II. Ai Ni Vola I Samueli 24 - AI VOLA TABU（FIJ1864）

Sa dauveretaki ko Tavita me wiliki ira na nona tamata; sa cudru kina ko Jiova, a sa mate e vitu na oba na tamata; a sa qai donu nai soro ka cabora ko Tavita.

1A SA cudru tale vei ira na Isireli ko Jiova, a sa vakauqeti ko Tavita vei ira, ka vaka, Mo laʼki wiliki ira na Isireli kei ira na Juta.

2A sa kaya na tui vei Yoapi na turaga ni valu, erau vata kaya, Mo lako voli mada e na loma ni veiyavusa kecega ni Isireli, mai Tani ka yacovi Pieri-sepa, ka wiliki ira na tamata, meʼu kila kina na kedrai wili na tamata.

3A sa kaya vua na tui ko Yoapi, Me vakaikuritaka vakadrau ko Jiova na nomu Kalou na kedrai wiliwili na tamata, me raica talega ko na noqu turaga na tui e na matana: ia e na vuku ni cava sa vinakata kina na ka o qo na noqu turaga na tui?

4A sa gumatua na nona vosa na tui vei Yoapi, vei ira talega na turaga ni valu.

A sa lako tani e na matana na tui ko Yoapi, kei ira na turaga ni valu, me wiliki ira na tamata, io, na Isireli.

5A ra sa lako-kosova na Joritani, ka laʼki tiko mai Aroeri, mai na yasa ni koro ki nai matau, a ya mai na loma ni buca nei Kata, ka donui Yaseri:

6era sa qai lako ki Kiliati, kei na vanua ko Tatimi-otisi; a ra sa yaco ki Tani-yaani, ka lako voli ki Saitoni,

7ka yaco ki na koro kaukauwa ko Teiri, kei na nodra veikoro kecega na luve i Evi, kei na kai Kenani: ka ra lako yani kivaka ki na mata ni ceva nei Juta ka yaco ki Pieri-sepa.

8Ia ni ra sa lako voli e na vanua taucoko, era sa yaco ki Jerusalemi ni sa oti na vula o ciwa kei na bogi e ruasagavulu.

9A sa cavuta ko Yoapi vua na tui na kedrai wili na tamata: a sa oba vakawalusagavulu na tamata qaqa vei ira na Isireli, era sa taura nai seleiwau; ia ko ira na tamata Juta, era sa oba vakalimasagavulu na tamata.

10A sa yaviti Tavita na lomana ni sa wiliki ira oti na tamata. A sa kaya vei Jiova ko Tavita, Au sa valavala ca vakalevu e na ka kaʼu sa cakava: ia o qo, i Jiova, mo kauta tani mada na noqui valavala ca na nomu tamata; niʼu sa caka vakalialia sara.

11A sa duri cake ko Tavita e na sabogibogi; a sa lako mai na vosa i Jiova vei Kata na parofita, na tamata daurai nei Tavita, a sa kaya,

12Mo laʼki kaya vei Tavita, Sa vosa vakaoqo ko Jiova, Au sa cavuta vei iko na ka e tolu; mo digitaka e dua maikina, meʼu cakava vei iko.

13A sa lako vei Tavita ko Kata, ka tukuna vua, ka kaya vua, Me yacovi iko na dausiga e nomu vanua ka yabaki vitu? se mo dro tiko e na matadra na nomu meca ka vula tolu, ni ra sa muri iko? se me bogi tolu na mate levu e na nomu vanua? mo lewa mada, ka raica, se cava na vosa meʼu kauta tale vua ka talai au mai.

14A sa kaya vei Kata ko Tavita, Au sa taqaya vakalevu: me da lutu mada ki na liga i Jiova; ni sa levu na nona loloma: ia meʼu kakua ni lutu ki na liga ni tamata.

15A sa vakayacora ko Jiova na mate levu vei ira na Isireli mai na sabogibogi ko ya ka yacova na siga sa lokuca: a ra sa mate vei ira na tamata mai Tani ka yaco ki Pieri-sepa era oba vakavitu na tamata.

16A sa dodoka na ligana ko na agilose kivaka ki Jerusalemi me vakarusa; a sa veivutuni ko Jiova e na vuku ni rarawa, a sa kaya vua na agilose sa vakarusai ira tiko na tamata, Sa levu; me cegu o qo na ligamu. A sa tu na agilose i Jiova e na rara ni samu sila nei Aravina na kai Jepusa.

17Asa vosa vei Jiova ko Tavita, ni sa raica na agilose ka mokuti ira na tamata, a sa kaya, Raica, au sa caka cala, a sa kitaka na ka ca koi au: ia na veisipi o qo, a cava era sa cakava? me yaviti au mada na ligamu, kei ira na mataqali i tamaqu.

18A sa lako vei Tavita e na siga ko ya ko Kata, a sa kaya vua, Mo lako cake, mo cakava e dua nai cabocabo-ni-soro vei Jiova, mai na rara ni samu sila nei Aravina na kai Jepusa.

19A sa lako cake ko Tavita me vaka na vosa i Kata, me vaka ka vunautaka ko Jiova.

20A sa rai voli ko Aravina, ka kunea na tui kei ira na nona tamata ni ra lako vua: a sa lako yani ko Aravina, ka cuva vakatobocu ki na qele e matana na tui.

21A sa kaya ko Aravina, A cava e lako mai kina na noqu turaga na tui vei au na nona tamata? A sa kaya ko Tavita, Me volia vei iko na rara ni samu sila meʼu cakava kina e dua nai cabocabo-ni-soro vei Jiova, me mudu na mate levu vei ira na tamata.

22A sa kaya vei Tavita ko Aravina, Me kauta ga na noqu turaga na tui, ka cabora na ka e vinaka vua: raica, na karavau mei soro kama, ia me buka nai yaya ni samu sila, kei nai yaya ni karavau.

23A ka kecega o qo sa solia vakaturaga ko Aravina vei koya na tui. Sa kaya talega vua na tui ko Aravina, Me vinakati iko ko Jiova na nomu Kalou.

24A sa kaya na tui vei Aravina, E segai; kaʼu na volia vakaidina vei iko e na kenai voli: ia kaʼu na sega ni cabora vei Jiova na noqu Kalou nai soro kama sa rawai walega. A sa volia ko Tavita na rara ni samu sila, kei na karavau, e na sikeli siliva e limasagavulu.

25A sa cakava maikea ko Tavita nai cabocabo-ni-soro vei Jiova, ka cabora e so nai soro kama ka so nai soro e na veivinakati. A sa vakamasuti ko Jiova e na vuku ni vanua, a sa mudu na mate levu vei ira na Isireli.