I. A Kedrai Vola Na Tui 1 - AI VOLA TABU（FIJ1864）

A WASE I. —Sa qase sara ko Ta cila, 1-4. Sa kailavaki me tui ko Etoniya, a sa lewa ko Tavita me tui ko Solomoni, 5-53.

1A SA qase mai ko Tavita na tui, sa vuqa na nona yabaki; a sa ubi e nai tutuvi, a sa sega vua na katakata.

2A sa kaya vua ko ira era sa qaravi koya, Me qarai mada vei iko na noqu turaga na tui e dua na cauravou, sa gonealewa: ia me tu ga e matana na tui, ka me vakaraici iko, ka koto e na lomaseremu; me katakata kina na noqu turaga na tui.

3A ra sa qara e dua na gonealewa matavinaka e na veiyasana kecega nei Isireli, a ra sa kunei Episaki, e dua na kai Sunemi, a ra sa kauti koya vua na tui.

4A sa matavinaka sara na gonealewa, a sa vakaraica na tui, ka dauqaravi koya: a sa sega ni veikilaki kaya ko na tui.

5Sa qai vakalevulevui koya ko Etoniya na luve i Akici, ka kaya, Au na tui koi au: a sa vakarautaka me nona e so na vale-vodoki, kei na tamata e so era dauvodo lako e na ose, kei na tamata e lewe limasagavulu me ra daucici me liutaki koya.

6A sa sega ni vunauci koya eliu ko tamana e na dua na siga, me kaya, A cava ko sa kitaka vakaoqo kina? A sa matavinaka sara ko koya talega; a sa sucu eliu ko Episalomi, a sa muri ko koya.

7A ratou sa veivosaki ko koya kei Yoapi na luve i Siruya, kei Epiyacari na bete; a rau sa muri Etoniya, ka vukei koya.

8Ia ko Satoki na bete, kei Pinaya na luve i Yioyata, kei Nacani na parofita, kei Simi, kei Rei, kei ira na tamata kaukauwa nei Tavita, era sa sega ni vata kei Etoniya.

9A sa vakamatea ko Etoniya e so na sipi, kei na karavau, kei na manumanu uro, mai na vatu ko Soeleci, a ya sa voleka ki Eni-rokeli, a sa kacivi iratou kecega na tuakana kei na tacina, na luvena na tui, kei ira kecega na kai Juta era nona tamata na tui:

10ia ka sa sega ni kacivi Nacani na parofita, kei Pinaya, kei ira na tamata kaukauwa, kei Solomoni na tacina.

11A sa vosa ko Nacani vei Paci-sepa na tina i Solomoni, ka kaya, O sa sega beka ni rogoca ni sa tui ko Etoniya na luve i Akici, ka sa sega ni kila ko Tavita na noda turaga?

12Ia mo lako mai, meʼu tukuna mada vei iko na ka me caka, mo vakabulai iko kina, kei Solomoni na luvemu.

13Mo lako mada vua na tui ko Tavita, ka kaya vua, O a sega li ni vosavavakini, na noqu turaga na tui, vei au na nomu vada, ka kaya, Ena taravi au vakaidina ko Solomoni na luvemu me tui, ka tiko e na noqui tikotiko vakaturaga? ia ka cava e tui kina ko Etoniya?

14Raica, ni drau sa vosa tiko maikea kei koya na tui, kaʼu na muri iko talega ka vakadinadinataka na nomu vosa.

15A sa curu vua na tui ko Paci-sepa ki na loqi: a sa qase sara na tui; a sa qaravi koya na tui ko Episaki na kai Sunemi.

16Asa cuva ko Paci-sepa, ka vakarokoroko vua na tui. A sa kaya na tui, A cava sa yalomu?

17A sa kaya vua ko koya, Noqu turaga, ko a vosavavakini vei au na nomu vada e na yaca i Jiova, na nomu Kalou, ka vaka, Ena taravi au vakaidina ko Solomoni na luvemu me tui, ka na tiko e na noqui tikotiko vakaturaga.

18Ia o qo, raica, sa tui ko Etoniya; ia o qo, noqu turaga na tui, ko sa sega ni kila:

19a sa vakamatea ko koya e vuqa na karavau kei na manumanu uro, kei na sipi, a sa kacivi iratou kecega na luvena na tui, kei Epiyacari na bete, kei Yoapi na turaga ni valu: ia ko Solomoni na nomu tamata, sa sega ni kaciva ko koya.

20Ia ko iko, noqu turaga na tui, sa vakaraici iko tiko na matadra kecega na Isireli, mo tukuna vei ira se ko cei me tarava na noqu turaga na tui, me tiko e nonai tikotiko vakaturaga.

21Ia de keirau na vaka nai valavala ca kei Solomoni na luvequ, ni sa moce vata kei ira na nona qase ko na noqu turaga na tui.

22Ka, raica, ni sa vosa tiko ko koya vua na tui, sa curu talega ko Nacani na parofita.

23A sa tukuni vua na tui, ka vaka, Raica, ko Nacani na parofita. Ia sa lako ko koya ki na mata ni tui, ka vakacuva na matana ki na qele vua na tui.

24A sa kaya ko Nacani, Noqu turaga na tui, ko sa bau kaya, Ena taravi au me tui ko Etoniya, ka na tiko e na noqui tikotiko vakaturaga, ne?

25ni sa lako sobu edaidai ko koya, a sa vakamatea e vuqa na karavau, kei na manumanu uro, kei na sipi, a sa kacivi iratou kecega na luvena na tui, kei iratou na turaga ni valu, kei Epiyacari na bete; ia, raica, era sa kana ka gunu tiko e matana, ka kaya, Me bula ko Etoniya na tui.

26Ia koi au, na nomu tamata, kei Satoki na bete, kei Pinaya na luve i Yioyata, kei na nomu tamata ko Solomoni, sa sega ni kaciva ko koya.

27Sa cakava beka na ka o qo na noqu turaga na tui, ka ko sa sega ni vakatakila vei au na nomu tamata, se ko cei ena tarava na noqu turaga na tui me tiko e na nonai tikotiko vakaturaga?

28A sa vosa na tui ko Tavita, ka kaya, Dou kacivi Paci-sepa mai vei au. A sa lako mai ko koya ki na mata ni tui, a sa tu e na mata ni tui.

29A sa vosavavakini na tui, ka kaya, Me vaka na kena dina ni sa bula ko Jiova, o koya ka vakabulai au mai na ka rarawa kecega,

30me vaka kaʼu a vosavavakini vei iko e na yaca i Jiova na Kalou nei Isireli, ka kaya, Ena taravi au vakaidina na luvemu ko Solomoni me tui, ka na tiko e na noqui tikotiko vakaturaga me kequi sosomi; kaʼu na kitaka vakaidina me vakakina e na siga o qo.

31A sa vakacuva ko Paci-sepa na matana ki na qele, ka vakarokoroko vua na tui, ka kaya, Me bula ga ka tawa mudu na noqu turaga ko Tavita na tui.

32A sa kaya ko Tavita na tui, Dou kaciva mai vei au na bete ko Satoki, kei Nacani na parofita, kei Pinaya na luve i Yioyata. A ratou sa lako mai ki na matana na tui.

33A sa kaya na tui vei iratou, Dou kauti ira era sa qarava na nomudou turaga, ka vakavodoki Solomoni na luvequ ki na noqu asa, ka kauti koya sobu ki Kioni:

34ia me lumuti koya maikea ko Satoki na bete kei Nacani na parofita, me nodra tui na Isireli: ia dou uvuca na davui, ka kaya, Me bula na tui ko Solomoni.

35Dou na qai muri koya cake mai me mai tiko ko koya e na noqui tikotiko vakaturaga; ni na tui ko koya me kequi sosomi: ia kaʼu a lesi koya me lewai ira na Isireli kei ira na Juta.

36A sa vosa vua na tui ko Pinaya na luve i Yioyata, ka kaya, Emeni: me kaya vakakina ko Jiova na nona Kalou na noqu turaga na tui:

37me vaka ka tiko ko Jiova kei na noqu turaga na tui, me tiko vakakina ko koya kei Solomoni, ka cakava me uasivi cake na nonai tikotiko vakaturaga e na nonai tikotiko vakaturaga na noqu turaga ko Tavita na tui.

38A ra sa lako sobu ko Satoki na bete, kei Nacani na parofita, kei Pinaya na luve i Yioyata, kei ira na Kireci, kei ira na Pileci, a ra sa vakavodoki Solomoni ki na asa i Tavita na tui, ka kauti koya ki Kioni.

39A sa kauta ko Satoki na bete na tavaya waiwai mai na Vale gatu, ka lumuti Solomoni. A ra sa Uvuca na davui; a ra sa kaya kecega na tamata, Me bula na tui ko Solomoni.

40A ra sa muri koya cake na tamata kecega, a sa uvuca na bitu-ni-vakatagi ko ira na tamata, ka reki e na rereki levu, a sa kavida na vanua e domodra.

41A sa rogoca ko Etoniya kei ira kece era sa kacivi mo tiko kaya, ni ra sa kana oti. Ia ni sa rogoca ko Yoapi na domo ni davui, sa kaya, Mei cavai na ue sa rogo e na koro?

42Ni sa vosa tiko ko koya, raica, sa lako mai ko Jonacani na luve i Epiyacari na bete: a sa kaya ko Etoniya, Mo curu mai; ni sa tamata qaqa ko iko, a sa kauta mai nai rogo vinaka.

43A sa vosa vei Etoniya ko Jonacani, ka kaya, Sa cakavi Solomoni vakaidina me tui ko Tavita na noda turaga na tui:

44a sa tala kaya ko na tui na bete ko Satoki, kei Nacani na parofita, kei Pinaya na luve i Yioyata, kei ira na Kireci, kei ira na Pileci, a ra sa vakavodoki koya ki na nona asa na tui:

45a rau sa lumuti koya mai Kioni me tui, koi rau ko Satoki na bete kei Nacani na parofita: a ra sa lako cake maikea ka reki lako, a sa ue kina na koro: o qo na rorogo dou a rogoca:

46a sa tiko talega ko Solomoni e nai tikotiko ni matanitu:

47a ra sa lako tale na tamata sa dauqarava na tui, me vosavakalougatataka na noda turaga ko Tavita na tui, a ra sa kaya, Me cakava ko na nomu Kalou na yaca i Solomoni me vinaka cake e na yacamu, ka cakava me uasivi cake na nonai tikotiko vakaturaga e na nomui tikotiko vakaturaga: a sa cuva ko koya na tui e nonai mocemoce:

48a sa kaya vakaoqo talega na tui, Me vakavinavinakataki ko Jiova na Kalou nei Isireli, o koya sa solia e dua edaidai me tiko e na noqui tikotiko vakaturaga, ni sa raica tiko na mataqu.

49A ra sa rere ko ira kecega na tamata sa kacivi, era sa tiko kei Etoniya, a ra sa tu cake, ka dui lako na tamata e nonai lakolako.

50A sa rere ko Etoniya e na vuku i Solomoni, ka tu cake, ka laʼki taura na veitikina sa tu cake e nai cabocabo-ni-soro.

51A sa tukuni vei Solomoni, ka vaka, Raica, sa rerevaki Solomoni na tui ko Etoniya: ka, raica, sa taura na veitikina sa tu cake e nai cabocabo-ni-soro, a sa kaya, Me vosavavakini vei au edaidai ko Solomoni na tui, ni na sega ni vakamatea na nona tamata e nai seleiwau.

52A sa kaya ko Solomoni, Kevaka sa tamata yaga ko koya, ena sega e dua na drau ni uluna me lutu ki na qele: ia kevaka sa kune vua na ca, ena mate.

53A sa talaki ko Solomoni na tui, a ra sa kauti koya sobu mai nai cabocabo-ni-soro. A sa lako mai ko koya ka cuva vei Solomoni na tui: a sa kaya vua ko Solomoni, Mo lako ki na nomu vale.