki: sa tui mai Epironi ka yabaki vitu, ka sa tui mai Jerusalemi ka yabaki tolusagavulu ka tolu.

12SA qai tiko ko Solomoni e nai tikotiko vakaturaga nei Tavita na tamana; a sa vakataudeitaki sara na nona matanitu.

13A sa lako ko Etoniya na luve i Akici kivei Paci-sepa na tina i Solomoni. A sa kaya ko koya, O sa lako vakayalovinaka mai, se segai? A sa kaya ko koya, Vakayalovinaka ga.

14Sa kaya talega ko koya, Sa dua na ka meʼu vosataka vei iko. A sa kaya ko koya, Mo vosa mai.

15A sa kaya ko koya, O sa kila ni sa noqu eliu na matanitu, a ra sa golevi au na Isireli kecega meʼu tui: a sa vuki ga na matanitu, ka sa yaco me nona na taciqu: ni sa nona maivei Jiova:

16ia o qo, sa dua bauga na ka kaʼu sa kerea vei iko, mo kakua ni bureitaka vei au. A sa kaya vua ko koya, Mo tukuna mai.

17A sa kaya ko koya, Mo vosa mada vei Solomoni na tui, (ni na sega ni bureitaka vei iko,) me soli Episaki vei au, o koya na kai Sunemi, me watiqu.

18A sa kaya ko Paci-sepa, E vinaka; au na vosa e na vukumu vua na tui.

19A sa lako ko Paci-sepa vua na tui ko Solomoni, me vosa vua e na vuku i Etoniya. A sa tu cake na tui me laʼki tavaki koya, a sa cuva vua, a sa tiko sobu e nonai tikotiko vakaturaga, a sa vakatura e dua nai tikotiko me tiko kina na tinana na tui, a sa tiko ko koya mai na ligana i matau.

20A sa kaya ko koya, Au sa kerea e dua na ka lailai vei iko; mo kakua ni bureitaka vei au. A sa kaya vua ko koya na tui, Mo kerea, na tinaqu; niʼu na sega ni bureitaka vei iko.

21A sa kaya ko koya, Me soli ko Episaki na kai Sunemi kivei Etoniya na tuakamu me watina.

22A sq vosa na tui ko Solomoni, ka kaya vei tinana, Ia ka cava ko sa kerei Episaki na kai Sunemi kina me nei Etoniya? mo kerea me nona na matanitu talega; ni sa tuakaqu ko koya; io, me nona, ka nei Epiyacari na bete, ka nei Yoapi na luve i Siruya.

23A sa vosavavakini ko Solomoni na tui e na yaca i Jiova, ka kaya, Me cakacaka vakakina vei au na Kalou, ka vakaikuritaka, kevaka sa sega ni mate ko Etoniya, e na vuku ni sa vosataka na vosa o qo:

24ia o qo, me vaka sa bula ko Jiova, o koya ka vakataudeitaki au, ka vakatikori au e nai tikotiko vakaturaga i Tavita na tamaqu, a sa solia vei au na kawa, me vaka ka yalataka ko koya, ena mate edaidai ko Etoniya.

25A sa talai Pinaya na luve i Yioyata ko Solomoni na tui; a sa lutuki koya, ka sa mate ko koya.

26A sa kaya na tui vei Epiyacari na bete, Mo lako tani ki Anacoci, ki na nomu vanua; ni sa dodonu mo mate: ia kaʼu na sega ni vakamatei iko edaidai, e na vuku ni ko a kauta voli na kato ni Turaga ko Jiova e na mata i Tavita na tamaqu, ka e na vuku ni ko a vakararawataki e na ka kecega ka vakararawataki kina ko tamaqu.

27A sa vakasevi Epiyacari ko Solomoni me kakua ni bete tiko vei Jiova; me vakayacori kina na vosa i Jiova, a ya ka vosataka e na vuku ni mataqali i Eli mai Silo.

28A sa yaco vei Yoapi na kenai rogo: ni sa gole me muri Etoniya ko Yoapi, ia ka sega ni gole me muri Episalomi. A sa dro ko Yoapi ki na Vale gatu i Jiova, a sa laʼki taura na veitikina sa tu cake e nai cabocabo-ni-soro.

29A sa tukuni vei Solomoni na tui ni sa dro ko Yoapi ki na Vale gatu i Jiova, ka, raica, sa tiko mai nai cabocabo-ni-soro. A sa talai Pinaya na luve i Yioyata ko Solomoni, a sa kaya, Mo lako, mo lutuki koya.

30A sa lako ki na Vale gatu i Jiova ko Pinaya, ka kaya vua, Sa vosa vakaoqo na tui, Mo curu mai. A sa kaya ko koya, E segai; au na mate ga eke. A sa kauta tale na vosa vua na tui ko Pinaya, ka kaya, Sa vosa vakaoqo ko Yoapi, a sa kaya vakaoqo vei au.

31A sa kaya na tui vei koya, Mo caka me vaka ka kaya ko koya, ka mo lutuki koya, ka buluti koya; mo kauta tani kina vei au, kei na lewe-ni-vale i tamaqu, na dra tawa cala ka vakadavea ko Yoapi:

32ia ena tauca ko Jiova ki na uluna na nona dra; e na vuku ni ka lutuka ko koya na tamata e lewe rua, erau yalododonu ka vinaka, ka ca ko koya, ka vakamatei rau e nai seleiwau, ni sa sega ni kila ko Tavita, na tamaqu; io, ko Epineri na luve i Neri, na turaga ni nodrai valu na Isireli, kei Amasa na luve i Yeceri, na turaga ni nodrai valu na Juta:

33ia ena saumaki na kedrau dra me tauca na ulu i Yoapi, kei na uludra na nona kawa ka tawa mudu: ia ena tu na vakacegu maivei Jiova, vei Tavita, kei na nona kawa, kei na nona mataqali, kei na nonai tikotiko vakaturaga, ka tawa mudu.

34A sa lako cake ko Pinaya na luve i Yioyata, ka lutuki koya, ka vakamatei koya; ka sa buluti ko koya e na nona vale mai na veikau.

35A sa lesi Pinaya na luve i Yioyata ko na tui me kenai sosomi me lewai ira nai valu: a sa lesi Satoki na bete ko na tui mei sosomi kei Epiyacari.

36A sa talaki na tui me kacivi Simi, a sa kaya vua, Mo tara e Jerusalemi e dua na vale me nomu, ka tiko maikina, ka kakua ni lako tani maikea ki na dua na vanua:

37ia ena yaco e na siga ko sa lako tani, ka lako-kosova na uciwai ko Kitironi, mo kila vakaidina ko na mate vakaidina: ena cala ko iko ga e na vuku ni nomu mate.

38Asa kaya vua na tui ko Simi, Sa vinaka na vosa o qori: ena cakacaka na nomu tamata me vaka sa kaya na noqu turaga na tui. A sa tiko vakadede mai Jerusalemi ko Simi.

39Ia ni sa oti e tolu na yabaki, sa dro e rua na nona tamata ko Simi, vua na tui Kaca ko Akisi, na luve i Meeka. A sa tukuni vei Simi, ka vaka, Raica, sa e Kaca koi rau na nomu tamata.

40A sa ia ko Simi, ka vauca na vodovodo ki na nona asa, ka lako ki Kaca kivei Akisi, me qarai rau na nona tamata: a sa lako ko Simi, ka kauti rau na nona tamata mai Kaca.

41A sa tukuni vei Solomoni ni sa lako oti ko Simi mai Jerusalemi ki Kaca, ka sa tale mai.

42A sa talaki na tui me kacivi Simi, a sa kaya vua, Au a sega beka ni cakavi iko mo vosavavakini e na yaca i Jiova, ka vakarota vei iko, ka kaya, Mo kila vakaidina ni ko na mate vakaidina e na siga ko sa lako tani kina, ka lako voli ki na dua na vanua? ia ko a kaya vei au, Sa vinaka na vosa kaʼu sa rogoca:

43ia ka cava ko sa sega ni vakabauta kina na vosa vavakini vei Jiova, kei na vunau kaʼu a vunautaka vei iko?

44Sa kaya talega na tui vei Simi, O sa kila na ka ca kecega sa tu e lomamu, ko a kitaka vei Tavita na tamaqu: o koya ena vakalesuya kina ko Jiova na nomu ca ki na ulumu;

45ia ena kalougata ko Solomoni na tui, ka na vakataudeitaki e na mata i Jiova nai tikotiko vakaturaga i Tavita, ka; tawa mudu.

46A sa vakarota ko na tui vei Pinaya na luve i Yioyata; a sa curu yani ko koya, ka lutuki koya, a sa mate kina. A sa vakataudeitaki na matanitu e na liga i Solomoni.