1A SA dua na dausiga e na gauna i Tavita, ka tolu vata na yabaki; a sa masumasu vei Jiova ko Tavita. A sa kaya ko Jiova, E na vuku i Saula ga, kei na mataqali dau-veivakamatei ko ya, e na vuku ni sa vakamatei irana kai Kipioni.
2A sa kacivi ira na kai Kipioni ko na tui, a sa kaya vei ira: (ia sa sega ni luve i Isireli ko ira na kai Kipioni, era sa kedra vo na luve i Amori; a sa vosavavakini eliu vei ira ko ira na luve i Isireli: a sa qara ko Saula me mokuti ira e na nona lomakatakata e na vukudra na luve i Isireli kei Juta);
3io, sa kaya vei ira na kai Kipioni ko Tavita, A cava meʼu kitaka e na vukumudou? ka cava na ka meʼu ia kina nai bulubulu, mo dou vosavakalougatataka kina nai votavota i Jiova?
4A sa kaya ko ira na kai Kipioni vei koya, Me kakua ni neitou na siliva se na koula maivei Saula, kei na nona lewe-ni-vale; ia me kakua talega ni vakamatei e na vuku i keitou e dua na tamata vei ira na Isireli. A sa kaya ko koya, A ka dou sa kaya, au na kitaka e na vukumudou.
5A ra sa kaya vua na tui, A tamata ka vakaoti keitou, ka nakita me vakarusai keitou, me keitou kakua sara ni tiko e na nodra veiyasana na Isireli,
6me soli vei keitou e lewe vitu na tamata maivei iratou na luvena, ia keitou na vakalilici iratou e na mata i Jiova mai Kipia nei Saula, o koya ka digia ko Jiova. A sa kaya na tui, Au na solia.
7A sa maroroi Mifiposeci ko na tui, o koya na luve i Jonacani na luve i Saula, e na vuku ni vosa vavakini vei Jiova erau a kitaka ko Tavita kei Jonacani na luve i Saula.
8A sa kauta ko na tui na luvena tagane ruarua ko Risipa, na luvena alewa ko Eya, oi rau ka vakasucuma ko koya vei Saula, ko Erimoni kei Mifiposeci; kei iratou na lewe lima na luvena tagane ko Mikali, na luvena alewa ko Saula, o iratou ka vakasucuma ko koya vei Atirieli na luve i Parisilai na kai Miola:
9a sa soli iratou ki na ligadra na kai Kipioni, a ra sa vakalilici iratou mai na ulu-ni-vanua e na mata i Jiova: a ratou sa bale vata ko iratou vituvitu, a ratou sa vakamatei e nai tabayabaki sa vakatekivu kina na tamusuki sila, ni sa qai tekivu na tamusuki parile.
10A sa kauta ko Risipa na luve i Eya e dua nai sulu matailelevu, ka birika e na dela ni vatu levu, me tiko kina mai nai vakatekivu ni tamusuki sila, ka yacova na gauna sa tauci iratou kina na wai mai lomalagi: a sa sega ni laiva na manumanu mai lomalagi me tiko e deladratou e na siga, se na manumanu ni vanua e na bogi.
11A sa tukuni vei Tavita na ka ka kitaka ko Risipa na luve i Eya, na watina lailai ko Saula.
12A sa lako ko Tavita, ka kauta na sui i Saula, kei na sui i Jonacani na luvena, maivei ira na kai Yapesi-kiliati, era a butakoca mai na sala ni koro mai Peci-sani, na tikina ka vakalilici rau kina ko ira na kai Filisitia, e na siga sa mokuti Saula kina mai Kilipoa ko ira na kai Filisitia:
13a sa kauta cake maikea ko koya na sui i Saula, kei na sui i Jonacani na luvena; a ra sa kumuna vata na suidratou eratou a vakalilici.
14A ra sa buluta na sui i Saula kei Jonacani na luvena, e na vanua nei Penijamini mai Sela, e nai bulubulu i Kisi na tamana: a ra sa kitaka na ka kecega ka vunautaka ko na tui. A sa oti na ka o qo, sa qai vakamasuti ko na Kalou e na vuku ni vanua.
15A RA sa ia tale nai valu na kai Filisitia vei ira na Isireli; a sa lako sobu ko Tavita, kei ira vata kaya na nona tamata, a ra sa kitaka nai valu kei ira na kai Filisitia: a sa malumalumu mai ko Tavita.
16A sa dua vei ira na luve ni tamata yagolevu, na mata ni nona moto sa tolu na drau na sikeli parasa na kena bibi, ka vauci tu vua nai yaragi vou, ko Isipi-pinopi; a sa nakita me mokuti Tavita.
17A sa vukei koya ko Episai na luve i Siruya, ka mokuti koya na kai Filisitia, ka vakamatei koya. Era sa qai vosavavakini vei Tavita ko ira na nona tamata, ka kaya, O na sega ni lako tale kei keitou ki nai valu, mo kakua j kina ni bokoca na cina nei Isireli.
18A sa oti na ka o qo sa ia tale mai Kopo e dua nai valu kei ira na kai Filisitia: a sa qai mokuti Safi e dua vei ira na luve ni tamata yagolevu ko Sipikei na luve i Usa.
19A sa ia tale mai Kopo e dua nai valu kei ira na kai Filisitia, ia ko Elanani na luve i Yeere-orekimi, na kai Pecileema, sa mokuta na taci i Koliyaca, na kai Kaca, na dia ni nona moto sa vaka na nodra kau na dautali sulu.
20A sa ia tale mai Kaca e dua nai valu, a sa dua na tamata yagolevu, a sa ono nai qaqalo ni ligana ruarua, ka ono nai qaqalo ni yavana ruarua, e ruasagavulu ka va na kenai wili; a sa sucu ko koya talega vua na tamata yagolevu.
21A sa bolei ira na Isireli ko koya, a sa mokuti koya ko Jonacani na luve i Simi, na tuaka i Tavita.
22Sa sucu vua na tamata yagolevu mai Kaca ko iratou e lewe va o qo, a ratou sa bale e na liga i Tavita, kei na ligadratou na nona tamata.
Who We AreWhat We EelieveWhat We Do
2025 by iamachristian.org,Inc All rights reserved.
