II. Ai Ni Vola I Samueli 23 - AI VOLA TABU（FIJ1864）

Sa tukuna ko Tavita ni na dua na lewa dodonu, 1-7. A yacadra na tamata turaga nei Tavita, 8-39.

1O QO nai vakaotioti ni vosa i Tavita. Sa kaya ko Tavita na luve i Isei, ia sa kaya na tamata sa laveti cake, o koya ka lumuta ko na Kalou i Jekope, kei koya na daunivucu kamikamica i Isireli,

2Sa vosa e na gusuqu na Yalo i Jiova, e na yamequ talega na nona vosa.

3Sa kaya ko koya na nodra Kalou na Isireli, sa kaya vei au na nodra Kaukauwa na Isireli, Me yalododonu ko koya sa lewai ira na tamata, ka lewa tiko me vaka sa rerevaka na Kalou;

4ia me vaka na rarama e na mataka, ni sa cadra na siga, na mataka sa sega kina na o; ni sa mai na qele na co, ni sa cila vinaka ni sa oti na uca.

5Ia kevaka sa sega ni vakaoqo vua na Kalou na noqu mataqali, sa cakava ga ko koya vei au na veiyalayalati tawa mudu, sa vakarau tu e na ka kecega, ka vakabauti: ia na ka kecega meʼu bula kina, kei na ka kecega kaʼu sa gadreva, ena sega beka ni vakatubura ko koya?

6Ia na tamata ca, era sa vaka kecega na voto ni kau sa biu, ni ra sa sega ni tauri rawa e na ligada:

7ia na tamata sa via tauri ira, e dodonu me vakaisulutaki e na kaukamea kei na dia ni moto; a ra na visa vakaidina e na buka e na tikina ko ya.

8O QO na yacadra na tamata kaukauwa nei Tavita: O Josepi-pasipeti na Takimoni sa liu vei iratou na lewe tolu; o koya na Daureki-e-na-moto: a sa veivala kei ira na lewe walu na drau, a sa mokuti ira ko koya e na dua na gauna.

9A sa muri koya ko Eliasari na luve i Toto na luve i Eoi; sa dua vei iratou na lewe tolu na tamata qaqa eratou vata kei Tavita, ni ratou sa bolei irana kai Filisitia era sa soqoni vata maikea ki nai valu, a ra sa lako yani na tamata Isireli:

10a sa tu cake ko koya, ka mokumokuti ira na kai Filisitia, ka me malumalumu mada na ligana, a sa kabita na nonai seleiwau na ligana: a sa ka levu na veivakabulai ka kitaka ko Jiova e na siga ko ya; a sa muri koya ko ira na tamata me kitaka walega nai toki ni valu.

11A sa muri koya ko Sama na luve i Aki, o koya mai na ulu-ni-vanua. A ra sa soqoni vata na kai Filisitia me babani, e na dua na tiki ni were sa tei kecega e na pini: a ra sa dro e na matadra na kai Filisitia ko ira na tamata.

12A sa tu ko koya e na loma ni were, ka Vakabula, ka mokuti ira na kai Filisitia: a sa kitaka na veivakabulai levu ko Jiova.

13A ratou sa lako sobu ko iratou e lewe tolu vei ira na lewe tolusagavulu sa liu, a ratou sa lako vei Tavita ki na qara vatu mai Etulami, e na vula i matua: a sa tiko vakaivalu mai na buca ko Refeimi na nodra mataivalu na kai Filisitia.

14A sa tiko ko Tavita e na koro kaukauwa e na veisiga ko ya; a sa tiko mai Pecileema e na gauna ko ya na nodrai valu na kai Filisitia.

15A sa garogaro ko Tavita, ka kaya, O cei mada me vagunuvi au e na wai mai na mata-ni-wai mai Pecileema, a ya mai na matamata-ni-koro!

16Ia ko iratou na lewe tolu na tamata qaqa, eratou a basuka na nodra mataivalu na kai Filisitia, ka takiva na wai mai na mata mai Pecileema, a ya mai na matamata-ni-koro, a ratou sa taura, ka kauta vei Tavita: a sa bese ni gunuva ko koya, a sa sovara ga vei Jiova:

17a sa kaya, Me yawa vei au, Jiova, meʼu kitaka na ka o qo: sa kedratou dra na tamata eratou a douvaka na mate, se segai? a sa bese ni gunuva ko koya. A ka o qo eratou sa cakava na tamata qaqa e lewe tolu o qori.

18Ia ko Episai na taci i Yoapi, na luve i Siruya, sa turaga vei iratou na lewe tolu. A sa taura na nona moto me veivala kei ira e tolu na drau, era sa mate kina, a sa rogo ko koya vata kei iratou na lewe tolu ko ya.

19Sa sega li ni vakarokorokotaki vakalevu cake vei iratou na lewe tolu? o koya o qo sa nodratou turaga kina, ia ka sa sega ni tautauvata kei iratou na lewe tolu o qori.

20Ia ko Pinaya na luve i Yioyata, a luvena e dua na tamata qaqa mai Kapisieli, ka cakava na ka levu eliu, ia sa mokuta ko koya e rua na tamata erau a vaka na laioni, erau kai Moapi: sa lako sobu talega ka mokuta e dua na laioni e na dua nai keli, e na gauna ni uca-vulavula:

21sa mokuta talega e dua na kai Ijipita, a tamata matavinaka; a sa taura e dua na moto ko koya na kai Ijipita; a sa lako sobu vua ko koya ni sa taura ga nai titoko, ka sa kaliraka na moto mai na ligana na kai Ijipita, ka vakamatei koya e na nona moto ga.

22A ka o qo sa cakava ko Pinaya na luve i Yioyata, a sa rogo ko koya vata kei iratou na lewe tolu na qaqa.

23Sa vakarokorokotaki vakalevu cake ko koya vei ira na lewe tolusagavulu, a sa sega ni tautauvata kei iratou na lewe tolu o qori. A sa lesi koya kina ko Tavita me dua vei ira era sa daubose kaya.

24O Asaeli na taci i Yoapi sa vata kei ira na lewe tolusagavulu; ko Elanani na luve i Toto na kai Pecileema,

25ko Sama na kai Eroti, ko Elika na kai Eroti,

26ko Elesi na luve i Paliti, ko Ira na luve i Ikesi na kai Tikoa,

27ko Epieseri na kai Anacoci, ko Mipunei na luve i Usa,

28ko Salimoni na luve i Eoi, ko Meerei na kai Kitofa,

29ko Elepi na luve i Peana, e dua na kai Nitofa, ko Itei na luve i Ripei mai Kipia sa nodra na luve i Penijamini,

30ko Pinaya na kai Piraconi, ko Itei mai na uciwai mai Keasi,

31ko Epi-aliponi na kai Arapa, ko Asimaveci na kai Peurimi,

32ko Eliyapa na kai Seelipimi, vei ira na luve i Yaseni, ko Jonacani,

33ko Sama, o koya mai na ulu-ni-vanua, ko Eiami na luve i Sarari o koya mai na ulu-ni-vanua,

34ko Elifeleti na luve i Easipai na luvena na kai Meeka, ko Iliami na luve i Eiitofeli na kai Kilo,

35ko Esirei na kai Karimeli, ko Peerei na kai Aripa,

36ko Ikiali na luve i Nacani o koya mai Sopa, ko Pani na luve i Kata,

37ko Seleki na luve i Amoni, ko Neeri na kai Pieroci, o koya sa daucolata nai yaragi i Yoapi na luve i Siruya,

38ko Ira na luve i Yecesi, ko Karepi na luve i Yeceri,

39ko Uriya na luve i Eci.

O ira kecega, era tolusagavulu ka vitu.